محتويات المقال
الكيك له معزة خاصة في قلوب المصريين، وكيك البرتقال واحد من أكتر الكيكات الكلاسيكية اللذيذة جدًا اللي كلنا اتربينا عليها واحنا صغيرين. في موسم الشتاء 2021 لما بيطلع البرتقال وريحته تملى الدنيا، باحب استمتع بيه وبفوائد البرتقال الجميلة للمناعة في فصل البرد والأنفلونزا، ومن أحلى الوصفات اللي باحب ادخل فيها البرتقال هي كيكة البرتقال. انهارده هقولك طريقة عمل كيك البرتقال ولو مشيتي على الخطوات مظبوط هتعملي أحلى وألذ كيكة برتقال، هشة وطرية جدًا وخفيفة والصينية هتتنسف في ثواني. بشر البرتقال في الكيكة بيعزز النكهة والريحة بشكل غير طبيعي، وخفق البيض مع الزيت والسكر لمدة كافية مع عملية نخل المكونات الجافة، كل دي خطوات هتخلي الكيك هشة جدًا معاكي ومظبوطة بشكل خطير.
طريقة عمل كيك البرتقال الهشة
مقادير كيكة البرتقال
- 2 كوب دقيق
- 1 مغلف بودرة الكريم كراميل الجاهزة
- 1 معلقة كبيرة بيكينج بودر
- 1/4 معلقة صغيرة بيكاربونات الصودا
- 4 مغلفات فانيليا بودرة
- رشة ملح
- 4 بيضات
- 1 كوب سكر أبيض
- 1/2 كوب زيت
- 1 كوب عصير برتقان
- بشر برتقانة كبيرة
اعرفي هنا طريقة عمل الكب كيك
وهنا كل أسرار نجاح الكيك زي المحترفين
طريقة عمل كيك البرتقال
- سخني الفرن على درجة حرارة 180 درجة، وبطّني قالب الكيك بالسمن والدقيق.
- باستخدام المضرب الكهربائي، اخفقي الزيت والسكر كويس.
- ضيفي البيض بيضة بعد التانية واخفقي كويس جدًا بين كل بيضة، وضيفي معاهم الفانيليا وبشر البرتقان.
- باستخدام منخل أو مصفاة، انخلي المكونات الجافة كلها مع بعض.
- ضيفي المكونات الجافة لمزيج البيض بالتبادل مع عصير البرتقان على 3 دفعات بداية ونهاية بالعصير.
- صبي مزيج الكيك في القالب المجهز، ودخليه الفرن في الرف الأوسط لمدة 45 دقيقة، أو لحد ما تخلّي خلة أسنان أو سكينة في منتصف الكيك وتطلع نظيفة.
- سيبي الكيك في الصينية لحد ما يبرد لحرارة الغرفة، بعدها تقدري تقلبيه في طبق للتقديم، زينيه بسكر بودرة وبشر البرتقال.
لو بتحتاري في الفطار كل يوم اصبح ليكي ولأطفالك .. ممكن تشوفي هنا طريقة عمل البان كيك بالعسل
التعليق باستخدام حساب فيس بوك