الحلويات الباردة إللي بنحضّرها من غير خبز ولا فرن من أسهل وصفات الحلويات، تحضيرها ما بيحتاجش منك مجهود كبير ولا احترافية كبيرة، مجرد مكونات بتحضريها بكميات ومقادير مظبوطة. عشان كده هي مناسبة جدًا لأسلوب حياة الأم. النهاردة هنقدم لك وصفة هيحبوها عشاق التشيز كيك وكمان عشاق الشوكولاتة، وكمان عشاق الوصفات السهلة السريعة، وهي طريقة عمل تشيز كيك بارد بالشوكولاتة.
ادخلي هنا عشان تعرفي 3 طرق لعمل الشيز كيك
الشوكولاتة هنا في الوصفة دي هتغنيكي عن إنك تستخدمي أي نوع من أنواع الجيلاتين الموجود في أغلب وصفات التشيز كيك الباردة، وده لإن الشوكولاتة هتدي تماسك للقوام وكمان هتخلي التشيز كيك كريمية وخطيرة. يُفضّل دايمًا في وصفات التشيز كيك الباردة، إنك تسيبيها في التلاجة طول الليل لحد اليوم التالي، لكن تقدري تكتفي بس بـ3-4 ساعات لو كنتي مستعجلة أو عندك ضيوف مثلًا.
ادخلي هنا عشان تعرفي 3 وصفات لحلويات بدون فرن سهلة وسريعة
مقادير التشيز كيك بالشوكولاتة
- 350 جم جبنة كريمي (في حرارة الغرفة)
- 250 جم كريمة خفق
- 200 جم شوكولاتة (غامقة أو بالحليب حسب رغبتك)
- 1 باكيت كريم شانتيه بودرة
- 1/2 كوب سكر أبيض ناعم
- 1 معلقة كبيرة خلاصة فانيليا
لقاعدة البسكوت
- 350 جم من بسكوت الشوكولاتة (أو بسكوت القمح)
- 100 جم زبدة
اقتراحات للتزيين (اختاري منها إللي يناسبك)
- كريمة مخفوقة
- بندق محمص مجروش
- نوتيلا
- صوص شوكولاتة
- شوكولاتة مبشورة
- بسكوت شوكولاتة مجروش
- فواكه مشكلة
طريقة عمل تشيز كيك بارد بالشوكولاتة
- لتحضير قاعدة الشيز كيك، اطحني البسكوت في محضرة الطعام لحد ما يكون ناعم تمامً، ضيفي الزبدة الدايبة واخلطي لحد ما يبقي قوام البسكوت زي الرمل المندي.
- اكبسي البسكوت في صينية الشيز كيك، ودخليها التلاجة لحد ما تحضري الشيز كيك.
- ذوّبي الشكولاتة على حمام مائي أو في الميكروويف وقلبي باستمرار لحد تمام الذوبان.
- في بولة كبيرة، اخفقي الجبنة الكريمية والسكر لحد ما يبقى القوام هش وخفيف.
- ضيفي الفانيليا وكريمة الخفق، والكريمة البودرة واستمري في الخفق لحين الوصول لقوام هش ومتجانس.
- ضيفي الشوكولاتة الذايبة، واستمري في الخفق، لحد ما تتجانس الشوكولاتة مع باقي المكونات.
- صبي المزيج فوق قاعدة البسكوت قي صينية الشيز كيك، وغطيها بالبلاستيك الشفاف ودخليها التلاجة لمدة ليلة كاملة أو 4 ساعات على الأقل.
- قدمي الشيز كيك وزينيها بطريقتك من الإقتراحات السابقة.
لو بتحبي الحلويات الشرقية، ادخلي على اللينك ده عشان تعرفي طريقة عمل بلح الشام
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك