الصيف دخل وده معناه حر أكتر وعرق اكتر وبالتالي لازم مزيل كويس جدا للعرق لتجنب الروائح الغير مرغوبة وفي نفس الوقت تجنب الإحراج وحتى تجنب فرص الإصابة بمشاكل جلدية، وحقيقي مزيل العرق اللي ريحته حلوة من مسببات تخفيف سخافة حر الصيف، بس فعليا مزيلات العرق الفعالة أوقات بيكون أسعارها مبالغ فيها ده غير أكيد الخوف اللي بأة طبيعي من أثر المواد المستخدمة في تكوينه، خصوصا إم مزيلات العرق بتستخدم في مناطق حساسة، علشان كدة جبنا لك مجموعة وصفات لمزيلات عرق طبيعية هتفرق معاكي كتير.
مشاكل الصيف: 5 نصائح لتجنب الرائحة الكريهة عند خلع الحذاء
عموما من المهم إنك تحطي في الإعتبار إن مزيل العرق الطبيعي مدة تأثيره مش بتكون أكتر من يوم كامل وده بيتحدد حسب مقدار نشاطك ومقدار تعرضك للحرارة، مش زي مزيلات العرق التجارية اللي بعضها ممكن يوصل مفعولها لمدة 48 ساعة، تعالي شوفي الوصفات دي وإختاري منها اللي يعجبك، إنتي ممكن تعملي كميات قليلة بحيث تنوعي ما بينها وتشوفي أنهي وصفة اللي جابت معاكي أفضل تأثير، وحتى لو عملتي كمية كبيرة هتلاقي إنك وفرتي مبالغ كبيرة من المال كانت بتتصرف على مزيلات العرق التجارية، شوفي الوصفات دي.
5 نصائح للتخلص من رائحة العرق الواضحة
مزيل عرق طبيعي بالليمون
المكونات:
٦ ملاعق صغيرة زيت جوز هند سائل
٤/١ كوباية بيكربونات الصوديوم
٤/١ كوباية نشا الذرة
٢٠ قطرة زيت ليمون
طريقة عمل مزيل عرق طبيعي بالليمون:
١- في طبق أو وعاء غويط اخلطي نشا الذرة وبيكربونات الصوديوم.
٢- حطي زيت جوز الهند السائل فوق الخليط السابق مع التقليب.
٣- دلوقتي ضيفي للخليط السابق زيت الليمون واخلطيهم مع بعض كويس جدا.
٤- صبي الخليط في برطمان زجاجي، وسيبيه في الثلاجه لمدة دقائق وبعد كدة ابتدي في استخدامه.
مزيل عرق بزيت جوز الهند
المكونات:
٦ ملاعق كبيرة زيت جوز هند
٤ ملاعق كبيرة بيكربونات الصوديوم
٤ ملاعق كبيرة نشا الذرة
اي زيت عطري تحبيه (اختياري)
طريقة عمل مزيل عرق بزيت جوز الهند:
١- في طبق أو وعاء غويط اخلطي نشا الذرة وبيكربونات الصوديوم.
٢- ضيفي زيت جوز الهند فوق الخليط السابق وقلبيهم مع بعض كويس جدا.
٣- ضيفي الزيت العطري اللي يعجبك ودي خطوة إختياري لأن ريحة جوز الهند نفسها حلوة.
٤- صُبِي الخليط بالكامل في برطمان زجاجي صغير.
٥- حطي البرطمان في الثلاجة ربع ساعة لحد ما يتجمد واستخدميه بعد كدة.
مزيل عرق بزيت شجرة الشاي
المكونات:
١٠٠ جرام زبدة كاكاو
٢ ملعقة كبيرة بيكربونات الصوديوم
٢ ملعقة كبيرة نشا الذرة
٨ قطرات زيت لافندر
٤ قطرات زيت شجرة الشاي
طريقة عمل مزيل عرق بزيت شجرة الشاي:
١- في حلة صغيرة وعلى نار هادئة حطي زبدة الكاوكاو وقلبيها كويس لحد ما تذوب بالكامل.
٢- شليها من على النار وسيبيها على الجنب لحد ما تبرد.
٣- دلوقتي حطي كل المكونات على زبدة الكاكاو بعد الذوبان وقلبي كويس لحدما يمتزجوا مع بعض.
٤- حطي الخليط في برطمان زجاجي صغير وسيبيه في الثلاجة نص ساعة وخرجيه وبكدة يكون جاهز للاستخدام.
مزيل عرق بزبدة الشيا
المكونات:
٣ ملاعق كبيرة زيت جوز الهند
٣ ملاعق كبيرة بيكربونات الصوديوم
٢ ملعقة كبيرة زبدة شيا
٢ ملعقة كبيرة نشا الذرة
اي زيت عطري تحبيه (اختياري)
طريقة عمل مزيل عرق بزبدة الشيا :
١- في حلة صغيرة وعلى نار هادئة حطي زبدة الشيا وزيت جوز الهند.
٢- استني لحد ما زبدة الشيا تذوب تماماً وبعد كدة ارفعيهم من على النار.
٣- أضيفي البيكينج صودا ونشا الذرة واخلطيهم كويس.
٤- ضيفي الزيت العطري اللي بتفضليه (اختياري).
٥-حطي الخليط في برطمان زجاجي صغير وسيبيه في الثلاجة نص ساعة وخرجيه وبكدة يكون جاهز للاستخدام.
13 مكان أون لاين لبيع مزيلات العرق الطبيعية
جربي الوصفات دي وقولي لنا مين فيهم اللي عجبك أكتر وحسيتي إن نتيجته معاكي حقيقية، ولو عندك وصفة خاصة بيكي شاركينا بيها في الكومنتات تحت.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر
www.prevention.com
www.healthline.com
www.medicalnewstoday.com
التعليق باستخدام حساب فيس بوك