أحلى حاجة في وجود الأمهات في البيت مع أولادهم في فترة الإجازة الحالية بسبب الظروف إلي بنمر بيها بوجود فيروس كورونا هي إن الناس كلها حتى إلي مكانش ليهم في الطبخ بدأوا يدخلوا المطبخ ويتعرفوا عليه ويجربوا أكلات جديدة ووصفات من المركونة في الموبايل محتفظين بيها بس مفيش وقت نعملها ودي واحدة من إيجابيات الظروف إلي بنمر بيها حاليا.
عشان كده النهاردة أنا كأم هشارك معاكي وصفة على قد مهي لذيذة هي مفيدة جدا خصوصا للأولاد إلي مش بيحبوا الخضار زي ابني. مافن الجزر والكوسة والبرتقان وصفة بجد طعمها حلو قوي وسكرها خفيف ومليانة عناصر مهمة لصحة الولاد، أنا شخصيا بحاول على قد ما أقدر أزود جرعات الخضار لعيلتي وأي عناصر غذائية ممكن تخلي صحتهم ومناعتهم أحسن. الوصفة دي ليكي انتي كمان مش بس للأولاد جربيها وخلي الولاد يساعدوكي ويحضروا المكونات، هيتبسطوا جدا وربنا يحفظنا ويحفظ أولادنا جميعا.
مقادير عمل مافن الجزر والكوسة والبرتقال
- 1 و 3/4 كوب دقيق
- 3 بيضات
- 2 معلقة صغيرة بيكينج باودر
- 1/2 معلقة صغيرة بيكربونات الصودا
- 1 معلقة صغيرة قرفة
- 1 معلقة كبيرة بشر برتقال
- 1/4 كوب عصير برتقال
- 1 معلقة صغيرة فانيليا سايلة
- 50 جم زبدة في حرارة الغرفة
- 1/4 كوب زيت نباتي
- 3/4 كوب سكر بني
- 1و3/4 كوب جزر وكوسة مبشورين
- 1/2 كوب عين جمل (اختياري)
- 1/2 كوب زبيب (اختياري)
طريقة عمل المافن:
- سخني الفرن على درجة حرارة 180.
- جهزي صينية المافن ورصي فيها ورق المافن أو ادهنيها بالزيت والدقيق.
- اخلطي المكونات الجافة مع بعض واخلطي معاهم بشر البرتقال.
- باستخدام المضرب الكهربائي، اخلطي الزيت والزبدة مع السكر البني لحد ما يبقى قوامهم كريمي واللون يكون أفتح.
- ضيفي البيض واحدة واحدة واضربي بعد كل إضافة وضيفي معاهم عصير البرتقال والفانيليا السايلة .
- ضيفي المكونات الجافة على دفعتين بإستخدام سباتولا أو معلقة خشب وماتبالغيش في التقليب .
- ضيفي الكوسة والجزر والزبيب وعين الجمل مع التقليب بخفة.
- اخبزي المافن لمدة 20-25 دقيقة لحد ماتدخلي خلة الأسنان فيها وتخرج نضيفة.
- برديها على شبكة تبريد وقدميها مع رشة سكر بودرة.
ملحوظة
عشان الزبيب ميقعش في قاع المافن أو أي كيك بتخبزيه، يفضل نقعه في مية سخنة لمدة ربع ساعة وتصفيتة من المية قبل إضافته للمافن.
التعليق باستخدام حساب فيس بوك