محتويات المقال
الإجهاض هو سقوط الجنين من الرحم قبل اكتماله. وطبعًا هو نوعين: نوع منهم بقصد أو عن عمد (ومش ده موضوعنا في المقال ده) ونوع منهم عفوي أو زي ما بيقولوا سقط، اللي هو الأم ما عملتش حاجة وهي قاصدة تخلي الجنين ينزل. وطبعًا فيه عوامل وراثية وصحية ممكن تكون هي السبب ورا الإجهاض، لكن احنا في المقال ده، هنقول لك العادات السيئة اللي ممكن تكوني بتعمليها وانتي مش واخدة بالك إنها بتأثر على صحتك الإنجابية ويمكن تسبب الإجهاض.
التدخين
التدخين بيعلّي خطر الإجهاض والولادة المبكرة ونقص وزن الجنين. مش بس تدخين الأم الحامل اللي بيزود الخطر ده، لكن كمان التدخين السلبي، يعني لو الزوج أو أحد المقيمين مع الأم بيدخن، ده بيفقد الحمل قوته وبيهدده.
الكحوليات
المشروبات الكحولية خلال الحمل بتزود خطر فقد الجنين، مفيش أي كمية من الكحوليات مسموح بها أو تقدري تقولي عليها “آمنة” على الحمل، وعشان كده بننصحك بلاش شرب كحوليات خالص خلال الحمل.
عدم الانتباه للأمراض المزمنة
لو انتي مريضة ضغط أو سكر أو الأمراض دي موجودة في عيلتك، فلازم تاخدي بالك كويس جدًا عشان احتمالية علو النسب في الحمل كبيرة، ولو لا قدر الله ده حصل، ممكن يسبب تسمم حمل وفقد للجنين/ إجهاض. عشان كده، بننصحك تتابعي مع طبيبك نسب الأمراض دي وتاخدي بالك إنها ما تعلاش خالص.
الوزن الزائد أو الناقص
لو وزنك أعلى أو أقل من الطبيعي بكتير، فانتي في حالة تهديد لحملك.
الكافيين
أحيانًا الطبيب المتابع للحمل بيحط حد معين لاستهلاك الكافيين. في الحالة دي، لازم تلتزمي به. وجتى لو الطبيب ما حددش عدد معين لمشروبات الكافيين، لازم انتي ما تزوديش المشروبات دي، وممكن تستهلكي بحد أقصى 200 مجم في اليوم.
العادات اللي مش بتسبب إجهاض
فيه خرافات كده حوالين الحمل والإجهاض ومسبباته، ودي بتخلي معظم الستات أول ما تحمل، تتجنب كل حاجة وتقعد ترتاح في السرير لحد ما تولد عشان أي حركة غلط عليها. الحقيقة إن ده نسبة حدوثه قليلة قوي والطبيب بس هو اللي يقول لو الست لازم تلازم الفراش في فترة معينة في الحمل أو طول الحمل. لكن فيه حاجات معينة هنقول لك عليها دلوقتي مش لازم خالص تسبب الإجهاض.
- ممارسة العلاقة الحميمة
- الشغل
- ركوب الطيارة
- الأكل الحار
- التمارين
التعليق باستخدام حساب فيس بوك