“القمر الدين .. وبلح على تين ..” عارفين الأغنية دي؟ واحدة من أغاني رمضان بتاعت زمان الجميلة اللي بتحسسنا بالسعادة وبتفكرنا إن رمضان خلاص قرّب وجاه وقت الخشاف المليان ياميش أشكال وألوان وقمر الدين، المنتج الجميل اللي بيطلع منه أصناف كتير. احنا كمصريين أغلب مناسباتنا – لو ما كانتش كلها – بتكون مرتبطة بأكلات ومشروبات معينة، منها اللي واخد حقه وشهرته، ومنها اللي حقه مهدور زي مهلبية القمر الدين. مع إنها من حلويات رمضان المميزة جدًا : مختلفة وفيها مزازة عظيمة ومع شوية مكسرات حلوين على الوش بتبقى طبق حلو ملوكي ساقع ومنعش يرطب على القلب خصوصًا واحنا داخلين على الصيف والحر. ومن أحلى مميزات المهلبية دي إنها سهلة جدًا في عمايلها. علشان كده جيبنا لك النهارده طريقة مهلبية قمر الدين بالمقادير وخطوة بخطوة.
لو إنتي من عشاق الكنافة .. ممكن تشوفي هنا طريقة عمل الكنافة بالكريمة
مقادير مهلبية القمر الدين
- لفة قمر الدين (حوالي 400 جم)
- 3 أكواب ونص من الميه
- 3 معالق كبيرة نشا
- 1 كوب سكر (أو حسب الرغبة)
- فانيليا
للتقديم
- جوز هند وزبيب
- قرفة
- مكسرات مشكلة حسب الرغبة
طريقة عمل مهلبية قمر الدين
- قصي شرايح القمر الدين لقطع صغيرة بمقص المطبخ أو قطعيها بالسكينة وارفعيها على النار مع المياه.
- قلّبي القمر الدين في المياه لحد ما يدوب تمامًا وما يتبقاش أي تكتلات ولو حصل وقطع ما دابتش، تقدري تضربي المزيج في الخلاط قبل إضافة النشا.
- ضيفي السكر حسب الرغبة وقلّبي على نار هادية لحد ما يذوب السكر تمامًا.
- اخلطي النشا في ربع كوباية من المياه وضيفيه بالتدريج للمهلبية مع التقليب المستمر.
- خلي المزيج يغلي على نار هادية لحد ما يوصل للقوام المطلوب وخلّي في اعتبارك إن القوام هيتخن لما المهلبية تبرد.
- ضيفي الفانيليا البودرة واطفي النار.
- سيبي المهلبية تهدى شوية قبل ما تصبيها في كاسات أو أكواب التقديم.
- سيبي الأكواب توصل لحرارة الغرفة قبل ما تدخليها التلاجة لحد ما تجمد، ووقت التقديم زينيها بجوز الهند وتشكيلة المكسرات اللي تحبيها.
تقدري تشوفي هنا طريقة عمل البسبوسة بالقشطة من منال العالم
1 comment
[…] سوبيا، كركديه، عرقسوس، خروب، قمر الدين يا سلااام والله لكم وحشة! ما اعرفش ليه دايمًا ارتبطت […]