غنوا له زمان في أفلام الأبيض والأسود، يعتبر السلاح إللي بتشهره أي أم مصرية أصيلة في وش برد الشتاء وأيامه الممطرة، لكل عيلة في مصر سِلو وطريقة مختلفة في أكله وتقديمه على سفرتها، عملنا منه شوربة وغموس وكمان فتة، إنه العدس يا جماعة! شوربة العدس المصرية من أعظم الشوربات اللذيذة المغذية، إللي لها مفعول السحر في إنها تدفّي معدتك وتدفّي قلبك في نفس ذات الوقت، وهي واحدة من الشوربات البيتي قوي، يعني صعب تلاقي مطعم أو مكان بيقدمها بنفس حلاوة وجمال شوربة العدس البيتي.
الغريب بقى إن أحلى الأكلات في الدنيا دايمًا بتكون بسيطة وطريقة تحضيرها سهلة ومش معقدة، لكن المكونات الطازة المتناغمة مع بعضها هي إللي بتخليها عظيمة. النهارده، هنقدم لكم طريقة عمل شوربة العدس، قدّميها مع العيش المحمص والبصل الأخضر وطماطم مخللة بالدقة كوجبة غداء حرشة نرتاح فيها شوية من اللحوم وخلافه، أو اعتبريها عشوة حلوة في يوم شتوي متكتك من الساقعة، أو حتى خديها تسلية بين الوجبات، في كل الأحوال والأشكال شوربة العدس الأصفر طبق جبار.
مقادير شوربة العدس الأصفر:
- 2 كوب عدس أصفر (مغسول ومتصفي)
- 1 جزرة كبيرة مقطعة مكعبات
- 1 بصلة كبيرة مقطعة مكعبات
- 1 حبة طماطم كبيرة
- 3 فصوص توم سليمة
- 2 معلقة كبيرة زيت نباتي
- مرقة خضار أو ماء حسب الحاجة
- ملح وفلفل أسود
- 2 معلقة صغيرة كمون
- 2 فص مستكة
لعمل طشة الكزبرة والتوم:
- 2 معلقة كبيرة زبدة
- 1 معلقة كبيرة توم مفروم
- 1 معلقة كبيرة كزبرة ناشفة
هنا ممكن تعرفي طريقة عمل الكشري المصري على أصوله
طريقة عمل شوربة العدس الأصفر
- في حلة عميقة على النار، ضيفي الزيت النباتي وسيّحي فصوص المستكة، ضيفي بعد كده كل الخضروات وعلى نار متوسطة، شوحيها بدون ما تكتسب أي لون، محتاجينها فقط تطرى وتذبل شوية.
- ضيفي العدس المغسول المتصفي فوق الخضروات وشوحيه معاهم كويس.
- غطي كل المكونات بكمية مناسبة من مرقة الخضار، أو الماء، بحيث تغطي سطح المكونات تمامًا، غطي الحلة وعلى نار هادية، سيبي العدس والخضار لحد تمام السوا.
- بعد ما تتأكدي إن العدس وكل الخضروات استوت تمامًا، بالمضرب اليدوي أو في الخلاط، اضربي الشوربة كويس جدًا لحد ما تبقى ناعمة تمامًا وبعدين رجعيها تاني للحلة على النار.
- في المرحلة دي، دوقي الشوربة، وضيفي الملح والفلفل والكمون، ولو احتاجتي تخفّفي القوام تقدري تضيفي كبشة من الشوربة أو الماء لحد ما توصلي للقوام إللي تحبيه.
- لتحضير الطشة: في طاسة على النار سيحي الزبدة وضيفي التوم والكزبرة وحمريهم لحد ما تظهر ريحتهم ويبقى لونهم ذهبي، بعدها ضيفي الطشة مباشرة للعدس واطفي النار.
- قدمي شوربة العدس مع شرايح عيش بلدي متحمص في الفرن، وشرايح من الليمون، والشطة البودرة أو الفلفل الحراق.
لو عايزاه تغيري في وصفات الشوربة جربي طريقة عمل شوربة البصل الفرنسية
التعليق باستخدام حساب فيس بوك