مصممة الحلي والمجوهرات المصرية عزة فهمي ظهرت ضمن قايمة سيدات الشرق الأوسط وراء أشهر وأفضل البراندات المحلية في مجلة فوربس. فوربس بتختار سيدات أعمال لعبت دور أساسي في خلق براند/ماركة قدرت تلفت النظر لها بإنها ابتدت بيزنس ناجح ومستمر.
السنة دي وبسبب ظروف الكورونا اللي أجبرت أصحاب أعمال كتير يغيروا طريقتهم في إدارة أعمالهم، كان الاختيار عند فوربس أصعب لإنهم كان لازم يختاروا سيدات أعمال قدروا يخلقوا استمرارية في عملهم حتى مع الظروف دي، وقدروا يتحدوا الجائحة وينجحوا.
ده ما كانش العامل الوحيد في اختيار الفائزات طبعًا. فيه عوامل كتير اتاخدت في الاعتبار عشان يخلقوا آلية الاختيار اللي يها ظهرت عزة فهمي في القايمة.
معايير الاختيار
- المشاهير اللي رشحوا البراند
- عدد المتابعين على السوشال ميديا
- الإيرادات ومعدل النمو
- عدد البلاد اللي الماركة بتغطيها
- التغطية الإعلامية
- سنوات/مدة الخبرة
عن عزة فهمي
عزة فهمي شغفها بالحلي بدأ لما شافت من ٥٠ سنة كتاب فن ألماني عن حلي أوروبا في العصور الوسطى في معرض كتاب.
طورت موهبتها وشغفها من السبعينيات ودرست في لندن واشتغلت في مصر لحد ما بقت واحدة من أشهر وأفضل مصممات الحلي في الشرق الأوسط.
قطعها الفنية لبستها نجمات هوليوود زي جوليا روبرتس وناعومي واتس وشايلين وودلي وغيرهم. وبنات عزة فهمي فاطمة وأمينة غالي هم المديرة التنفيذية ورئيسة التصميم في مؤسستها.
التعليق باستخدام حساب فيس بوك