بعض الحوامل بيعانوا في فترة الحمل من الإمساك وده شىء طبيعي نتيجة لزيادة هرمون البروجسترون وكمان زيادة كمية الحديد اللي بتاخدها الحامل طول فترة حملها، وفي الموضوع ده هنعرفك على وصفات طبيعية لعلاج الإمساك من غير أي ملينات أو أدوية.
قبل ما نقولك على النصايح بننصحك تستشيري دكتور النسا الخاص بيكي لو طول الوقت بتعاني من إمساك عشان تطمني على صحتك وصحة الجنين.
ومن ضمن النصايح الطبيعية لعلاج الإمساك في الحمل:
- عشان تنتظم حركة الإخراج بنصصحك تكتري من أكل الخضار والفاكهة عشان فيهم نسبة عالية من الألياف.
- اشربي ميه كتير ومتشربيش أقل من 10 كوبيات في الصيف و8 كوبيات في الشتا، وحاولي تقللي من شرب القهوة والشاي لأن الكافيين بيزود من الإمساك.
- بعد ما تستشيري دكتور النسا، حاولي تمارسي رياضة المشي لمدة عشر دقايق يوميًا لأن المشي بينشط حركة الأمعاء.
- اتجنبي الملينات زي زيت البرافين لأن ليها تأثير عكسي على إمتصاص فيتامين (أ) وفيتامين (د) المهمين جدًا لصحة الحامل والجنين.
ودي وصفات طبيعية تقدري تجربيها عشان تعالجي اللإمساك في فترة حملك من غير ما تستخدمي ملينات
- اغلي عشر حبات زبيب في كوباية لبن واشربيه قبل النوم.
- اشربي كوباية عصير برقوق قبل الفطار ويفضل طبعًا إنه يكون طبيعي.
- انقعي خمس حبات من التين المجفف في الميه من بليل واشربي الميه مع حبات التين الصبح.
- كلي بعض حبات التمر مع شوية لبن.
- اشربي كوباية عصير برتقال طبيعي قبل الفطار.
1 comment
[…] بعد الولادة. هتبتدى تتعايشي مع الحموضة وأوقات الإمساك (هنا علاج الإمساك في فترة الحمل). حاولي تتجنبي الإمساك لأنه متعب ليكي. لو واجهتي مشاكل […]