مفيش حاجة أحلى من فكرة لعبة جديدة للولاد يتبسطوا بيها والأحلى كمان إنهم يتلهوا ويقعدوا يلعبوا بيها وقت طويل من غير خناق ولا زهق.. مؤخرًا في جروب راحة بالي، أم جميلة نشرت لعبة الرمل في البيت وقد إيه اللعبة عجبت ولادها جدًا وابتدت أمهات كتير تعمل رمل في البيت واللعبة فعلًا خلت الولاد يتبسطوا وما يزهقوش.. لعبة الرمل من الألعاب الحسية اللي بتنمي حركة الأيد عند الأطفال وتقوي عضلات إيديهم ده غير الوقت الممتع اللي بيقضوه وهم بيلعبوا.. استمتعي ببعض الهدوء والروقان وخلصي شغل البيت اللي وراكي بعد ما هنقول لك على طريقة عمل رمل في البيت للأطفال.
طريقة عمل الرمل الصحي
المكونات:
- ٣ أكواب من الدقيق
- نص كوب من الزيت
طريقة عمل الرمل الصحي:
في وعاء كبير، هتخلطي الدقيق مع الزيت وتفركي جامد لحد ما ياخد شكل وقوام الرمل.
اعملي بنفسك: ألوان للرسم على وجه الأطفال بطرق آمنة
طريقة عمل الـMoon Sand (الرمل القمري للأطفال)
المكونات:
- ٤ أكواب من الدقيق
- نص كوب من الBaby Oil
طريقة عمل الـMoon Sand:
في وعاء كبير، هتخلطي المكونين مع بعض وتفركي كويس لحد ما ياخد شكل الرمل.
ملحوظة هامة: الرمل القمري غير صالح للأكل فخلي بالك لما ولادك يلعبوا بيه لازم يكون تحت إشراف الكبار.
اعملي بنفسك: صلصال لولادك في البيت
طريقة عمل الرمل القابل للأكل
المكونات:
٢ كوب بسكويت شوفان أو كوب من رقائق الذرة (الكورن فليكس) الصحية والمناسبة لسن الطفل.
طريقة عمل الرمل القابل للأكل:
هتحطي البسكويت أو الرقائق الصحية في الكبة وتضربيهم كويس لحد ما توصلي لقوام الرمل.
نصائح مهمة:
- بالرغم من إن المكونات المستخدمة صحية، لكن خلي بالك ما ينفعش إن ابنك / بنتك ياكلوا منها كميات كبيرة.
- افرشي تحت الولاد مفرش قابل للرمي عشان الرمل بيسبب فوضى كبيرة جدًا وعشان تقدري تنضفي بسهولة.
- خلي الولاد يلعبوا بلعبة الرمل تحت إشرافك أو إشراف أي شخص كبير عشان ما ياكلوش كميات كبيرة منها ولو ابنك / بنتك سنهم صغير، خلي بالك من اللعبة دي عشان خطر الاختناق لا قدر الله.
- ممكن تستخدمي ألوان الطعام الصحية لو عايزة الرمل يكون ليه ألوان مختلفة.
التعليق باستخدام حساب فيس بوك