محتويات المقال
الديك الرومي الكامل المخبوز في الفرن من أجمل الأصناف اللي بيوت كتير في مصر بتحب تقدمها في رأس السنة. لكن برضه أمهات وستات كتير بتشوف إنه صعب في إعداده والتعامل معاه، لإن أوزانه بتكون في الأغلب كبيرة، وكمان بيحتاج عزومة كبيرة وعدد كبير من الأشخاص عشان ياكلوه. وبما إن الكورونا لسه مستمرة معانا والتجمعات هتقل نسبيًا وهتقتصر على أعداد محدودة من المقربين.
بنقترح عليكي تجربي السنة دي صدور الرومي المخلية وهنعملها بطريقة الروستو في الفرن. مش محتاجة أقول لك قد إيه هي اقتصادية أكتر، وأسهل وأسرع في إعدادها، وكمان مش هتهدري منها حاجة، وهتكون مناسبة للتجمعات الصغيرة في ليلة رأس السنة. أهم حاجة في الوصفة دي أو الطريقة كلها هي ازاي نخلّي صدر الرومي طري جدًا وما ينشفش في الفرن. وده هنعمله بطريقتين:
طرق تطرية صدر الديك الرومي
الطريقة الأولى: هي محلول النقع لصدر الديك الرومي، واللي مش هتاخد منك ليلة كاملة ولا حاجة، ساعة بالظبط هننقع فيها صدر الديك الرومي وهو مكون من مياه وملح وسكر وشوية منكهات بسيطة. الطريقة دي هتخلّي لحم الرومي أطرى ومتبل بشكل مظبوط.
الطريقة التانية: إننا هنشويه مع تتبيلة الزبدة من مكوناتها الأساسية. والزبدة مش بس بتدي طعم، لكن بتحافظ على طراوة الصدور جوه الفرن، خصوصًا لما بنقوم أثناء التسوية بدهن الصدر بالعصارة اللي بتنزل منه عشان يفضل طري وجميل.
المقادير
لتحضير محلول النقع، لكل 3 لتر ماء هتضيفي
- 1/2 كوب ملح
- 2 معلقة كبيرة سكر
أما المنكهات
- حبوب الفلفل الأسود
- فصوص حبهان
- ورق لورا
- شرايح برتقان
- شرايح ليمون أضاليا
لتتبيلة صدر الديك الرومي
(وزنه من كيلو ونص لـ2 كيلو بدون عظم، ممكن يكون بالجلد أو بدونه)
- 250 جرام زبدة طرية
- 1 معلقة كبيرة مستردة
- 2 معلقة صغيرة بابريكا
- 1 معلقة كبيرة بودرة بصل
- 1 معلقة كبيرة بودرة توم
- 2 معلقة صغيرة روزماري مفروم ناعم جدًا
- 1 معلقة صغيرة جوزة الطيب
- بشر 2 برتقالة كبيرة
- 2 معلقة صغيرة بشر ليمون
- ملح وفلفل (يجب مراعاة كمية الملح لإن مع النقع، بيكتسب الرومي نسبة كبيرة من الملح)
أرضية الخضراوات
- بصل
- كرفس
- جزر
- فصوص توم سليمة
- شرايح برتقال
- أعواد من الروزماري
طريقة عمل صدر الديك الرومي الروستو
- في حلة على النار، ضيفي لتر من الماء مع باقي منكهات محلول النقع. وكل كمية الملح والسكر وسيبيهم على النار عشان المياه تاخد نكهة المكونات ويذوب الملح والسكر تمامًا. قبل الوصول للغليان، اطفي النار.
- في بولة حجمها مناسب، ضيفي المياه المنكهة وزوديها 2 لتر مياه ساقعة عشان تساعد في تبريدها بسرعة، سيبي المياه لحد ما تبرد تمامًا، قبل ما تضيفي صدر الديك الرومي استعدادًا لعملية النقع.
- غطي صدر الديك الرومي وسيبيه في التلاجة يتنقع لمدة 3-4 ساعات، ما فيش داعي لنقعه طول الليل.
- ارفعي صدر الرومي من ماء النقع وجففيه كويس بمناديل المطبخ، واخلطي كل مكونات التتبيلة مع بعض وغلفي صدر الرومي كويس جدًا بالتتبيلة، تقدري كمان تربطي الصدر بخيط الجزارة، أو تطلبي من الجزار إنه يربطهولك وتبليه وهو مربوط.
- في صينية فرن واسعة، اخلطي كل الخضراوات والأعشاب وشرايح البرتقال عشان تكون قاعدة تشوي عليها الديك الرومي.
- حطّي الصدر فوق فرشة الخضار ودخليه فرن متسخن على حرارة 200، كل كيلو من صدور الرومي هيحتاج حوالي 30-40 دقيقة تسوية في الفرن.
- سيبي الصدر يرتاح بعد خروجه من الفرن لمدة 15 دقيقة، قبل ما تفكي الرباط وتقطعيه شرايح رفيعة وتقدميه لضيوفك.
التعليق باستخدام حساب فيس بوك