عندك تفاح قديم في التلاجة ومغضوب عليه وقرب يكرمش زي وش البوتوكس بعد ما مفعوله يروح؟ كنتي فاكرة إنك بقى هتاكليه مع بيناء بارر (Peanut Butter بس بلهجة بنت ناس شوية D:) أو هتعمليه مع شوفان عشان الدايت وكدزه؟ يتحرق الدايت يا ست الكل وتتحرق فوفا أكتر ما هي محروقة! افتحي التلاجة يا ست الكل وطلعيه واعملي بيه أحلى فطيرة تفاح مع كوباية شاي بلبن تنسيكي أحزان الخريف وفاتورة الكهربا اللي عليت من التكييف.. اقري المقال ده وهنقول لك على وصفة بسيطة خالص مش هتاخد منك وقت لعمل فطيرة التفاح اللذيذة وبلاها سوسو وبلاها الدايت D:
مقادير الفطيرة
- ٤ كوب دقيق
- ١ كوب زبدة درجة حرارة الغرفة
- مياه دافية
- كوب سكر
- معلقة فانيليا
- ٢ معلقة صغيرة بيكينج باودر
طريقة عمل خبز الموز بأنواعه .. القرفة أو بالشوكولاتة
مقادير الحشو
- حوالي عدد 4-5 تفاحة كبيرة الحجم متقطعين قطع صغيرة
- ربع كوب سكر بني
- تلت كوب سكر أبيض
- معلقة كبيرة نشا
- معلقة كبيرة قرفة
- ربع معلقة جوزة الطيب
- ٢ معلقة كبار زبدة
- ذرة ملح
طريقة تحضير الحشو
- اخلطي السكر والتوابل مع بعض كويس
- ضيفي الخليط السابق للتفاح وامزجيهم مع بعض كويس
طريقة تحضير العجينة
- اخلطي كل المكونات مع بعض وضيفي المياه الدافية بالتدريج
- اعجني المكونات مع بعض لحد ما توصلي لقوام متجانس وبعدين اقسمي العجين قطعتين.
- هاتي صينية الفطيرة وادهنيها زبدة
- افردي جزء من العجينة فيها واحرصي إنها تكون متساوية
- ضيفي حشو الفطيرة وافرديها على العجينة
- هاتي الجزء التاني من العجينة وافرديها على الحشو واعملي أشكال بالسكين متساوية على شكل عقارب الساعة أو أي شكل تحبيه
- افتحي الفرن على درجة حرارة ٢٠٠ ودخليها الفرن وسيبيها لمدة ٤٠ دقيقة
- لما تستوي هتاخد لون دهبي وسيبيها تبرد قبل التقطيع وبألف هنا وشفا
قدميها مع صوص الكراميل وممكن تضيفي عليها مكسرات البيكان وكمان آيس كريم فانيلا، جربي الوصفة وقولي لنا رأيك في تعليق.
What’s your Reaction?
التعليق باستخدام حساب فيس بوك