مع بداية الموجة التانية، خلينا نتفق إن مش كل مصابين الكورونا (كوفيد 19) لازم يتعزلوا في مستشفى، ما دام مفيش صعوبة في التنفس ولا ألم أو ضغط في الصدر، والأعراض محتملة في صورة كحة خفيفة وسخونية بسيطة، منظمة الصحة العالمية بتأكد إن ممكن علاج الكورونا في البيت للمريض لكن إزاي تقدري تعالجي فيروس الكورونا بنفسك؟ ده اللي هنشرحه في الخطوات الجاية بالتفصيل وكل اللي ممكن تحتاجيه عن علاج الكورونا في المنزل من أدوية وطريقة العزل المنزلي وتحاليل الكورونا.
خطوات علاج الكورونا في البيت
- اعملي التحاليل اللازمة للتأكد من الإصابة بفيروس كورونا
- اعزلي نفسك عن باقي الأسرة
- ريحي نفسك
- مشروبات وعصائر لزيادة المناعة لمكافحة كورونا
- بروتوكول أدوية وعلاج الكورونا في البيت
- تابعي مع طبيب
- تغذية سليمة وصحية
- حافظي على صحتك النفسية
- نامي كويس
- التزمي بالروتين
- تفائلي
التحاليل اللازمة للتأكد من الإصابة بالكورونا
بمجرد ما نتيجة التحليل أو الآشعة أو المسحة تطلع وتأكد الإصابة بكورونا، أول وأهم خطوة إنك تلزمي بيتك في حالة إنك قررتي علاج الكورونا في البيت وتعزلي نفسك في غرفتك وتتبعي إرشادات العزل بحذافيرها، لكن إيه هي التحاليل والآشعة المطلوبة؟
- تحليل (PCR): عبارة عن عيّنات بيتم أخدها من لعاب الحلق أو عيّنة من خُراج الرئة.
- فحص الأجسام المضادة (Antigen-Tests): وده بيحتاج جهاز معين مش بيتوفر غير في المختبرات.
- فحص إيليزا: بيتم عن طريق اختبار الطرق المناعية الإنزيمية والاختبار ده هو الأكثر دقة لكنه الأكثر تكلفة.
- صورة الدم الكاملة بتبين لو في نقص في كرات الدم البيضا و خلايا الغدد الليمفاوية.
- آشعة مقطعية على الصدر ودي بتوضح الإصابة من عدمها.
ممكن تشوفي هنا مسحة الكورونا: أماكن إجراء تحليل PCR في القاهرة
اعزلي نفسك
- حتى لو لسه معملتيش تحاليل الكورونا وعندك أعراض خفيفة زي السعال والصداع وحرارة مرتفعة، فلازم تعزلي نفسك في غرفة منفصلة عن باقي أفراد الأسرة، وخاصة لو عند في البيت كبار سن أو مرضى سكر أو حوامل.
- لو مكنتيش انتي المريضة ومحتاجة تتعاملي مع حد من أفراد العيلة معزول منزليا فدي مجموعة من أهم نصائح عزل مريض الكورونا في المنزل اللي لازم تلتزمي بيها:
- حافظي على على نظافة إيدك باستمرار واغسليهم بشكل متكرر بالصابون لمدة 20 ثانية على الأقل خاصة بعد مخالطة الشخص المريض.
- البسي كمامة خلال وجودك في نفس الغرفة مع الشخص المريض.
- نظفي بيتك باستمرار وعقمي بالكحول والمناديل الأسطح وكاونترات الطابخ والطاولات وخلي للمريض أدوات منفصلة.
- خلي بالك جدا لما تيجي تغسلي هدوم الشخص المصاب، اظبطي الغسالة على أعلى درجة حرارة والمسي الهدوم وانتي لابسة جوانتي ارميه بمجرد ما تحطي الغسيل في الغسالة.
- ركزي مع الأطباق والكوبايات واسغليهم بمية مغلية وصابون ونظفي ايدك كويس جدا بعد خلع الجوانتي.
- ماتتعامليش مع أي مخلفات للمريض زي البول والبراز والمخاط بأي شكل بدون جوانتي.
ريحي نفسك
أهم توصية في علاج الكورونا في المنزل هي الراحة والاسترخاء التام، كده كده مفيش علاج، لكن في أدوية بتخفف الأعراض حسب شدتها ونوعها والأهم من الادوية الراحة خدي هدنة من كل حاجة عشان تقدري تكملي بعدين لما تخفي.
عصائر ومشروبات لزيادة المناعة
صحيح كوفيد 19 مش بيموت غير عند درجات حرارة عالية جدًا الجسم ما يحتملهاش، لكن بما إن كتير من أعراضه متشابهة مع نزلات البرد، فمن هنا بتيجي أهمية دور المشروبات السخنة والعصائر الطبيعية إلى جانب شرب من 8 لـ 10 كوبايات مية في اليوم هيساعد جدا في تخفيف أعراض الكورونا وإنها بتريح فعلًا بدرجة كبيرة.
