محتويات المقال
الترجيع أو القيء بيعتبر من الأمور اللي نقدر نقول عليها إنها شائعة في حياة الأطفال من أول فترة الرضاعة لحد بداية المراهقة، والأطباء مش بيعتبروه حاجة خطيرة طول ما نمو الطفل نفسه ماشي في معدله الطبيعي، رغم إن الترجيع أصلا بيخوف الأهل والطفل جدا. عشان كدا، لازم نعرف علاج القيء عند الأطفال.
نزلة البرد العادية في الشتاء .. راحت فين؟
بس ده طبعا لا يعني إن إحنا نتجاهل الموضوع، لأنه أوقات بيكون مؤشر على مشكلة خطيرة بتطلب تدخل طبي سريع، علشان كدة من المهم جدا يكون عندك معلومت عامة هنحاول نتكلم فيها مع بعض في المقال هنا، علشان لو شوفتي حاجة منها تصرفك يكون سريع وصحيح.
زي ما قولنا قبل كدة إن الترجيع أو القيء مشكلة شائعة ليها أسباب مختلفة، زي مثلا فيروس في المعدة، التهابات في الجهاز التنفسي أو المسالك البولية، وتقدري تميزي الحالة دي إن غالبا بتكون مصحوبة بالإسهال.
ومن الأسباب التانية برضه اللي ممكن تسبب الترجيع هي إصابة الطفل بـ : الزكام، التهاب الأذن أوالتهاب في البول.أكل كميات كبيرة من الأكل وخصوصا لو أكل حلو أو دسم، إنه يحس إنه قلقان أو متوتر، ممكن وجود انسداد في الأمعاء، وممكن يكون مصاب بالزائدة الدودية.
علاج القيء عند الأطفال
زي ما قلنا إن في العادة إنه الترجيع مفروض ميكونش مصدر قلق لأنه بيتحسن بسرعة، لكن فيه شوية خطوات هتسرع من التحسن ده وتخلي الموضوع سهل عليكي وعليه:
لازم تعرفي إن في الترجيع طفلك بيفقد كمية سوائل كتيرة من جسمه، علشان كدة من المهم تعرفي تعوضيها إزاي علشان تتجنبي إن يحصله جفاف، تقدري تديه سوائل ولبن، لكن تجنبي العصائر وخصوصا اللي مليانة سكر، وطبعا أي مياة غازية تتجنبيها كمان ، تقدري تديه محلول علاج الجفاف وده سهل توفريه من الصيدلية.
خليه ينام، ده لأن النوم بيساعد الطفل بشكل كبير على الشعور بالراحة والهدوء، علشان كدة حاولي توفري له جو هادي يساعده على النوم بعمق.
متحاوليش تدي إبنك أي دوا مضاد للغثيان إلا بعد إستشارة الطبيب، يعني مش أول ما يحصل الموقف ده تروحي تديه الدواء أو الحقنة اللي بتوقف الترجيع، الموضوع أصلا ممكن يكون بسيط جدا ومش محتاج الإجراء ده.
لما تعدي 12 إلى 24 ساعة على الطفل من غير ترجيع تقدري ترجعي لنظامه الغذائي المعتاد وروتينه العادي، ولو كان طفلك بيروح الحضانة خليه يقعد في البيت مش أقل من 48 ساعة بعد أخر مرة رجع فيها.
أعراض الجفاف
قولنا لك قبل كدة إن فيه شوية علامات لو ظهرت على طفلك يبقى لازم ترجعي على طبيبك، من أهمها وأخطرها ويمكن أكثر شيوعا هو موضوع الجفاف ده، طيب تعرفي إزاي إن طفلك بيمر بحالة جفاف؟، ده اللي هنقولك عليه.
علامات وأعراض الجفاف:
– توقف التبول لمدة ثماني ساعات .
– عياط من غير دموع.
– جفاف والتصاق في الفم وتشقق في الشفايف.
– جفاف في الجلدخصوصا على البطن والذراعين والساقين.
– اختلال في التركيز وتحسيه مرتبك ذهنيا.
– همدان وتحسيه نعسان جدا وقلة واضحة في النشاط.
– بيتنفس بشكل عميق وسريع.
– سرعة في النبض.
– البول لونه غامق.
– تشنجات العضلات.
– العيونه تحسيها داخلة جوة وشه.
– حاسس إن سقعان في الذراعين والساقين.
وعلشان تقدري تتغلبي على الجفاف استخدمي المياة. تقدري تدي طفلك واحد من أنواع محاليل الجفاف اللي الصيدليات بس ده بعد استشار الطبيب طبعا، وده لأنها بتحتوي على العديد من الأملاح اللي جسم ابنك محتاجها لتعويض كل السوائل والأملاح المهمة اللي فقدها الجسم مع الترجيع والإسهال.
ادي طفلك كميات «صغيرة » من السوائل دي بشكل متكرر، لأن لو زودتي فيها وبشكل سريع ممكن تسبب اضطراب المعدة المتهيجة اصلا عند طفلك،وده في حد ذاته ممكن يخليه يرجع تاني وخصوصا للأطفال اللي عمرهم من سنة لـ 6 سنين، ابتدي بملعقة كبيرة من محلول الأملاح الطبي يعني حوالي 15 مليلترا كل 10 دقائق. ولو طفلك أكبر من 6 سنين، ممكن يشربوا 30 مللي كل عشر دقايق وتقدري تضعفي الكمية لو عدت 4 ساعات من غير ما الطفل يرجع تاني، ولو حصل ورجع اصبري ساعة وإرجعي اديه تاني بالتدريج.
علامات أخرى للقلق
اتكلمنا عن الجفاف باستفاضة لأن ممكن تتعاملي معاه لكن في علامات تانية لو ظهرت لازم تروحي مباشرة لأقرب مستشفى، زي مثلا:
- هتلاحظي مشكلة واضحة في قدرة جسمه على الحفاظ على السوائل.
- ظهور ترجيع باللون الأصفر المخضر، أو شبه بالقهوة، أو بيحتوي على الدم.
- الطفل حاسس بألم البطن، أو بطنه تكون محجرة ، أو منتفخة.
- لو الطفل الذكر هتلاحظي إنه بيعاني من انتفاخ، أو احمرار، أو ألم في كيس الصفن.
- هتلاقي إنه بيخس جدا نتيجة فقدان التغذية لما رجع.
- بيكوح جامد أو شرقان.
- بيعامي من حرقة المعدة.
- ولما تحسي إنه بصفة عامة مش في أحسن حالاته.
تقدري تقولي إن هي دي الخطوط العامة اللي محتاجة تعرفيها علشان تعرفي تتعاملي بشكل صحيح في حالة تعرض طفلك للحالة دي في أي وقت، وربنا يحفظ أولادنا من أي سوء يا رب.
التعليق باستخدام حساب فيس بوك