الكريب من الأكلات الطيبة اللي بيتقال عليها الأكلة النينجا اللي بتتشكل على حسب رغباتك ونفسياتك. يعني يوم تعبانة ومش عايزة تطبخي هتقومي تحطي حتتين جبنة على زيتون على فراخ وشوية خضار وهتحشيه بالكريب وأكلة زي الفل.. يوم نفسيتك مش التمام وعايزة تفرحي نفسك وتفرفشيها بحاجة حلوة كده تنسيكي هموم اليوم هتجيبي شوية شوكولاتة وتحطيها في الكريب وهاتك دمار للدايت والأحزان. وفي الموضوع ده، هنقول لك على طريقة عمل كريب النوتيلا بشكل سهل وسريع وبنتمنى تعجبك.
مقادير كريب النوتيلا
- كوب دقيق
- 2 معلقة سكر
- 2 باكو فانيليا أو فانيليا سايلة
- رشة ملح
- 3 بيض
- كوب ونصف لبن
- معلقة كبيرة من الزبدة
- رشة زيت
- شوكولانة سبريد
طريقة عمل كريب النوتيلا
- هاتي وعاء خلط متوسط الحجم وحطي فيه المقادير الجافة. أولًا: الدقيق والملح والسكر واخلطي كل المكونات مع بعض كويس.
- في وعاء مختلف، اخلطي البيض مع الفانيليا واللبن كويس لمدة خمس دقايق لحد ما توصلي لقوام متجانس.
- ضيفي خليط البيض في الوعاء مع خليط الدقيق وقلبي كله كويس مع بعض لحد ما توصلي لقوام متجانس.
- زودي الملح والزبدة ويفضل إن الزبدة تكون سايحة.
- سيبي الخليط يرتاح في التلاجة لمدة ساعة.
- هاتي طاسة مخصوصة للكريب ورشيها بالزيت وحطي مغرفة من الخليط في النص وافرديها وسيبيها لحد ما تاخد لون على الجانبين.
- طلعيه من على الطاسة واحشيه نوتيلا أو أي شوكولاتة سبريد ولفيه على شكل الكريب.
- ممكن تزينيه بصوص كاراميل وترشي سكر وبندق مبشور.
- ممكن تحشي الكريب بقطع الموز المقطع ومعاه قطع اللوز المكرمل مع النوتيلا وبألف هنا وشفا على قلبك.
اقري كمان وصفاتنا التانية المتنوعة من الحلويات السهلة هنا:
طريقة عمل الوافل اللذيذ على طريقة الشيف سالي فؤاد
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا
What’s your Reaction?
التعليق باستخدام حساب فيس بوك