كفتة داوود باشا من الأطباق المشهورة والمفضلة للأمهات اللي بتحب تعمل وجبة متكاملة العناصر الغذائية. أصل الأكلة دي بيرجع للعهد العثماني في مصر وأصل الاسم بيرجع لداوود باشا، واللي يقال إنه كان والي مصر، وكان أكلته المفضلة هي كرات اللحم بالصلصة، واللي من كتر حبه فيها اتسمت كفتة داوود باشا.
وداوود باشا ليها طرق كتير وبعض الناس بتفضلها بمكعبات البطاطس والبقدونس وكمان فيه ناس بتاكلها بالرز أو على المكرونة الاسباجيتي وليها مسمى آخر Meatballs.. ولو إنتي أم عاملة، ممكن كمان تشيلي الكفتة المتحمرة في الفريزر وتطلعيها تفك وتسويها في الصلصة على طول. وهنا في المقال ده هنقول لك على طريقة سهلة قوي وسريعة تعمليها لكفتة داوود باشا نتمنى تعجبك وبألف هنا وشفا 🙂
طريقة عمل كفتة داوود باشا
مقادير الكفتة
- نص كيلو لحمة مفرومة
- بصلة كبيرة مفرومة
- ربع كوب بقدونس مفروم (إختياري)
- معلقتين كبار من البقسماط المطحون
- ملح وفلفل
- ربع معلقة قرفة
- ربع معلقة من السبع بهارات
- دقيق
مقادير صوص الكفتة
- بصلة كبيرة مفرومة
- معلقة كبيرة من الثوم المفروم
- زيت وسمنة
- 3 كوب صغير من عير الطماطم أو الصلصة الجاهزة
- مياه
- ملح وفلفل
هنا ممكن تشوفي طريقة عمل طاجن الفريك بالحمام للشيف سالي فؤاد
طريقة عمل كفتة داوود باشا بالخطوات
- امزجي كل مكونات الكفتة مع بعض كويس لمدة 3 دقايق عشان تتجانس كويس وكوريها على شكل كور وسيبيها ترتاح في التلاجة حوالي نص ساعة.
- رشي على كرات اللحم شوية دقيق واقليهم في الزيت لحد ما ياخدوا لون وطلعيهم على ورق مطبخ أو مصفاة.
طريقة عمل صلصة الكفتة
- في حلة، شوحي البصل والتوم في السمنة والزيت لحد ما ياخدوا لون دهبي فاتح.
- ضيفي عصير الطماطم والصلصة وقلبي كويس مع بعض.
- ضيفي الملح والفلفل وسيبي الصلصة لحد ما تتسبك كويس.
- لو الصوص احتاج مياه، ضيفي شوية مياه بسيطة.
هنا دليلك لعمل أشهر تتبيلات اللحوم والفراخ والأسماك
قدمي كفتة داوود باشا مع الصلصة أو المكرونة الاسباجيتي ورشي عليها رشة من البقدونس للزينة ولو حابة تطبخيها مع البطاطس، ضيفي البطاطس المكعبات مع الصلصة وهي بتتسبك.
دي أفضل طريقة عمل رز بخاري بالدجاج، جربيها.
التعليق باستخدام حساب فيس بوك