ستربس الدجاج أو أصابع الفراخ المقلية المقرمشة من الأكلات اللي كلنا بنحبها، ولها شعبية كبيرة جدًا خصوصًا بين الأطفال. سواء هنعتبرها نوع من أنواع المقبلات، أو النقنقة بين الوجبات أو حتى طبق رئيسي جنب بطاطس بيوريه أو بطاطس مقلية أو حتى مكرونة، ودي بتبقى الوجبة المفرحة لأي طفل جعان. دجاج ستربس بتعتبر من الوصفات السهلة جدًا في تحضيرها وتقدري كمان تحفظيها في الفريزر لوقت الأزمات.
والنهارده، جيبنا لك طريقتين لتحضير تشيكن ستربس تقدري تختاري منهم اللي يعجبك، وتقدميها لأولادك بطريقتك المميزة، أو تحطيها في اللانش بوكس مع الكاتشب وأصابع الخضراوات لوجبة متوازنة.
ستربس الدجاج المقرمشة بالعجينة السائلة
المصدر gourmandize
المقادير
- 500 جم صدور فراخ مقطعة شرايح
لتتبيل الفراخ
- 1 معلقة صغيرة بابريكا
- 1معلقة صغيرة بودرة توم
- 1 معلقة صغيرة بودرة بصل
- 1 معلقة صغيرة أعشاب إيطالية
لتغطية الفراخ
عجينة التغطية
- 1 بيضة
- 1/2 كوب لبن رايب
- 3/4 كوب دقيق
- ملح وفلفل
- 1/2 معلقة صغيرة بابريكا
- 1/2 معلقة صغيرة بودرة بصل
- 1/2 معلقة صغيرة بودرة توم
للتغطية
- 3/4 كوب دقيق
- 1/2 معلقة بيكينج بودر
- 1 معلقة كبيرة نشا
- 1 معلقة صغيرة بابريكا
- 1معلقة صغيرة بودرة توم
- 1 معلقة صغيرة بودرة بصل
- 1 معلقة صغيرة أعشاب إيطالية
الطريقة
- في بولة كبيرة، تبلي الفراخ بالبهارات كلها وسيبيها تتبل لمدة ساعة على الأقل.
- حضري مكونات العجينة، اخلطيها بالمضرب السلك، لحد ما توصلي لقوام يمسك كويس على الفراخ ويغطيها.
- اخلطي مكونات التغطية: الدقيق، النشا، البيكينج باودر، والبهارات وقلبيهم بالمضرب السلك.
- دلوقتي عندك بولتين: بولة فيها العجينة، وبولة فيها خليط الدقيق، حطي طاسة على النار فيها زيت غزير وسخني الزيت لحد ما يوصل لدرجة حرارة 180 درجة مئوية.
- ابدأي بتغطية الفراخ، كل شريحة في العجينة، وصفّيها كويس، وبعدين في الدقيق، ونفضيها من أي زيادات وحمريها في الزيت لحد ما توصلي للون دهبي جميل.
- لو حسيتي إن الزيت سخن زيادة عن اللازم، هدي النار وخليها متوسطة عشان الفراخ تستوي كويس من جوه.
- صفي الستربس على شبكة تحتها ورق مطبخ عشان تحافظي على القرمشة وقدميها.
خمس أفكار لطهي صدور الفراخ المخلية
ستربس الدجاج المخبوزة بالكورن فليكس
المصدر natalieshealth
المقادير
- 400 جرام صدور الدجاج مقطعة شرائح
- 2 ونص كوب كورن فليكس مجروش
- 1/2 كوب دقيق
- 2 معلقة صغيرة بودرة التوم
- 2 معلقة صغيرة بابريكا
- 1/2 معلقة صغيرة شطة بودرة
- 2 بيضة
الطريقة
- هتحتاجي لتلت بولات: بولة هتكسري فيها البيض وتضربيه مع الملح والفلفل، والتانية هتحطي فيها الدقيق وتتبليه بالملح والفلفل، والتالتة هتحطي فيها الكورن فليكس مع باقي البهارات.
- تبلي شرايح الفراخ بكمية وفيرة من الملح والفلفل، وتقدري تضيفي أي توابل أو أعشاب تانية تحبيها.
- غمسي شرايح الفراخ في البيض، وبعدين الدقيق، وبعدين الكورن فليكس واضغطي عليها كويس عشان التغليف يغطيها كويس.
- سخني الفرن لحرارة 200 ورصي الفراخ على صينية فرن مبطنة بورق الزبدة، واخبزيها في الفرن السخن لمدة 20-25 دقيقة لحد ما تحمر وتاخد لون دهبي.
- قدميها سخنة مع المستردة بالعسل.
What’s your Reaction?
التعليق باستخدام حساب فيس بوك