- عصير الموز باللبن.
- عصير البرتقال بالجزر.
- مشروب البلح باللبن.
- مشروب الرمان بالبنجر.
- كوكتيل (كيوي + ليمون + نعناع)
- ميكس (برتقال + جزر + تفاح)
- عصير أفوكادو + عسل + لبن.
- عصائر الفراولة والكيوي والمانجو والبطيخ والكنتالوب.
- مشروب دافي ( مية دافية + ليمون + عسل + شريحة زنجبيل )
- مشروب ينسون سخن.
بروتوكول أدوية وعلاج الكورونا في المنزل
الجسم بيتغلب على الفيروس لوحده لأن مفيش دواء واضح بيعالج المرض مباشرة. لكن في طريق المقاومة، الألم أحيانًا بيكون غير محتمل من هنا بتيجي أهمية مسكنات الألم وتقوية المناعة كعنصر مهم في رحلة علاج كوفيد، ومن خلال بروتوكول للعلاج لازم تسألي الطبيب قبل ما تاخدي أي دواء منهم.
- خافض حرارة ومسكن.
- مضاد حيوي وفيروسي.
- فيتامين سي فوار.
- أدوية موسعة للشعب الهوائية ومضادات سعال.
- مسيلات دم زي أسبرين الأطفال.
تابعي مع طبيب
ناس كتير من مصابي كوفيد 19 قرروا إنهم مش هينزلوا من البيت وهيلجأوا للاستشارات الطبية من خلال الإنترنت سواء من خلال خدمات مدفوعة زي مركز استشارات كورونا التابع لتطبيق فيزيتا، أو مجانية زي بعض المجموعات اللي بيتبرع من خلالها بعض الأطباء عشان يساعدوا مرضى كوفيد 19 لوجه الله. وأحيانًا بيفضّل المريض إنه ينزل ويقابل الطبيب وجهًا لوجه، أيًا كان شكل الكشف والتواصل مع الطبيب لازم يكون في متابعة ووصفة دقيقة للأدوية لأن الطبيب هو بس اللي يقدر يحدد مدى احتياج المريض للأدوية الخاصة بتخفيف أعراض كوفيد واللي بتختلف في أوقات كتير من شخص للتاني حسب الحالة الصحية والعمر وعوامل تانية كتير. المهم يكون فيه متابعة والتزام بالأدوية الموصوفة في مواعيدها.
تغذية سليمة وصحية
- نبعد عن المحمرات والأكل السريع من بره البيت.
- نركز على الفواكه الطازجة والخضروات زي ( الجزر والسبانخ والبطاطا والقلقاس) والبقوليات زي (العدس والفاصوليا) وكل الأكل الخفيف اللي يفيد الجسم بدون ما يرهقه أو يعطله عن معركته مع فيروس كورونا.
- نركز على أطعمة ( اللحوم والأسماك والبيض واللبن).
اعرفي 5 حاجات ما ينفعش تقوليهم لمريض كورونا
حافظي على صحتك النفسية
الخوف والقلق والتوتر ممكن يأثر على حالتك الصحية، خاصة مع طول فترة الحجر الصحي، لو في ضغوط نفسية ممكن تبدأي تلتمسي دعم عاطفي من الأصدقاء والحبايب بمكالمات تليفون أو مكالمات فيديو، ما تتفرجيش على أخبار وحشة، خصوصًا الأخبار المتعلقة بكوفيد 19 وأخبار سلالاته، انسيه تمامًا، اتفرجي على أفلام حلوة، شوفي ألعاب ممتعة على الإنترنت، اقرأي كتاب مميز، اعملي نشاط مسلي.
نامي كويس
النوم بيجدد الخلايا وبيساعدك تقاومي المرض وتكوني أحسن في وقت أقل.
التزمي بـ روتين
الروتين هيساعدك جدًا إنك تمضي فترة الحجر بسهولة وده بيشمل وقت للاستحمام ووقت للبس، ووقت للأكل ووقت للرياضة ووقت لتمارين التنفس والتأمل وبكده اليوم هيخلص بسرعة.
تفائلي
تقدري تسيبي غرفتك بعد 10 أيام على الأقل من بداية الأعراض، ما دام عدى 24 ساعة أو أكتر بدون سخونية وبدون دواء خافض للحرارة، ما تقلقيش من استمرار فقدان حاسة التذوق والشم. ممكن تفضل بالوضع ده لأسابيع أو شهور لكن هتسترديها في النهاية وده مالوش علاقة بفترة عزلك تمامًا، وتقدري تتأكدي إنك خفيتي تمامًا وما بقتيش حاملة للعدوى بالفحوصات اللي هتأكد إذا كان لسه فيه أثر لكوفيد ولا لأ.
التعليق باستخدام حساب فيس بوك