كلنا عارفين سالي فؤاد وأكلاتها اللذيذة اللي بتقدمها على برامجها اللي بتتميز كمان إنها خفيفة وصحية. النهارده هنعرض لكم طريقة عمل قالب القرنبيط باللحمة المفرومة على طريقة سالي فؤاد، في برنامج حلو وحادق على CBC سفرة.
أولًا: المكونات:
- قرنبيط
- ربع كيلو لحمة مفرومة
- بصلة مبشورة
- 3 كوبايات عصير طماطم
- ملح
- فلفل أسود
- معلقة صغيرة كمون
- معلقة كبيرة بهارات لحمة
- معلقة كبيرة زيت
للوش (حسب الرغبة)
- بقدونس مفروم
- كوباية جبنة موتزاريلا
ثانيًا: طريقة اللحمة المفرومة:
في الزيت، شوحي البصلة وبعدين حطي عليه اللحمة المفرومة كلها وحطي عليها ملح ورشة كمون وفلفل أسود وبهارات وقلبيها لحد ما يبقى لونها كلها مايل للبني. بعدين ضيفي عصير الطماطم وقلبي اللحمة فيه وسيبيها على نار هادية لحد ما تتسبك.
ثالثًا: القرنبيط:
حطي ميا عليها ملح ورشة كمون تغلي وبعدين حطي فيها القرنبيط واسلقيه نص سلقة. بعد كده انشلي القرنبيط وصفيه.
رابعًا: قالب القرنبيط باللحمة المفرومة
ادهني قالب أو صينية بايركس بالزيت وافرشي عليها وردات القرنبيط المسلوق وبعدين طبقة العصاج. دخليها الفرن على درجة 200 لحد ما تستوي تمامًا.
خامسًا: تزيين الوش والخطوة دي اختيارية
بعد ما تستوي وقبل ما تخرجيها من الفرن، ضيفي للوش جبنة موتزاريلا وسيبيها في حرارة الفرن شوية وهتلاقي الجبنة ساحت على الوش.
دلوقتي تخرجيه وترشي على الوش البقدونس المفروم وتقدميه بالهنا والشفا.
فيه طريقة تانية للقرنبيط باللحمة المفرومة قدمتها سالي فؤاد في برنامجها وهي طريقة الصوص الأبيض اللايت. وده بتحطي فيه القرنبيط واللحمة المفرومة مع الصوص الأبيض (مقاديره هي لتر لبن و3 معالق كبار دقيق أبيض وملح وفلفل ومعلقة صغيرة بودرة بصل). بترفعي مكونات الصوص الأبيض على النار وتفضلي تقلبي بشكل مستمر عشان ما الصوص ما يطلعش فيه أي كلاكيع، ويطلع تقيل وحلو. بعد كده، بتحطي الصوص الأبيض على القرنبيط واللحمة المفرومة وبتضيفي الجبنة الموتزاريلا على الوش. حطيها تاني في الفرن لحد ما الجبنة تسيح وتاخد لون وقدميها بالهنا والشفا.
مصدر الوصفة:
وصفة القرنبيط باللحمة المفرومة والصوص الأبيض
التعليق باستخدام حساب فيس بوك