مين فينا ما سرقتش واحدة تشيكن ناجتس من الهابي ميل بتاعة ولادها، وعيونها لمعت لما الولاد قالوا مش جعانين يا ماما، وأخدت الناجتس وفتحت الكاتشب وفضلت تاكل وواحدة تجر واحدة لحد العلبة ما خلصت. مش عارفة ليه الناجتس مرتبطة بالأطفال ووجباتهم كإنهم احتكروها ليهم، طب على فكرة بقى احنا كمان بنحب التشيكن ناجتس، ومن حقنا ناكلها زي ولادنا بالظبط آه والله!
مش محتاجة أتكلم كتير عن تشيكن ناجتس ماكدونالدز، وطعمها المميز جدًا اللي كل الأطفال بتعشقه، طيب إيه رأيك لو تحضريها في البيت بمكونات متوفرة وطريقة سهلة وبسيطة والطعم قريب جدًا للي بنشتريها من بره. السر كله في التغطية الخارجية للناجتس وفي إنك تريحي الناجتس في التلاجة أو الفريزر لمدة كافية قبل القلي. كل دي عوامل هتخليها تنجح معاكي.
أسهل طريقة عمل تشيكن ناجتس زي ماكدونالدز
المقادير
لتتبيلة الفراخ
- 3 صدور دجاج مخلية
- 1 ورك دجاج مخلي
- 1/2 معلقة صغيرة ملح
- 1 معلقة صغيرة فلفل أبيض
- 1/2 معلقة بودرة بصل
- 1/2 معلقة بودرة توم
- 1/2 معلقة صغيرة مرقة الدجاج الفورية (متوفرة في السوبرماركت أو عند العطار)
- 1/8 معلقة صغيرة بيكاربونات الصودا
لتغطية الناجتس
خليط البيض
- 1 بيضة
- 1/2 كوب ماء بارد
- 1/4 معلقة مرقة الدجاج الفورية
- 1/4 معلقة فلفل أبيض
خليط الدقيق
- 3/4 كوب دقيق أبيض
- 1 معلقة كبيرة نشا
- 1 ملقة كبيرة دقيق ذرة أصفر
- 1/2 معلقة صغيرة بيكاربونات الصودا
- 1 معلقة صغيرة بودرة توم
- 1 معلقة صغيرة بودرة بصل
- 1 معلقة صغيرة مرقة الدجاج الفورية
- 1/2 معلقة صغيرة فلفل أبيض
- زيت نباتي للقلي
دليلك لعمل أشهر تتبيلات اللحوم والفراخ والأسماك
طريقة عمل التشيكن ناجتس
- في محضرة الطعام، قومي بفرم الفراخ المخلية: الصدور والوراك اللي بتدي طراوة للناجتس.
- في بولة، اخلطي الفراخ المفرومة مع كل مكونات التتبيلة وبللي إيدك بمسحة من الزيت النباتي وشكلي الناجتس للأشكال اللي تحبيها، وخلي سمكها رفيع عشان مع القلي بتنفخ نسبيًا.
- دخلي الناجتس الفريزر لمدة ساعة قبل ما تبدأي عملية التغطية.
- في بولة، اخلطي كل مكونات خليط البيض مع بعض باستخدام شوكة.
- في بولة تانية، اخلطي مكونات التغطية باستخدام مضرب سلك.
- ابدأي عملية التغطية: حطي الناجتس في الدقيق، وبعدين مزيج البيض، وبعدين في مزيج الدقيق مرة تانية.
- دخلّي الناجتس التلاجة تاني ترتاح لمدة ساعة أو الفريزر لمدة 30 دقيقة.
- في المرحلة دي، تقدري تحفظي الناجتس في الفريزر لمدة 3 شهور وتحمري منها وقت ما تحبي.
- حمري الناجتس في زيت نباتي غزير. ارجعي اقليها قلية تانية لمدة 5 دقايق كمان عشان تقرمش أكتر وتستوي من جوه تمامًا.
- قدميها مع البطاطس المحمرة والكاتشب.
التعليق باستخدام حساب فيس بوك