محتويات المقال
في شهر سبتمبر 2019 طل علينا الجزء الأول من مسلسل عروس بيروت على قناة MBC4 بطولة ظافر العابدين “فارس الضاهر” وكارمن بصيبص “ثريا” وتقلا شمعون “الست ليلى”. والحقيقة إن المسلسل من الجزء الأول لحد الجزء التالت اللي اتعرض في شهر يناير 2022 يعتبر من مصنفات الخيال العلمي، شخصية فارس وثريا من الشخصيات النادرة اللي ممكن تتكرر في الحياة مرة واحدة زي حدث إنقراض الديناصورات أو أسطورة وحش بحيرة لوخ نس أو إن مثلًا جوزك يسمع أهاتك واستغاثاتك من أول مرة ويغيرلك لمبة المطبخ المحروقة. وبالرغم من كل المشاكل والصعوبات اللي واجهتهم إلا إن حياة فارس وثريا لسه ماشية على نفس وتيرة حب سوما العاشق الحساس اللهم لا حسد وسلامتها أم حسن من العين والحسد يعني D: ومن فرجة أم مصرية على أول أسبوعين حلقات من لاجزء التالت بحب أضم صوتي لأصوات أمهات كتير وأقولك يا فارس ما كفاية بقا يا لوجي.
حتى على التليفون يا فارس؟
من أول حلقة وفارس بيكلم ثريا يطمنها أخد القرض من البنك ولا لأ، ثريا بتفتح السبيكر عشان الست ليلى تسمع المكالمة معاهم يقوم أستاذ فارس يحب في ثريا مع إن يومه كان مش لطيف ابدًا والأبواب اتقفلت في كل وشه. يا أخي حرام عليم بقا يا أخي ده حتى أمك اتكسفت واتعجبت منك D: فين المشاكل فين الساسبنس فين أنا مضايق دلوقتي مش عايز يحد يكلمني، فين الغدا عشان عايز أكل وأنام. ادونا شوية واقعية مش كله محن كده.
مسلسل موضوع عائلي .. خمس حكم مش هننساها
وين ثريا يا آدم
لما ثريا كانت بتسجل أغنية في الاستوديو ومعاها بنتها فرح، فارس حاول يتصل بيها بس الموبايل كان مغلق أو غير متاح. فارس طبعًا اتجنن وحاول يوصل ليها برضو موبايلها مقفول راح خد بعضه وراح لآدم بيقوله وين ثريا فآدم يستفزه ففارس يقوم ضاربه. ما خلاص بقا يا أستاذ فارس ده أنت بتحبها جدًا، مجاش في بالك يا ثريا تبعتي واتساب؟ رسالة أم نص جنيه حتى؟ وإنت يا فارس موبايلها مقفول ومعداش كام ساعة مجاش في بالك إنها فودافون مثلًا وموبايلها مش مقفول بس هي فودافون؟ لقد هرمنا من كتر الحب والله.
ليه الأمهات بيحبوا ظافر العابدين في عروس بيروت؟
رحلتي من الكمنجة للمكواة
مسلسل عروس بيروت الجزء التالت
فيه لقطة كانت ثريا واقفة بتكوي هدوم فارس، ففارس بنظرة الحب والصعبانيات صعبان عليه إن ثريا بتكوي هدومهم بنفسها.. إيه يا فارس طب ما تكويها أنت D: وساعدها، بلاش دي ما شفتش الزوج المصري وهو بيصحي مراته من عز النوم في الشتا ويقولها فطريني واعمليلي لانش بوكس بدل ما سمية السكرتيرة تفطرني. شوية واقعية والنبي وبلاش ححب ونحنحة في المكواة.
طلال وداليا ولوووووو
مسلسل عروس بيروت الجزء التالت
بعض ما جزعنا من جرعة المحن الاوفر دوز بيطل علينا نسمة هوا خفيفة وظريفة من طلال وداليا، أصدق كابل في المسلسل كله بخفة دمهم وواقعيتهم، بينهم مشاكل عادية ويحبوا بعض عادي من غير رومانسيات 48 ساعة في اليوم ده غير دمهم الخفيف. والنبي كتروا مشاهدهم شوية D:
هل بتعتبري شريك حياتك من المسَلّمات؟
التعليق باستخدام حساب فيس بوك