أهم سر هيخلي طعم الكول سلو يجنن هو إنك تحفظيها في التلاجة على الأقل ساعتين قبل التقديم، المكونات كلها هتتصاحب على بعض بشكل خطير هيخلي الطعم مظبوط. والكرنب والجزر هتنزل العصارة بتاعتهم وهتمتزج مع الصوص وقوامهم هيبقى أطرى وأظبط بكتير، من الآخر كل ما تقعد كل ما تحلو! عشان كده، النهارده، هنعلّمك طريقة عمل كول سلو كنتاكي في البيت بكل سهولة وتبهري بيها ولادك وضيوفك لإن الكول سلو بتكون مرغوبة جدًا في العزومات.
ادخلي هنا عشان تتعرفي على 6 طرق لتحضير دريسينج السلطات
الكول سلو من أكتر السلطات المشهورة في عالم الفاست فوود، ولها شعبيه كبيرة جدًا، وصعب جدًا نروح كنتاكي من غير ما نطلبها جنب الوجبة، لإنها حقيقي مميزة ومتوازنة جدًا في طعمها وقوامها. السر في كول سلو كنتاكي مش بس في التوازن الموجود في الصوص بتاعها. لكن كمان تقطيعة الخضار بتديها تجانس وبتخليها تختلف عن غيرها من المحلات التانية.
ادخلي على اللينك ده عشان تعرفي 3 طرق لعمل سلطات شتوية دافية
مقادير كول سلو كنتاكي
- 7 أكواب من كرنب السلطة مفروم (تقريبا 1/2 ثمرة كرنب كبيرة الحجم)
- 1 ثمرة جزر كبيرة
- 2 معلقة كبيرة بصل أبيض مفروم ناعم جدًا
لتحضير الصوص
- ½ كوب مايونيز
- ¼ كوب حليب
- ¼ كوب لبن رايب
- 3 معالق كبيرة سكر أبيض
- 2 معلقة كبيرة خل أبيض
- 2 معلقة كبيرة عصير ليمون
- ½ معلقة صعيرة ملح
- ¼ معلقة صغيرة فلفل أبيض
طريقة عمل كول سلو كنتاكي
طريقة عمل كلو سلو كنتاكي – المصدر: cleanfoodcrush
- في محضرة الطعام، قومي بفرم الكرنب والجزر فرم خشن، واخلطيهم في بولة كبيرة (كول سلو كنتاكي بتكون مفرومة قطع صغيرة ومحضرة الطعام هتساعدك توصلي للنتيجة دي بسهولة).
- اخلطي مكونات الصوص بمضرب سلك، وخليكي حريصة إن السكر يدوب كويس جوه الصوص.
- ضيفي الصوص للكرنب والجزر، وقلبيهم كويس جدًا، سيبي كول سلو كنتاكي في التلاجه لمدة ساعة على الأقل قبل التقديم عشان المكونات تندمج مع بعضها وتوصلي للطعم اللذيذ.
التعليق باستخدام حساب فيس بوك