واحد من أكتر المشروبات المشهورة والمحبوبة جدًا والمفضلة لكتير مننا في الكافيهات، والحقيقة هو توليفة خطيرة من النكهات: القهوة بمرارتها الخفيفة مع الكراميل المسكر والكريمة المخفوقة إللي بتخلي المشروب ده غني ولذيذ جدًا. كإنك بتاكلي نوع من الحلويات بس في صورة مشروب متلج ومنعش ولذيذ. تحضير الكراميل فرابتشينو في البيت خطواته بسيطة وسهلة، جربي الطريقة دي في تحضيره لعيلتك، أو لضيوفك أو في تجمع مع صاحباتك. صدقيني، هيشكروكي من كل قلبهم وهينبهروا بطعمه، كل إللي هتحتاجيه إن يكون عندك خلاط كهربائي قوي عنده القدرة على جرش مكعبات التلج عشان هو ده إللي هيديكي القوام المظبوط للفرابتشينو وأقرب نتيجة لمشروب الكافيهات. ولو ما عندكيش ماكينة تحضير الإسبريسو، تقدري تحضريه باستخدام القهوة سريعة التحضير بس بتركيز عالي شوية عن المعتاد.
مقادير فرابتشينو الكراميل
- 2 شوت إسبريسو (أو نص كوب قهوة سريعة التحضير مركزة)
- 1/2 كوب صوص كراميل جاهز أو محضر في البيت
- 1 كوب مكعبات التلج
- 1/2 كوب لبن كامل الدسم
- 1/4 كوب كريمة خفق
- 1 معلقة صغيرة نكهة الكراميل المركزة (اختياري وتقدري تستبدليها بالفانيليا السايلة)
- رشة ملح بسيطة جدًا
للتقديم
- صوص كراميل
- كريمة مخفوقة للوجه
طريقة عمل فرابتشينو الكراميل
فرابتشينو الكراميل – المصدر finedininglovers
- في الخلاط الكهربائي، ضيفي كل المكونات مع بعض، واخلطيها كويس لحد ما توصلي لقوام تقيل وكريمي، ولو حسيتي إن القوام تقيل زيادة، ضيفي لبن لحد ما يظبط القوام حسب ذوقك.
- في أكواب واسعة وطويلة (زينيها بصوص الكراميل على الحواف الداخلية)، صبي المزيج وزينيه من فوق بالكريمة المخفوقة وقدميه فورًا.
- ملحوظة: لو مش حابه تستخدمي التلج المجروش أو ما عندكيش، تقدري تستبدليه بآيس كريم الفانيليا ويكون متلج جدًا. هيديكي برضه نتيجة هايلة وقوام كريمي لكن نسبة السكر هتكون أعلى شوية.
التعليق باستخدام حساب فيس بوك