خلاص أيام قليلة ونستقبل عيد الفطر 2020. طول عمري كنت باسمع حكاوي الكبار والجدات عن لمتهم ليلة العيد يجهزوا ويحضروا كحك العيد والغريبة والبسكويت والبيتيفور بأنواعه. وكنت دايمًا باتخيل المشهد الجميل ده، فيه العيلة كلها متجمعة: اللي بيعجن واللي بينقش الكحك، والأطفال اللي بتشيل الصواني وتروح تخبزها في الأفران، وكل واحدة تعمل علامة في الكحك بتاعها عشان تفرقوا عن كحك جارتها، مشهد كده كله دفا ولمة وهيصة وفرحة بجد.
لحد ما قررت من كام سنه فاتوا إني عايزة أعيش المشهد الجميل ده، وأفرح وأفرّح عيلتي وحبايبي. جهزت كل التجهيزات واشتريت كل المكونات والأدوات، وطبعًا عملت حساب الحبايب كل واحد في منقاش للكحك. كلنا اتبسطنا واشتغلنا والأطفال كانوا مهيصين، الخلاصة: لازم تجربوا طريقة عمل كحك العيد في البيت مع ولادكم وعيلتكم حقيقي فرحة جميلة وذكريات حلوة.
السنة دي عيد الفطر 2020 هيكون فعلا مختلف، بسبب ظروف فيروس كورونا. احنا حقيقي محتاجين نخلق أجواء جميلة في بيوتنا تسعدنا وتحسسنا بفرحة العيد. انهارده هاشارك معاكم وصفتين لكعك العيد: وصفة زمان الدسمة الكحك معمول بالسمنة على أصولها والحقيقة الوصفة دي أنا أخدتها عن شيف غادة التلي وهي وصفة ناجحة جدًا وباعملها كل سنة وبتنول إعجاب كل اللي يدوقها، ووصفة تانية كعك معمولة بالزبدة خفيفة وطعمة، الاتنين أحلى من بعض. جربي الوصفة اللي تعجبك وافرحي وفرّحي اللي حواليكي، العيد فرحة.. يا سلاااااام!!
طريقة عمل كحك العيد بالزبدة
مقادير الكحك بالزبدة
- نص كيلو دقيق الكحك (دقيق قليل الجلوتين مخصص للكحك والبسكويت)
- 2 معلقة كبيرة لبن بودرة
- 300 جم زبدة في حرارة الغرفة
- 3.5 معلقة كبيرة مياه باردة جدًا من التلاجة
- 10 جم خميرة فورية
- 1 معلقة صغيرة ريحة الكحك (موجودة عند العطار وفي محلات مستلزمات الحلويات)
- 2/3 كوب سكر بودرة ناعم منخول
طريقة عمل الكحك بالزبدة:
- في العجان الكهربائي وباستخدام أداة الكف، هنخلط كل مكونات الكحك ما عدا المياه الباردة على سرعة منخفضة.
- لما تبدأ العجينة تتكون، نضيف الماء البارد بالتدريج لحد ما يمتزج مع العجينة، وما نبالغش في المزج عشان الكحك ما ينشفش.
- سيبي العجينة ترتاح لمدة ساعة في التلاجة
- بعد مرور الساعة، ابدأي في تقسيم العجينة، وتقدري تستعيني بالميزان لو حبيتي تكوني دقيقة جدًا ويطلع الكحك كله مقاس واحد.
- ابدأي في حشو كور العجينة بالحشوة المفضله ليكي (ملبن، عجوة، مكسرات، عجمية) أو سيبيه سادة بدون حشو لو حبيتي.
- ابدأي في تشكيل الكحك سواء بمنقاش الكحك أو الختّامة وهي الأسهل طبعًا، وكل الأدوات دي متوفرة في محلات مستلزمات الحلويات.
- يخبز الكحك في الفرن على درجة حرارة هادية 150 درجة لمدة من 20-15 دقيقة، بمجرد ما الكحك ياخد لون من تحت، يبقى استوى.
- بعد ما يبرد الكحك تمامًا، رشيه بالسكر البودرة وقدّميه.
طريقة عمل كحك العيد بالسمنة للشيف غادة التلي
مقادير الكحك بالسمنة:
- 1 كيلو دقيق (دقيق مخصص للكحك والبسكويت)
- 1/2 كيلو سمنة (نوع فاخر)
- 1 معلقة كبيرة ريحة الكحك
- 1 معلقة كبيرة سمسم محمص
- 1 معلقة كبيرة خميرة
- رشة ملح
- 1 كوب لبن دافي
مقادير العجمية:
- 2 معلقة كبيرة سمنة
- 2 معلقة كبيرة سمسم
- 1 كوب عسل أبيض
- 2 معلقة كبيرة دقيق
طريقة عمل الكحك بالسمنة:
- اخلطي السمسم مع الدقيق واقدحي السمنة كويس وبعدين ضيفيها على الدقيق تدريجيًا مع الاستمرار في التقليب. بعدين ضيفي ريحة الكحك والخميرة.
- قلّبيهم كويس ثم ضيفي اللبن. وإذا لاحظتي إن العجينة متماسكة، ممكن تضيفي مياه.
- سيبي العجينة تخمر وشكليها واحشيها بالعجمية أو بالحشوة اللي تحبيها وزينيها ودخليها الفرن لحد ما يستوي الكحك، وزينيه بالسكر البودرة.
طريقة عمل العجمية:
على النار، دوّبي السمنة وبعدين ضيفي عليها الدقيق واخلطيهم كويس وضيفي العسل والسمسم واخلطيهم.
سيبيها تبرد واحشي بيها الكحك.
