شوربة الطماطم واحدة من أطعم وألذ الشوربات، إللي كمان مليانة بالفوايد الصحية، وده لإن الطماطم مليانة بالعناصر الغذائية المهمة جدًا لصحتنا. الطماطم غنية جدًا بفيتامين سي، والبوتاسيوم ومضادات الأكسدة، ولها فوايد كتير جدًا لصحة القلب والوقاية من الأمراض السرطانية وتقوية المناعة وفوايد تانية كتير. عشان كده، النهارده، هنقدم لك وصفة شوربة الطماطم بالكريمة، مع مجموعة بهارات لذيذة هتنكّه الشوربة وتديها طعم جديد. كمان إضافة الكريمة لشوربة الطماطم بتظبط طعمها جدًا، وبتعمل توازن مع الحموضة الموجودة في الطماطم، ده غير النكهة والطعم الكريمي اللذيذ.
مقادير شوربة الطماطم الكريمي
- 5 حبات طماطم مقطعة أرباع
- 1 حبة جزر مكعبات
- 1 بصلة كبيرة مكعبات
- 2 فص توم شرايح
- 1 عود كرفس مفروم
- 1 معلقة كبيرة صلصة طماطم
- 1 عود قرفة
- 2 حبه قرنفل
- 2 فص حبهان
- 1 ورقة لورا
- 1 معلقة صغيرة سكر
- ملح وفلفل
- 1 لتر مرقة دجاج أو خضراوات
- 1 كوب كريمة طهي
طريقة عمل شوربة الطماطم الكريمي
- في حلة على النار، ضيفي زيت الزيتون، وضيفي كل الخضراوات ما عدا الطماطم وشوحيها كويس على نار متوسطة لحد ما يطرى قوامها بدون ما تكتسب أي لون.
- ضيفي البهارات السليمة مع الخضار وشوحيهم كويس لمدة دقيقتين لحد ما تطلع ريحتهم وتملى البيت.
- ضيفي الطماطم، والصلصة وشوحي كل المكونات كويس مع بعض، قبل ما تضيفي المرقة لحد ما تغطي المكونات كلها.
- سيبي الشوربة تغلي، بعدها وطي النار وغطي الشوربة، وسيبيها تستوي على نار هادية.
- بعد ما تتأكدي من تمام تسوية الخضراوات، شيلي البهارات السليمة من الشوربة، واضربيها في الخلاط أو بالمضرب اليدوي لحد ما تنعم تمامًا.
- صفّي الشوربة في مصفاة واسعة، ورجعيها تاني للحلة وسخنيها.
- في المرحلة دي، ضيفي الملح والفلفل، ومعلقة السكر ودوقي نكهة الشوربة واتأكدي من تظبيط الطعم.
- أخيرًا، ضيفي الكريمة للشوربة واطفي النار، قدمي الشوربة ساخنة مع مكعبات الخبز المحمص.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
What’s your Reaction?
التعليق باستخدام حساب فيس بوك