كتير بيكون نفسنا في حاجة حلوة بس ما تتخنناش وتكون سعراتها كويسة وقليلة وتكون خفيفة وصحية ونقدر نفطر بيها.. هقولك دلوقتي على طريقة مافن عملته لأول مرة إمبارح وطلع لذيذ وخفيف..
المافن ده كمان مناسب للناس إللي بتعمل كيتو دايت لإنه مفيهوش دقيق أبيض ولا سكر عادي وده إللي بيخلي سعراته منخفضة بالمقارنة بالمافن العادي (حوالي 150 سعرة)..
بالنسبة لدقيق جوز الهند ودقيق اللوز اشتريته من FRESH FOOD MARKET إللي في مول بوينت 90..
سعر دقيق جوز الهند 75 جنيه وسعر دقيق اللوز 191 جنيه حوالي 400 جرام كل كيس.
دقيق اللوز وجوز الهند
المقادير:
- ربع كوب دقيق لوز
- نصف كوب دقيق جوز هند
- 5 معالق صغيرة سكر دايت ستيفيا لو أنتي كيتو أو أيزو سويت لو إنتي في دايت عادي (حسب الرغبة). دول أحسن طعمين للسكر الدايت في الحلويات بالنسبالي.
- معلقة صغيرة بيكينج بودر
- بيضتين
- معلقة فانيليا صغيرة
- ربع كوب جوز هند مبشور
- لوز مجروش أو عين جمل
- قطع فراولة (حسب الرغبة)
- ربع كوب زبدة سايحة
- نص كوب لبن أو كريمة طهي (لو انتي كيتو هتحطي كريمة طهي حيواني الدهن).
طريقة عمل المافن الكيتو بدقيق اللوز وجوز الهند:
- هنحط دقيق اللوز ودقيق جوز الهند وعليهم الفانيليا والبيكينج باودر والمكسرات وجوز الهند والسكر.
- هنضيف البيض والزبدة والكريمة أو اللبن.
- هنبدأ نقلّب يدويا (بمضرب بيض أو بدون مضرب) كتير لحد ما نحصل على قوام شبيه بقوم الكيكة العادية.
- هنضيف قطع الفراولة ونقلب كويس.
- هنحط العجينة في قوالب المافنز أو الكب-كيك.. بس الأول ياريت نحط ورق الكب-كيك تحت العجينة أو ندهن القوالب زيت بالفرشاة ونرش عليهم دقيق جوز هند أو لوز علشان ما تلزقش..
- هنسويها حوالي 20- 30 دقيقة في فرن سخن مسبقا درجة حرارته 120-150 وهنخلي الحرارة تتوزع فوق وتحت..
- بعد ما الوقت يخلص.. هنفتح الفرن بالراحة ونغرز سكينة في المافن لو طلعت ناشفة تماما ممكن نقفل الفرن خلاص ونطلعها.
- هنستنى لما تبرد خالص وبعدين نقلب القالب علشان نطلع الكيكة منه.
وبالهنا وبالشفا..
قوليلنا في Comment .. هل بتفكري تجربيها؟
What’s your Reaction?
1 comment
[…] طريقة عمل مافن الكيتو بدقيق جوز الهند واللوز […]