عادة مص الاصبع من العادات المستفزة والموترة لينا كأمهات، بس اللي كتير مننا ما يعرفهوش إنها من العادات اللي بتندرج تحت بند “التهدئة الذاتية”، الطفل ممكن بيلجأ لعادة مص الاصبع عشان يهدي نفسه أو ينيم نفسه.
زي ما في طفل تاني تلاقيه بيمسك شعر مامته أو إيديها وهو قاعد سرحان أو قبل ما ينام، و زي ما احنا ممكن يكون فينا اللي مش بيعرف ينام غير لما ياخد دش هادي أو يقرا كتاب أو يسمع قرآن أو مزيكا. كل دي حاجات بتريحنا وتحت بند ال self soothing زيها زي مص الصوابع عند الأطفال، واللي ثبت علميًا إنها غالبًا بتنتهي من سن سنتين ل أربع سنين.
بس ده مش معناه إنها عادة مش مضرة، لإنها في بعض الأوقات ممكن تأثر على شكل الأسنان أو شكل الفك وأوقات بتسبب تلعثم في الكلام. في المقال ده، هاديكي شوية حلول تساعدي بيها طفلك يتخلص من العادة دي من غير ما توتريه ولا تقلب معاه بعند
إزاي تخلي طفلك يتخلص من عادة مص الاصابع في ٦ خطوات:
- أول حاجة مهمة قوي إنك ما تزعقيش أبدًا على صباعه اللي في بقه/ تشديه جامد/ تعاقبيه علي العادة دي.
- نتجنب محاولة تخلص الطفل من العادة ده في الأوقات اللي فيها قلق أو توتر أو أي تغيير كبير في حياة الطفل زي وصول مولود جديد/تغيير البيت/دخول الحضانة لإن الوقت اللي الطفل بيكون فيه قلقان ده مش وقت مناسب أبدًا إننا نحاول نسحب منه حاجة بتهديه.
- التجاهل: عادات كتير بيعملها الأطفال الصغيرة وبننصح بالتجاهل، بس التجاهل هنا له طريقة معينة: بمعنى إنك تتجاهلي إنك مش هتعلقي، لكن في نفس الوقت تشيلي إيده انتي من بقه وتشتتيه زي إنك تديله لعبة يلعب بيها تزغزغيه.
- اشغلي إيده دايمًا: أوقات الأطفال بيمصوا صوابعهم لما يكونوا قاعدين سرحانين أو هاديين أو زهقانين فدايمًا خليكي مركزة معاه وخلّي إيده مشغولة بحاجات زي soft toys لأن ملمسها بيهدي أو stress ball أو حتى العبي في إيده انتي.
- الاتفاقات: بعد سن السنتين ونص أو تلات سنين بيبدأ الأطفال يفهموا فكرة الاتفاقات ويتحمسوا لتنفيذها، فلو طفلك في السن ده ولسه بيمص صوابعه ممكن تقعدي تتكلمي معاه عن أضرار مص الصوابع بطريقة بسيطة من غير تفاصيل تخوّفه طبعًا وتعملوا اتفاق وكلمة سر ما بينكم تفكريه بيها لما ينسي ويبدأها.
- التشجيع الإيجابي: ده مفيد برده من أول سن سنتين بإنك تشجعي الطفل وتهيصي له و ممكن تكافئيه أوقات عشان يحس بالإنجاز ويتشجع.
وفي الآخر، عايزة أؤكد عليكم إن الطفل مش هيتخلص من عادة مريحة بالنسبة له غير لما يكون مستعد وعنده بدايل تهديه وتريحه، فنتجنب الضغط تمامًا على الطفل في الوقت ده وندى له وقته ونساعده من غير توتر، عشان ما يربطهاش في عقله بطريقة سلبية تخليه يتمسك بالعادة دي أكتر.
التعليق باستخدام حساب فيس بوك