علاج النوم الخفيف عند الرضع واحدة من أكتر المعلومات اللي بتدور عليها الأمهات خلال التلات سنين الأولى من عمر الطفل، لأن النوم الخفيف معناه قلق أكبر وتوتر عام في البيت وأم مش قادرة ترتاح أو تشوف اللي وراها، والمفاجئة إن في بعض النصايح والتدابير البسيطة ممكن تتعمل وفعليًا بتساهم في علاج النوم الخفيف خاصة لما تحددي بوضوح أسباب النوم الخفيف عند طفلك، ساعتها هتقدري وبقوة إنك توصلي معاه لمرحلة النوم العميق.
مش كل الأطفال نومهم زي بعض، فيه أطفال نومهم بيكون أسوأ من أخواتهم، بيناموا بطريقة خفيفة جدًا وبيصحوا بسرعة بطريقة غريبة، بيصحوا لو عصفورة زقزقت أو باب اتقفل أو حتى جار زعق. النصايح دي هتساعدك كتير، بس المهم ركزي معانا:
نصائح علاج النوم الخفيف عند الرضع
خليه ينام لوحده!
الجمعية الكندية للصحة العامة بتقول إن الطفل بعد سن 6 شهور مفروض ينام لوحده في سرير منفصل. لما هينام لوحده في غرفة منفصلة، فرص صحيانه بسبب دوشة باقي أفراد البيت هيقل، اقري كمان: ابني رافض ينام في أوضته ومصمم ينام جمبنا
ظبطي الجو
الحر الشديد أو البرد الشديد أسباب إضافية بتخلي الطفل يقريف، ولأن تظبيط الشغل أهم من الشغل، فتظبيط النومة أهم من النومة نفسها. لذلك هتخدمي نفسك جدًا بوجود الستائر البلاك أوت، والتكييف في غرفة طفلك. اقري كمان: افكار ونصايح لتغطية البيبي في الشتاء
جربتي “الضوضاء البيضاء”
أول مرة سمعت فيها مصطلح الضوضاء البيضاء، استغربت جدًا وبدأت أعمل بحث واكتشفت إن فيه كم عظيم من مقاطع الفيديو على يوتيوب تحت اسم White Noiseواللي فعليا بتساعد البيبي جدا إنه ينام لو شغلتيها بصوت هادي جمبه.
مشيه
صحيح هو حل صعب لكن سحري، لو يأستي وحاسة إن النوم مستحيل هيحصلك النصيحة الذهبية خديه وانزلي اتمشي شوية، تمشية مش كبيرة كفيلة تخليه ينام في ثواني لو ده معاد نومه.
جمدي قلبك
أمهات كتير بمجرد ما البيبي يعيط ويقريف تبقى مش عارفة تتصرف إزاي وتجري من اليمين للشمال، واحدة من أهم التقنيات المهمة في التعامل مع البيبيهات واللي بتساعدهم إنهم يناموا بعمق مع الوقت إنك تسيبيه يهدي نفسه بنفسه، يعني لما يعيط ماتجريش اديله فرصة يلاقي طريقة يهدي نفسه وده على مدار اليوم بالطريقة دي لما يصحى بسرعة بعد النوم هيلاقي طريقة عشان يهدي نفسه ويرجع ينام تاني.
التعليق باستخدام حساب فيس بوك