أيام قليلة تفصلنا عن عيد شم النسيم 2020 .. لو ما بتحبيش الفسيخ، يبقى أكيد ليكي في الرنجة. عادةً أغلب اللي ما لهمش في الفسيخ لأي سبب من الأسباب، شم النسيم بتاعهم بيبقى عبارة عن رنجة بمختلف أشكالها. فكل الستات بتبتكر أفكار ل طريقة عمل سلطة الرنجة ، لأن بصراحة الرنجة دي معشوقة كتير من الناس بطعمها المدخن اللذيذ وخصوصًا لما تتاكل مع مشتملاتها من البصل الأخضر والليمون ورغيف العيش البلدي السخن وتبقى الجريمة الكاملة. ناس كتير بتواجه مشكلة مع أكلات شم النسيم منها الرنجة والفسيخ وهي إنها بتكون مملحة جدًا ومن هنا جات فكرة إضافة الطحينة للأسماك المملحة مع تشكيلة من الخضروات عشان نتغلب على المشكلة دي، هناكل يعني هناكل!
كل سنة في سفرة شم النسيم باحاول أبتكر وصفة جديدة للرنجة من باب التنوع والتغيير، لكن سلطة الرنجة بالطحينة بتكون دايمًا من الأطباق الأساسية على السفرة، شكلها لذيذ ومبهج والأهم من كل ده إن لقمة واحدة منها بيكون فيها مزيج من نكهات كتير متناسقة مع بعض.
قبل ما نبدأ، ممكن تقري نصايح هتفيدك وانتي بتشتري الرنجة والفسيخ.
ولكل عشاق الرنجة اللي ما لهمش في الفسيخ، النهارده جيبنا لكم طريقة عمل سلطة الرنجة بالطحينة عشان تستمتعوا انتو كمان وتلاقوا اللي يناسب ذوقكم على سفرة شم النسيم. والأهم من الأكلة الحلوة، الصحبة الحلوة، والإيدين اللي تعبت وعملتها بحب، كل شم نسيم وانتم طيبين.
مقادير سلطة الرنجة بالطحينة
- 2 سمكة رنجة مخلية ومقطعة مكعبات
- 2 ثمرة فلفل أخضر مقطعة مكعبات
- 2 ثمرة طماطم مقطعة مكعبات
- 1 ثمرة بصل أحمر مقطعة شرايح
- 1 معلقة صغيرة هريسة (اختياري)
- 1 معلقة صغيرة كمون
- 1 معلقة صغيرة بابريكا
- 1/2 معلقة فلفل أسود
- 3 معالق كبيرة زيت نباتي
- 2 معلقة كبيرة خل
- عصير ليمون
- أوراق خس للتقديم
طريقة عمل سلطة الرنجة بالطحينة
- اخلطي الطحينة مع الخل والزيت وعصير الليمون والبهارات في بولة لحد ما يمتزجوا كويس.
- اخلطي مكعبات الرنجة مع الخضراوات وضيفي عليهم مزيج الطحينة وقلبيهم مع بعض كويس.
- قدمي السلطة فوق أوراق الخس وقدمي معاها شرايح الليمون.
ملحوظة
تقدري تعملي نفس الوصفة دي بس تضربي كل المكونات في الخلاط أو الكبة وتكون زي المعجون أو تغميسة لذيذة وتقدميها مع شرايح من العيش اللبناني المحمص أو المقلي كنوع من أنواع التغيير.
لو إنتي حامل .. اعرفي هنا لماذا يجب ألا تتناول الحامل الفسيخ؟
التعليق باستخدام حساب فيس بوك