شاورما اللحم واحدة من أكتر أكلات الشارع المحببة لقلبي، وكتير كنت باحاول أعملها في البيت وكانت بتفشل مني وما بتطلعش زي بتاعة المطاعم اللي بناكلها بره. حيرتني كتير وكنت بافتكر إن السر في التتبيلة، التتبيلة طبعًا بتفرق، لكن كنت دايمًا باحس إن فيه حاجة ناقصة ومختلفة عن المحلات. وبعد محاولات مريرة لظبط الشاورما، اكتشفت إن السر في استخدام الدهون مع اللحمة. ياللعجب! كنت دايمًا باستخدم لحمة حمرا ما فيهاش دهون، فكانت بتطلع ناشفة ومش طرية كده زي المحلات، فمن الآخر لازم نستعمل لحمة فيها نسبة دهون أو نضيف معاها شوية من الدهن وخصوصًا بقى لو كانت دهون ضاني لإن دي اللي بتدي الطعم الأقرب لشاورما المحلات.
قاعدة عامة في طبخ اللحوم: الدهون مع الطهي بتبدأ تدوب وتدي طراوة للحمة وطعم لذيذ.
والنهارده أنا جيبت لكم الخلاصة عشان تعرفوا تعملوا شاورما اللحم في البيت بأقرب طعم للمطاعم، وده لإن طريقة طبخها في المطعم على السيخ اللي بيلف ويواجه النار الحامية جدًا والمباشرة بيخليها تختلف غصب عننا عن البيت لما بنطبخها في طاسة على البوتجاز.
مقادير شاورما اللحمة
- 1/2 كيلو لحمة كندوز من وش الفخدة، مقطعة شرايح رفيعة
- 1/4 كيلو دهون كندوز أو ضاني مقطعة قطع صغيرة
- 1 بصلة متوسطة مقطعة شرائح
- 1 معلقة كبيرة خل أبيض
- 1 معلقة كبيرة عصير ليمون
- 3 معلقة كبيرة زيت نباتي
تتبيلة شاورما اللحم
- 1 معلقة صغيرة سبع بهارات
- 1 معلقة صغيرة بابريكا
- 1/2 معلقة صغيرة قرفة
- 1 معلقة صغيرة بودرة توم
- 1 معلقة كبيرة دبس رمان
- ملح وفلفل أسود
- 1/2 كوب بقدونس مفروم
- 1/2 معلقة صغيرة سماق
- ثمرة طماطم مقطعة مكعبات صغيرة
للتقديم
- سلطة طحينة
- عيش لبناني أو سوري
- أي نوع من المخللات
طريقة عمل شاورما اللحم
- اخلطي كل مكونات التتبيلة: البهارات والخل والزيت وعصير الليمون ودبس الرمان، وتبلي شرايح اللحمة مع الدهون وسيبيها في التتبيلة ليلة كاملة عشان توصلي لأفضل نتيجة.
- في طاسة أو شواية سخنة جدًا، شوّحي شرايح اللحمة وقطع الدهون على دفعات عشان ما تنزلش مياتها وتتحمر وتاخد لون دهبي.
- اخلطي شرايح البصل مع السماق ورشة من الملح والفلفل الأسود وضيفي عليهم الطماطم والبقدونس وضيفيهم للحمة بعد ما تستوي واخلطيهم على البارد.
- افردي الطحينة على العيش وضيفي المخلل والشاورما لعمل ألذ ساندويتش شاورما.
وبكده تقدري تعملي أحلى شاورما لحم، طرية ومتبلة ولذيذة وأحلى من المحلات كمان ولا كأنها نازلة من على سيخ الشاورما.
التعليق باستخدام حساب فيس بوك