الشوربات من أحلى الأطباق اللي بتفتح الشهية في بداية الأكل وبتدفّي المعدة وبتكون بداية سعيدة للوجبة وخصوصًا على الفطار في رمضان. وبعد مرور أول أسبوع من رمضان، بنكون زهقنا من اللحوم والفراخ وعايزين نكسر الروتين شوية بوجبة بحرية لطيفة، وأحسن بداية ليها هتكون في صورة طبق شوربة سي فوود مع الكرفس اللي بيليق جدًا معاها وبيديها طعم وريحة جميلة. السر اللي يخليكي تعملي أحلى شوربة سي فوود هو إنك تحضري مرقة من قشر ورؤوس الجمبري مع الخضروات زي الكرفس والجزر والمطيّبات المختلفة بطريقة مظبوطة، ودي هتديلك نكهة بحرية مميزة جدًا لشوربتك. ده غير إن درجة تسوية السي فوود عامل مهم جدًا لنجاح الشوربة يعني لازم ما يكونش مستوي زيادة عشان قوامه يبقى حلو وما يتحولش لقطع من الكاوتش. ودلوقتي هنقول لك على طريقة عمل شوربة السي فوود بالكرفس بكل تفاصيلها، تقدري تستخدمي أي نوع تحبيه ومتوفر عندك من المأكولات البحرية احنا بس بنديكي اقتراحتنا.
مقادير شوربة السي فوود بالكرفس
لعمل المرقة
- قشر ورؤوس الجمبري (لـ1/2 كيلو من الجمبري)
- زبدة
- 1 لتر مرقة خضراوات
- بصلة متوسطة الحجم
- ¼ كوب كرفس مقطع
- 1 ثمرة جزر صغيرة
- 3 فصوص توم
- أعواد كزبرة خضرا بدون الورق
- 3 فصوص حبهان
- 2 ورق لورا
مقادير الشوربة
- ¼ ك جمبري متوسط أو صغير الحجم
- 6 حبات بلح البحر
- 2 حبة كابوريا
- 1 معلقة كبيرة دقيق أبيض
- 1 معلقة كبيرة زبدة
- مرقة الجمبري
- ½ كوب كريمة أو لبن كامل الدسم
- أوراق كرفس مفرومة
- 2 حبة مستكة
- ¼ معلقة صغيرة جوزة الطيب
- ½ معلقة صغيرة بودرة توم
- ملح وفلفل أبيض
- عصير ليمون
- أوراق بقدونس وكرفس للتزيين
طريقة عمل شوربة السي فوود بالكرفس
لعمل مرقة الجمبري
- في حتة زبدة، شوّحي قشر الجمبري مع الخضروات واللورا والحبهان لحد ما تظهر ريحتهم.
- هتضيفي عليهم مرقة الخضراوات وتسيبيهم يغلوا لمدة لا تقل عن نص ساعة، عشان تستخلصي كل الطعم من قشر الجمبري والخضار.
- هتصفّي المرقة في المصفاة وتحتفظي بيها لباقي الوصفة.
طريقة عمل شوربة السي فوود بالكرفس
- في معلقة كبيرة من الزبدة، شوّحي المستكة على نار هادية لحد ما تدوب تمامًا.
- هتضيفي الدقيق وتقلبيه على نار هادية لحد ما يستوي وتتغير ريحته، وبعدين تضيفي مرقة الجمبري وتكون في حرارة الغرفة وتقلّبي كويس بمضرب سلك.
- هتسيبي الشوربة على نار هادية لحد ما يتقل قوامها شوية مش هيتقل قوي عشان نسبة الدقيق مش كبيرة، هتضيفي السي فوود المغسول ومتصفي كويس جدًا: الكابوريا، بعدها بلح البحر، وأخيرًا الجمبري لأنه ما بيحتاجش غير مدة بسيطة جدًا للتسوية.
- هتضيفي أوراق الكرفس والتوابل: جوزة الطيب، بودرة التوم، والملح، والفلفل الأبيض.
- هتضيفي الكريمة أو اللبن وعصرة ليمون بسيطة جدًا.
- قدّمي الشوربة مع تزيينها بالبقدونس وأوراق الكرفس والليمون.
التعليق باستخدام حساب فيس بوك