محتويات المقال
فته الشاورما السوري واحدة من أشهر و أطعم الوجبات اللي دخّلتها مطاعم الشاورما السوريه لمصر، ومن كتر حبنا فيها فطلنا بنكون عازين نعرف طريقة عمل فتة شاورما الفراخ في البيت بس تطلع زي المطاعم وده لأسباب كتير أولها إنها وجبة كاملة متكاملة مشبعة وتسد: فيها الرز (النشويات)، شاورما الفراخ (البروتين)، الخضار ( الألياف)، العيش المحمص (نشويات تاني)، والتومية العظيمة اللي بتربط كل المكونات دي سوا. تاني حاجه هي الرز البسمتي الأصفر إلي بيكون مفلفل ومبَهر ولذيذ وكتير مبيعرفوش يعملوه في البيت مظبوط زي المطاعم بس كل ده مش هيمنعنا إن إحنا نعملها بكل مكوناتها في البيت وبأسهل و أسرع طريقة والنتيجة صدقوني هتكون قريبة جدا للي بناكله برة.
عشان كدة النهاردة هقولك على طريقة عمل فتة شاورما الفراخ في البيت بسهولة
مقادير فتة شاورما الفراخ
- 1/2 كيلو صدور أو أوراك الفراخ المخلية
- 1/4 كوب عصير برتقان
- 2 معلقة كبيرة لبن رايب أو زبادي
- 3 معالق كبيرة زيت نباتي
- 2 معلقة صغيرة توم مفروم ناعم جدا
- 1 معلقة كبيرة خل أبيض
- 1 معلقة صغيرة 7 بهارات
- 1/2 معلقة كبابه صيني
- 1/4 معلقة قرنفل مطحون
- 1/4 معلقة حبهان مطحون
- 1/2 معلقة كزبرة ناشفة مطحونة
- ملح و فلفل إسود
لعمل الرز البسمتي
- 2 كوب رز بسمتي مغسول ومتصفي
- 4 أكواب مرقة خضار أو دجاج مغلية
- 1 بصلة صغيرة مفرومة ناعم
- 1 معلقة صغيرة كركم
- 3 حبه حبهان
- 2 ورق لورا
- 1/2 معلقة صغيرة قرفة ناعمة
- زبدة وزيت نباتي
- ملح وفلفل إسود
مقادير صلصة التومية على طريقتي (الشيف أسماء درويش)
- 1/2 كوب مايونيز
- 1/2 كوب زبادي يوناني (أو زبادي عادي متصفي من كل السوايل )
- 3 فصوص توم مفرومين ناعم جدا
- 1/2 ثمرة بطاطس مسلوقة
- 1 معلقة كبيرة خل
- 1 معلقة كبيرة عصير ليمون
- ملح
- زيت نباتي حسب الحاجة
اعرفي هنا طريقة السمبوسك مع الحشوات المختلفة
مقادير أخرى
- عيش لبناني أو عيش صاج مقلي
- بصل أحمر مقطع شرايح مع رشة من السماق
- طماطم مقطعه مكعبات
- بقدونس مفروم ناعم
المصدر : whensuecooks – طريقة عمل فتة شاورما الفراخ
طريقة عمل فتة شاورما الفراخ
- اخلطي كل مقادير التتبيلة وضيفيها لشرايح الفراخ وقلبيها كويس وسيبيها تتبل أقل حاجة ساعتين والأفضل ليلة كاملة.
- اخلطي شرايح البصل الأحمر مع السماق والملح والفلفل وافركيهم بإيدك كويس جدا وسيبيهم على جنب.
- جهزي التومية واخلطي كل مكوناتها ما عدا الزيت في الكبه أو الخلاط الكهربائي لحد متتجانس وبعدين صبي عليها الزيت بالتدريج أثناء الخلط لحد ماقوامها يبقى كريمي ولامع، إحفظيها في التلاجة لحد وقت التقديم.
- لتحضير الرز البسمتي: هتشوحي البصل المفروم في كمية و فيرة من الزبدة والزيت النباتي وتضيفي بعد كدة البهارات كلها وتحمصيها مع البصل لحد بس ما يدبل بدون مايغمق لون البصل، هتضيفي عليه الرز البسمتي المغسول والمتصفي و تشوحيه كويس. هضيفي بعد كدة المرقة المغلية ولما يبدأ يتشرب الرز المرقة وطي النار تماما لحد ما يستوي الرز.
- لتحضير الشاورما في طاسه سخنة جدا: هتشوحي شرايح الفراخ بعد ماتصفيها من التتبيلة لحد ما تاخد لون ذهبي جميل.
- لتجميع طبق الفتة هترصي العيش المقلي وبعدين تغرفي الرز البسمتي وترصي عليه شرايح الشاورما وتزينيها بالبصل الأحمر مع السماء والطماطم والبقدونس المفرومين وآخر لمسة هي التومية وزعي جزء منها على وش الطبق والباقي خليه في طبق صغير على جنب لأي حد يحب تومية زيادة وتتقدم بالهنا والشفا.
ملحوظة
- لو مبتحبيش نكهة البصل بدون تسوية تقدري تديله تشويحة مع الشاورما على النار.
- تقدري بدل التومية تستخدمي صوص من الزبادي و الطحينة مع التوم والليمون والملح والفلفل أو ما يطلق عليه “بدوة”، بس أغلب المحلات السورية بتقدم الفتة مع التومية.
التعليق باستخدام حساب فيس بوك