محتويات المقال
وجع الثدي بعد الفطام أمر طبيعي ومتوقع، أحيانا بيكون الم في الثدي اليمين أكبر من الم الثدي الأيسر، أو في الاتنين، وعموما هو شعور مزعج جدا، خاصة وإن الأم بتكون في حالة نفسية سيئة بعد فطام الطفل، وما بتكونش مستحملة أصلا أي خبطة أو لمسة من شدة الاحتقان، يعني بيكون ألم نفسي وبدني في نفس الوقت، عشان كده قررنا نتكلم عن المشكلة دي وحلولها البسيطة اللي هتساعدك إنك تعدي الفترة دي بأقل ألم عشان تقدري تتعاملي مع مشاعر طفلك الغضبانة بسبب الفطام.
أسباب ألم الثدي بعد الفطام
الفكرة كلها إنك لما بتوقفي رضاعة فجأة القنوات اللبنية بيحصلها انسداد ومن هنا بيحصل التهاب الثدي، وعلى حسب مرحلة الرضاعة بيكون الألم، يعني لو انتي في مراحل الرضاعة الأخيرة في نهاية السنتين وطفلك بدأ ياكل ومش بيرضع كتير الالتهاب هيكون بسيط أم لو انتي في السنة الأولى واضطريتي لأي سبب للفطام هنا بتكون المشكلة أكبر لأن تدفق اللبن كبير جدا وبالتالي بتكوني محتاجة مساعدة حقيقية.
هنا ممكن تشوفي تجربتي مع الفطام..فطمت بنتي مرتين
ليه الأمهات بتوقف رضاعة أصلا؟
أسباب وقف الرضاعة كتير جدا منها
- تقرحات وآلام الثدي خاصة وقت تسنين الطفل
- الحليب غير كافي
- انشغال الأم وبعدها عن الطفل لأي سبب
- وصول الطفل لسن الفطام
أعراض آلام الفطام
انتي هتحسي إنه وجع لا يحتمل من شدته مش هتقدري تحددي هو جاي منين لكن في الواقع هو بيكون في مناطق معينة زي:
- ألم في الهالة المحيطة بالثدي
- ألم متكرر في أحد الثديين أو كليهما
- ألم حاد في الأيام الأولى من الفطام بيقل ببطئ مع مرور الوقت
- تقل أو شد في الثديين
- أعراض شبه الأنفلونزا، أيوة رعشة وقشعرة وتعب وممكن توصل لسخونية
- قلق وشعور بالضيق
- احمرار الحلمات
- تسرب الحليب من الحلمات نتيجة احتكاك الثدي بالملابس
- إصابة الثدي المصاب بالحرارة والتورم واحساس حرقة
الألم الثدي بعد الفطام بتستمر لمدة قد إيه؟
وجع الثدي بعد الفطام ممكن يستمر لأيام أو أسابيع، بس الأكيد إنه المفروض بيقل أو بختفي مع الوقت، لكن لو الموضوع بيزيد مش بيقل في اللحظة دي انتي محتاجة ترجعي للدكتور.
علاج وجع الثدي بعد الفطام
خليكي عارفة ومتأكدة إن كل ده مؤقت وهايختفي مع الوقت والخطوات اللي جاية دي هتساعدك في إنك تعدي المرحلة بسلام:
- الفطام التدريجي هو الحل رقم 1، لانه هيقلل كمية اللبن التدريجي عندك وهايخلي طفلك يتقبل الفطام بهدوء مع الوقت، لا انتي ولا الطفل هاتعانوا زي ما بيحصل في الفطام المفاجئ ..خدي بالك.
- خدي حمام دافي، ده هيخلي أنسجة الثدي مرنة ويسهل تدفق الحليب المتراكم ويخفف الضغط والألم
- اعصري اللبن أو اشفطيه، في وجهة نظر غريبة بتقولك لا إوعي تخرجي اللبن عشان تخلصي بسرعة، طبعا الكلام ده غلط، لأن اللبن اللي هيخرج بالعصر اليدوي أو الشفط كمية قليلة جدا، هتخلي المسألة تخلص بالتدريج بدون احتقان أو أذى
- تدليك الثدي واحدة من أهم الطرق اللي بيوصي بيها أطباء النساء وخبراء الرضاعة، هتحسسك براحة خاصة لو الكلام ده حصل تحت المية السخنة.
- كمادات باردة ، لو انتي في الصيف الكمادات الباردة هتقلل التورم والألم كتير
- نامي كويس جدا، النوم شكل من أشكال الاستشفاء، الجسم بيعيد بناء نفسه من أول وجديد في النوم .. ماتحرميش نفسك من النعمة دي خاصة إنك أخيرا مش مضطرة تقومي بالليل عشان الرضاعة.
- اشربي مية وسوايل كتير عشان ماتدخليش في مرحلة جفاف أو حمي
- المريمية والبقدونس بيساعدوا على تقليل إدرار اللبن
- لو كل الكلام ده مفرقش انتي محتاجة دوا مسكن ودواء لتقليل التورم عشان تعدي المرحلة بسلام
- ماتلبسيش حمالات صدر ضيقة عشان المشكلة ماتزيدش.. البسي لبس واسع ومريح
اقري كمان: إزاي نفطم البيبي من التتينة (اللهاية)
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك