محتويات المقال
المصريين معروفين بعشقهم الفظيع للمحاشي: أي حاجة في الدنيا بالنسبة لنا ممكن تتحشي، بتنجان، كوسة، فلفل، طماطم، بصل، كرنب، ورق عنب، حمام، ما فيش حاجة فلتت من تحت إيدينا. والمحاشي واحدة من الأكلات إللي تحب اللمة، مش بس وقت ما تتحط سخنة ومتألقة على السفرة، لكن كمان اللمة في عمايلها وتجهيزها. عشان كده، المحاشي أكلة رمضانية ممتازة وما فيش عزومة ولمة بتكمل من غير على الأقل نوع واحد من المحاشي.
متعب أكيد، تجهيزاته كتير فعلًا، بس ممكن بشوية حيل بسيطة وتجهيز مسبق تعملي أحلى محشي، خصوصًا لو جمعتي حبايبك وصحابك يساعدوكي ويشتركوا معاكي في فقرة الحشو إللي هي أكتر مرحلة بتاخد وقت في تجهيز المحاشي. في المقال ده، جمعنا لك كل حاجة عاوزة تعرفيها عن المحشي، وتجهيزاته وأسرار تسويته وعمايله إللي هتخليكي محترفة فيه.
اتعلمي هنا 5 وصفات للرز غريبة وشهية
نصا~ح مهمة لسهولة عمل المحشي
- اشتري الكوسة والبتنجان متقورين وجاهزين للحشو. ده هيوفر وقت ومجهود رهيب.
- استخدمي تسبيكة الطماطم الجاهزة للحشوة، أو صلصة الطماطم المركزة مع حبتين تلاتة من مكعبات الطماطم الطازة.
- حضري كمية من خلطة المحشي (بطريقة الني في ني) وشيليها في علب محكمة الغلق في الفريزر عشان تستخدميها لما تحبي تحضري محشي مرة تانية. هتقعد معاكي لمدة شهر.
- اشتري بهارات المحشي الجاهزة من السوبر ماركت أو من عند العطار.
- خلي دايمًا عندك في الفريزر أكياس شوربة بيتي مفرزة عشان تسوّي بيها المحشي. هتوفر عليكي كتير وهتخلي الطعم تحفة.
- لو بتحبي ورق العنب والكرنب، حاولي تفرزيهم بكميات معقولة على قد الأكلة بدون حشو أوراق فقط، ورق العنب ممكن يتفرز في الموسم بتاعه أخضر بدون سلق، وأوراق الكرنب هتديها نص سلقة فقط في مياه مغلية ورشة كمون وتحفظيهم في الفريزر لوقت الاستخدام.
طريقة عمل طاجن ورق عنب بالريش في الفرن
طريقة عمل خلطة المحشي الأساسية
ال المحشي – المصدر: sugarandgarlic
الخلطة دي تنفع لكل أنواع المحاشي، مع بعض الإضافات الخاصة بمحشي ورق العنب. والمقادير دي تكفي لتحضير حوالي 20 حبة بتنجان وكوسة حجم صغير و10 حبات فلفل أخضر بلدي صغير تقريبًا.
مقادير خلطة المحشي
- 3 كوب رز مصري مغسول ومنقوع حوالي 30 دقيقة ومصفى جيدًا
- 2 حزمة بقدونس
- 2 حزمة كزبرة خضراء
- 1 حزمة شبت
- 2 بصلة متوسطة مفرومة
- 3 فصوص توم مهروس
- ملح وفلفل
- 1 معلقة كبيرة بهارت المحشي
- 1 معلقة صغيرة قرفة (اختياري)
- 1 معلقة صغيرة شطة (اختياري)
- 1 مكعب مرقة (اختياري)
- 2 معلقة كبيرة صلصة طماطم
- 5 حبات طماطم مقطعة مكعبات صغيرة (تقدري تستبدليها بتسبيكة الطماطم الجاهزة)
- 1/4 كوب زيت نباتي
إضافات خاصة بمحشي ورق العنب:
محشي ورق العنب – المصدر: themediterraneandish
- 1/2 ك لحمة مفرومة متعصجة
- 2 معلقة صغيرة نعناع ناشف
طريقة تجهيز خلطة المحشي:
- الطريقة الأولى (ني في ني): اخلطي كل المكونات مع بعض في بولة كبيرة وقلبيهم كويس جدًا لحد ما تتجانس الخلطة مع بعض وبكده تكون جاهزة للحشو.
- الطريقة التانية (التسبيك): في حلة كبيرة، هتضيفي الزيت وتشوّحي البصل مع رشة ملح لحد بس ما يطرى بدون ما يلون.
- ضيفي التوم والبهارات وصلصة الطماطم المركزة، وشوّحي كل المكونات مع بعض على نار متوسطة لمدة دقيقتين.
- ضيفي الطماطم الطازة سواء مكعبات أو معصورة في الخلاط وضيفي مكعب المرقة لو هتستخدميه، والبهارات وضيفي 1/2 كوب من المياه أو الشوربة البيتي، وسيبي الصلصة 5 دقايق تغلي وتتسبك شوية.
- أخيرًا ضيفي الرز وقلّبيه مع الخلطة لحد ما يتجانس معاها لمدة 3 دقايق، واطفي النار.
- آخر خطوة هي إضافة الخضرة المفرومة بعد ما تطفي النار، سيبي الحشوة تبرد تمام قبل ما تبدأي عملية الحشو.
طريقة عمل كباب الحلة بوصفة سهلة وسريعة
تعليمات هامة لتسوية المحاشي:
المحشي – المصدر: themediterraneandish
- رص المحشي في الحلة: يفضل إنك تعملي فرشة من الخضروات زي شرايح البصل، أو شرايح البطاطس قبل رص المحاشي في الحلة. وبالنسبة لمحشي الكرنب، تقدري تعملي الفرشة دي من أوراق الكرنب نفسه. أما ورق العنب، فتقدري تضيفي شرايح من الليمون الأضاليا لإنه بيكون مسكر وأقل في المزازة من الليمون البلدي وكمان شرايح من التوم إللي بيدي نكهة حلوة جدًا لمحشي ورق العنب.
- تسوية الضلمة: لتسوية محشي البتنجان، الكوسة، الفلفل بأنواعه، الطماطم، خديها قاعدة إنك تضيفي المرقة بكمية تغطي المحشي في الحلة لحد النص بالظبط. لو أكتر الرز هيعجن والمحشي هيستوي زيادة.
- تسوية الكرنب: لتسوية الكرنب هتضيفي للمرقة معلقتين صلصة طماطم، أو عصير طماطم جاهز أو طازة ورشة من الكمون، وبرضه المرقة كميتها توصل لنص ارتفاع المحشي في الحلة.
- تسوية ورق العنب: هتضيفي للمرقة عصير الليمون ومعلقة من صلصة الطماطم لحلة متوسطة. تقدري كمان تضيفي معلقة من دبس الرمان عشان تدي مزيد من المزازة ولنكهة شامية شوية، وبرضه ارتفاع المرقة يوصل لنص ارتفاع المحشي في الحلة.
- تكنيك التسوية: بعد إضافة المرقة، غطي الحلة وسيبي المرقة لحد ما تغلي. بعدها تنقلي المحشي على نار هادية جدًا لحد تمام التسوية، يفضل إنك تستخدمي طبق مقاوم للحرارة مع محشي الكرنب وورق العنب فوق رصة المحشي عشان ما يفتحش أثناء الغليان.
- ملحوظة مهمة: بعد تمام التسوية، مهم جدًا إنك تسيبي المحشي يرتاح لمدة 20-30 دقيقة عشان يتشرب باقي السوائل ويهدى ويبقى غرفه سهل.
تابعينا في مقالات تانية عن المحاشي إللي الكلام عنها ما بيخلصش، واكتبي لنا في الكومنت إيه أكتر نوع محشي بتحبيه؟؟
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك