محتويات المقال
دايمًا بنقول إن طبيعي الحامل تحس بآلام في الأسنان واللثة واللي ممكن توصل للالتهاب الشديد والنزيف، لأن في أسباب حقيقية لإصابة الحامل بنزيف اللثة، لكن هل على الحامل إنها تفضل موجوعة من أسنانها ولثتها طول شهور الحمل؟ وهل علشان هي ممنوعة من تناول الأدوية يبقى خلاص كده تتأقلم مع تعبها؟ طبعًا لا.. الحمد لله في علاج لالتهاب ونزيف اللثة للحامل، وفي طرق وقاية كمان.
تعالي معانا في المقال ده وهنقول على طرق العلاج والوقاية من التهاب ونزيف اللثة للحامل
طرق علاج التهاب ونزيف اللثة للحامل
-
المحافظة نظافة الفم والأسنان
استخدمي فرشاة أسنان بشعيرات ناعمة مرتين يوميًا، وحاولي يكون الاستعمال برفق علشان متسببيش تهيج للثة.
-
استعمال خيط الأسنان
استخدمي خيط الأسنان بشكل دوري لإزالة بقايا الأكل العالق بين الأسنان.
-
غسول الفم
لو مقدرتيش تستخدمي فرشاة الأسنان أو خيط الأسنان، تقدري مبدئيًا تستخدمي غسول أسنان مناسب خالي من الكحول.
-
قللي من السكر
مقدرين احتياجك للسكريات أثناء الحمل، بس إذا بتعاني من نزيف اللثة والتهاباها، فلازم تستبدلي السكريات بالفواكه والخضروات مش بس هتحميكي من أضرار السكر، وكمان هتديكي فيتامينات رائعة لعلاج اللثة.
-
تناولي فيتامينات ما قبل الولادة
فيتامين ج مفيد لصحة اللثة، والكالسيوم هيحافظ على قوة أسنانك، وتقدري تاخدي الفيتامينات على شكل أقراص -تحت إشراف طبيب النساء- أو تزودي من أكل الخضروات والأطعمة المفيدة للحامل ومنتجات الألبان.
-
استشيري طبيب الأسنان
إذا أخدتي بكل طرق الوقاية والعلاج المتاحة ليكي، وملقيتيش أي تحسن، تقدري تزوري طبيب الأسنان وهو هيوجهك للعلاج الصحيح، وهيوصيكي باستخدام معجون أسنان مخصص لحالات التهاب ونزيف اللثة.
علاجات الأسنان اللي لازم تتجنبيها أثناء الحمل
- الحشوات الجديدة أو البديلة.
- الأشعة السينية على الأسنان.
- التخدير.
ولازم طبعًا الحامل تبلغ طبيب الأسنان بحملها علشان ياخد كل الاحتياطات اللازمة أثناء العلاج.
المصادر:
التعليق باستخدام حساب فيس بوك