فاضل أيام على عيد الأضحى 2022، وفخدة الخروف الضاني حاجة كده ليها شمخة وتقدير في عيد الأضحى، وصنف بتتوارثه الأجيال جيل بعد جيل. حاجة بتتحط على السفرة في العيد تحسي كإنك حاطة درع الدوري في نص السفرة. نيجي بقى لـ طريقة عمل فخدة الخروف في الفرن اللي مفيش أسهل ولا أسرع منها في التحضير.
ممكن تشوفي هنا طريقة عمل الريش الضاني .. 3 وصفات أحلى من بعض
تقريبًا مافيش ثقافة أو حضارة مش مرتبطة بالفخدة الضاني، يعني ما فيش حاجة تتحط جنب الفخدة الضاني إلا وكان النصر للفخدة. علشان كده، وعلى دخلة العيد الكبير في 2022، فالتفكير في اللحمة، ابتدى يسيطر على أعصاب الناس، ولأنه سيطر علينا احنا كمان فهنقول لك على طريقة عمل فخدة الخروف في الفرن.
حلاوة الوصفة دي إن وقت تسويتها وإن كان طويل، لأنه على حسب وزن الفخدة بتاخد وقت في الفرن، إلا إنها مش متعبة، إنتي هتحطيها في الفرن وتسبيها تاخد وتدي مع نفسها لحد ما تخرج مستوية وتدوب في الأكل.
فتعالي نشوف الوصفة اللي جبناها لك النهارده.
طريقة عمل فخدة الخروف بالفرن
مقادير فخدة الخروف
فخذ خروف : 3 كيلو (وزنها من 2.5 إلى 3 كيلو)
تتبيلة فخدة الخروف
- كوبايتين زبادي
- معلقتين خل أبيض
- معلقتين عسل أبيض أو أسود
- معلقة كبيرة زعتر ناشف
- معلقة ملح متوسطة
- معلقة فلفل أسود صغيرة
- معلقة جوزة الطيب صغيرة
- معلقة توم مفروم كبيرة
- معلقة جنزبيل فرش مفروم
- معلقتين زبدة كبار متدوبة، ممكن تستخدمي زيت زيتون بدلها
خضار الشوي لفخدة الخروف
- جزرتين كبار متقطعين شرايح
- عودين كرات كبار متقطعين
- حبتين بصل كبار متقطعين شرايح
- نص راس توم
- لمونتين متقطعين شرايح
- معلقة زعتر ناشف كبيرة
- معلقة روزماري ناشف كبيرة
- كوباية مياه
لكل عشاق الفتة 3 طرق لعمل الفتة .. مين مبيحبش فتة العيد
خطوات عمل فخدة الخروف في الفرن
- بعد ما تنضفي الفخدة كويس بمياة والملح، بطرف سكينة رفيعة عملى فتحات في اللحمة، زي ما بنقول انغزيها بطرف السكينة.
- كل مقادير التتبيلة اللي فوق دي اخلطيهم مع بعض. وبعد كده، افردي التتبيلة دي على الفخدة واتأكدي إن التتبيلة واصلة لكل جوانب الفخدة وفي الفتحات، غطيها كويس وحطيها في التلاجة ليلة كاملة.
- ساعة الشوي غطي قلب الصينية بورق ألومينوم، ورصي فوقيه الخضروات اللي هي الجزر والبصل والكرات. وبعد كده، تبليهم بالتوابل اللي قلنا لك عليها، وممكن تزودي ورق لورا كمان.
- صبي المياه على الخضار. وبعد كده غطي الخضار بورق ألمنيوم تاني واعملي فيه فتحات بالسكينة. وبعد كده، حطي الفخدة عليه.
- دخلي الصنية الفرن مش أقل من تلات ساعات، طبعًا الوقت بيزيد حسب وزن الفخدة، اعملي جنبها رز بسمتي مبهر، أو بطاطس مشوية وبألف هنا.
اشتري أضحية عيد الأضحى ولبس العيد بدون تدمير ميزانية البيت
التعليق باستخدام حساب فيس بوك