في تغييرات كتير بتحصل لجسم السيدة أثناء الحمل، والجلد من أكتر الحاجات اللي بتتأثر بالحمل بعد البطن طبعا، فمش بس جلد البطن اللي بيبان عليه علامات التمدد لا دي أماكن كتير في الجسم ومن ضمنها تشقق جلد القدمين، وده بيخلي الحامل تحس بالزهق والضيق من ملمس رجلها وكعبها وشكلهم كمان.
الكعوب المتشققة أثناء فترة الحمل حاجة بتشتكي منها أغلب الأمهات وهي بتحصل نتيجة للتغييرات في وزن الأم فالكعب بيحاول يتوسع، وده بيسبب تشققات لو الجلد كان ناشف جدًا.
في المقال ده هنعرفك على طرق لعلاج تشقق قدميك في فترة الحمل:
أولًا: علاجات طبيعية منزلية لتشقق القدمين
أهم خطوة عشان تحافظي على صحة رجليك إنك تلبسي حذاء مناسب يسمح لبشرتك انها تتنفس مع حرصك على أكل صحي متوازن.
- هتحتاجي لـ ” حجر ملح خام، عصير ليمون، شوية جلسرين، مية ورد” وتحطي المزيج ده مع نص لتر ماء دافي وتنقعي فيهم رجلك لمدة ربع ساعة، وبعدها ممكن تستخدمي حجر القدمين أو أي مقشر مناسب عشان تتخلصي من الجلد الميت وممكن تخلطي المكونات دي، وتحطيها على رجلك من غير الميه من بالليل وتغسليها الصبح أو بعد نص ساعة حسب حساسية بشرتك.
- ممكن تستخدمي الموز المهروس وتحطيه على مكان التشققات من ربع لتلت ساعة وبعدين تغسليه بميه دافية وممكن تستخدميه على طول كعلاج للتشققات.
- لو وجود تشققات خفيفة في قدميك ممكن تستخدمي نص ثمرة جوز الهند، موز مستوي، ونص ثمرة أفوكادو، واخلطيهم كويس لغاية ما يكون عندك قوام ناعم وحطيهم على القدم، الزيوت الطبيعية الموجودة في الفواكة دي هتساعد على مقاومة تشقق القدمين و علاجهم.
- ممكن تستخدمي زيوت طبيعية زيت زيت الزيتون واللوز عشان ترطبي بشرة قدمك بالترطيب المناسب لها.
- ممكن تعملي مقشر طبيعي لرجلك في البيت باستخدام عسل النحل مع خل التفاح وشوية دقيق رز، وانقعي رجلك في ميه دافية لمدة تلت ساعة وبعدين ضعي الخليط ده طول الليل واغسلي تاني يوم الصبح.
- ممكن تستخدمي مزيج الفازلين والليمون، بإنك تغسلي القدم كويس وتنقعيها في ميه فاترة لمدة ربع ساعة بعدين تحطي خليط الفازلين والليمون مع التدليك كل فترة عشان تضمني تشرب البشرة للمزيج مع تركه طوال فترة الليل وغسله الصبح.
- امزجي دقيق الشوفان مع شوية من زيت الزيتون لغاية ما تحصلي على مزيج قوامه كويس وضعيه على القدمين لمدة نص ساعة واشطفيه بعدها بميه فاترة .
- تدليك القدم بزيت السمسم مع تركه طول الليل بيساعد في التغلب على تشققات القدمين.
حلول تانية لعلاج تشقق القدمين أثناء الحمل
في أساليب تانية ممكن تساعد على راحة قدم الحامل وتحافظ عليها من التشققات زي:
- رفع القدمين.
- لبس الأحذية المناسبة.
- لبس الشرابات اللي مش بتحد الدورة الدموية.
- فترات راحة منتظمة لتمدد الساقين أثناء فترات الجلوس الطويلة.
- حافظي على نشاطك البدني من خلال تمرين خفيف زي المشي.
- الحفاظ على رطوبة الجسم عن طريق مياه الشرب وتجنب الأطعمة عالية الملح.
أسباب التهاب ونزيف اللثة خلال فترة الحمل
مع تمنياتنا ليكي بالصحة والسلامة.
المصادر:
news-medical.net
madeformums.com
dailymedicalinfo.com
التعليق باستخدام حساب فيس بوك