سلطة السيزر، أو سلطة القيصر، سيزر سلاد بيقولوا إللي اخترعها شيف إيطالي مولود في المكسيك، يعني أصول السلطة دي من إيطاليا بلد الأكل البسيط اللذيذ. مكونات سلطة السيزر مكونات بسيطة جدًا، وأهم مميزاتها إنك تقدري تحضري أكتر من خطوة تحضير مسبق، وده هيساعدك جدًا بعد كده. يعني مثلًا صوص السيزر تقدري تحضّري منه كمية وتحفظيه في برطمان زجاجي في التلاجة لمدة 5 أيام، كمان الكروتون أو مكعبات الخبز المحمص برضه تقدري تجهزيها وتحفظيها في برطمان أو علبة محكمة الغلق على رخامة المطبخ، بحيث وقت ما تحبي تاكلي سيزر سلاد تبقى أغلب المكونات جاهزة عندك. تعالوا نعرف سوى طريقة عمل سلطة سيزر بالدجاج إللي دايما نطلبها في المطاعم، وكمان هنجهز صوص السيزر بطريقة صحية قليلة الدسم.
طريقة عمل سيزر سلاد – المصدر: joyfulhealthyeats
مقادير صوص السيزر (اللايت-قليل الدسم)
- 1/2 كوب مايونيز لايت (قليل الدسم)
- 1/2 كوب زبادي يوناني أو لبنة
- 2 معلقة صغيرة مستردة ديجون (أو أي نوع مستردة متوفر)
- 2 شريحة أنشوجة معلبة
- 1/4 كوب جبنة بارميزان
- 1 معلقة كبيرة عصير ليمون
- 1 فص توم مهروس
- ملح وفلفل أسود
مقادير الكروتون (مكعبات الخبز المحمص)
طريقة عمل سلطة سيزر بالدجاج – المصدر: simplejoy
- 5 شرايح من التوست الأبيض (ممكن تستخدمي أي بواقي خبز عندك)
- 1 معلقة كبيرة زيت زيتون
- ملح وفلفل
- 1/4 معلقة صغيرة من بودرة التوم
مقادير صدور الدجاج المشوي لـ سيزر سلاد
- 2 صدر فرخة بدون جلد أو عظم
- ملح وفلفل أسود
- عصير نص ليمونة
- 2 معلقة كبيرة زيت زيتون
- 1 معلقة صغيرة زعتر ناشف
- 1 معلقة صغيرة بودرة التوم
مقادير سلطة السيزر
- أوراق خس بلدي (لو غير متوفر استخدمي أي نوع خس تحبيه أو خليط من أكتر من نوع)
- شرايح صدور الدجاج المشوية
- شرايح جبنة البارميزان
- كمية مناسبة من دريسينج السيزر
طريقة عمل سلطة سيزر بالدجاج
- لتحضير الكروتون (الخبز المحمص): قطعي شرايح التوست لمكعبات صغيرة بعد التخلص من حواف التوست، واخلطيها مع الملح والفلفل وزيت الزيتون وبودرة التوم وقلبيها كويس.
- رصي مكعبات التوست في صينية للفرن وحمصيها في شواية الفرن فقط مع التقليب لحد ما توصل للون ذهبي، سيبيها تبرد تمامًا واحفظيها في علبة محكمة الغلق لوقت التقديم.
- في محضرة الطعام، اخلطي كل مكونات الدريسينج مع بعض واحفظيه في برطمان زجاجي في التلاجة لحد وقت التقديم.
- اخلطي كل مكونات التتبيلة وتبلي بها صدور الدجاج، يفضل تتبليها لمدة ساعتين على الأقل قبل الطهي.
- بعد مرور ساعتين على تتبيل الدجاج، قومي بشويه في شواية أو طاسة ساخنة جدًا (مش هتحتاجي تدهني الطاسة أي مادة دهنية لإن التتبيلة فيها زيت زيتون)
- سيبي الفراخ تاخد لون وعلامات الشوي من الجهتين، وخليها ترتاح في طبق جانبي، وتبرد تمامًا قبل تقطيعها.
- لتقديم السلطة: في بولة اخلطي معلقة كبيرة من الدريسينج مع ورق الخس وقلبيهم كويس مع بعض، رصي الخس في طبق التقديم وفوقه صدور الدجاج مقطعة شرايح، وزعي شرايح الجبنة البارميزان ومكعبات التوست المحمص على الوجه، وأخيرًا وزعي معلقة كبيرة من الدريسينج فوق كل المكونات وقدميها.
التعليق باستخدام حساب فيس بوك