كل طفل بيختلف في طبيعته وردود أفعاله ودرجة تأقلمه مع العالم والتغيير اللي حواليه بطريقة مختلفة عن باقي الأطفال. فيه طفل أول ما يدخل حضانة أو مدرسة جديدة، تلاقيه منطلق ومتشعب ومصاحب الكل في ثانية. وفيه طفل بياخد وقت وفرصة كبيرة لحد ما يتعود ويتبسط في الحضانة. بس اللي بيجننا لما بنلاقي الطفل مبسوط قوي في الحضانة ومتفاعل مع اللي حواليه ومستمتع، بس في نفس الوقت هو كل يوم بيعيط الصبح ومش عايز ينزل وبيدخل بالعافية! وبيكون صعب جدًا علاج بكاء الطفل وقت الذهاب للحضانة كل يوم الصبح. لما نسأل المدرسات ونطلب نشوف الكاميرات ونلاقيه مبسوط جدًا جوا الحضانة وهارينا عياط في البيت وهو نازل كل يوم!
أسباب بكاء الطفل عند الذهاب إلى الحضانة
طب ليه بقي ده بيحصل ونعمل إيه؟
-
الطفل مش نايم كفاية
أوقات لما بنسيب الأطفال تسهر شوية أو نغير روتين النوم أو ما يكونش في روتين نوم أصلًا وسايبينهم بمزاجهم، بيصحوا مرهقين ومقريفين.
-
خايف يفوته حاجة
لما الطفل بيبقى نازل مع نفسه وشايفنا كلنا قاعدين مريحين في البيت أو شايف أخوه أو أخته الصغيرة اللي لسه ما راحش حضانة متدفي في حضنك وهو نازل لوحده.
-
طفلك مكسل
ودي بقى حاجة أنا باشوفها مع ابني كل يوم بعيني حتى لو كل البيت نازل. هو قاعد على الكنبة مريح جوا الكومفورت زوون بتاعته ومكسل ينزل للعالم الخارجي أصلًا. فبيبدأ وصلة الزن والعياط أول ما يعرف إن فيها نزول. ودي بتختلف قوي من شخصية طفل للتاني.
واللي طبيعي جدًا بيكون عند الأطفال في السن ده وأوقات بيكمل معاهم لأول سنة أو اتنين من المدرسة. المهم في تعاملنا معاه، نحسس الطفل بالقبول وإننا مش زهقانين من لزقته فينا.
علاج بكاء الطفل وهو رايح الحضانة
طيب ممكن نعمل إيه نقلل بيه وصلة العياط الصباحية اليومية ده؟
-
وضع روتين صحي
الروتين اليومي وروتين النوم من أكتر الحاجات اللي بتساعد على التزام الأطفال وتعودهم على النظام من بدري وبتقلل الصراعات كتير قوي.
-
اختيار الحضانة المناسبة
طبعًا مهم إنك تختاري حضانة مبهجة وتكوني متأكدة من تعامل الناس مع الطفل في الحضانة، ومتأكدة إنه مفيش ضغط أكاديمي على الولاد الصغيرين، ومهم كمان إنك تكوني مهيئة نفسيا كفاية قبل خطوة الحضانة.
-
كواليتي تايم صباحي
حاولي تصحوا ولو ربع ساعة بدري تقعدي فيها مع الطفل تشبعيه منك قبل بداية اليوم لعب وهزار عشان ينزل فايق والموود بتاعه رايق.
وفي النهاية، ما تنسيش: المهم تتأكدي إن الحضانة اللي اختارتيها هي بيئة أمان فعلًا للطفل، وإن مفيش حاجة ممكن تأثر على نفسيته بالسلب ومخلياه مقريف من الحضانة دي بعينها.
التعليق باستخدام حساب فيس بوك