كتير مننا بتقع في حيرة يا ترى إحساسي صح إن هو بيحبني؟ كام مرة جه السؤال ده في بالك خصوصًا لما يكون الشخص اللي محتارة في تفسير تصرفه ده صديقك الأقرب best friend؟ بتكوني محتارة ده حب ولا مجدعة ولا أخوة ولا إيه؟ بس الحقيقة إن طالما الشعور ده تسلل لقلبك، والسؤال خطر على بالك، يبقى لازم تعرفي إن الموضوع مش بس صداقة. وعلشان تتأكدي هنقول لك مجموعة علامات الحب اللي هتعرفي منها إنك انتي والـbest friend مش أصحاب وبس من خلال تصرفاته هو.
علامات الحب عند الرجل
بيفتكر تفاصيلك
هتلاقي دايمًا إنه فاكر تفاصيل صغيرة تكوني قلتيها من فترة لكن على الرغم من كده هو فاكرها.
لغة الجسد بتقول كل حاجة
مهما امتنع عن التصريح، فجسم الإنسان بيتكلم لغة منفصلة عن اللسان، ودايمًا اللغة دي صادقة، هتلاقي مثلًا إنه:
- رفع الحاجبين لما يشوفك بمعنى التحية مش إنه مستغرب منك.
- بيقف مدة طويلة وهو فارد جسمه علشان يبين نفسه أطول منك.
- هتلاحظي إنه بيعدل من هدومه باستمرار علشان يفضل محافظ على أناقته قدامك.
عايز يحميكي ويدافع عنك دايمًا
صحيح دلوقتي مش زي زمان أبدًا، البنات والستات يقدروا يعملوا كل حاجة بنفسهم ويدافعوا عن نفسهم كويس، لكن جزئية الراجل المدافع دي غريزة في كل واحد وبيحب دايمًا يظهرها وهو في محيط المرأة اللي بيحبها.
بيسمع لك أكتر، بيتكلم أقل
وده بيحصل لما هو يكون عنده فضول أكبر في إنه يتعرف عليكي ويحفظ تفاصيلك، هتلاقي دايمًا إنه بيسأل وبيسمع الإجابة كويس وبيرجع يسأل تاني علشان يخلي المحادثة بينكم مستمرة، ودي من العلامات الإيجابية جدًا.
وقته معاكي مقدس
دي مش واحدة من علامات إخفائه لحبه إنما كمان إظهاره لحبه، وده لأن في عز كل المسؤوليت اللي على كتف كل واحد فينا إنه يخصص لك وقت ده معناه إنك مهمة جدا عنده حقيقية.
مش قادر يخبي غيرته
مهما كان الرجل الغامض بسلامته، بس حقيقي الغيرة شعور لا يمكن إخفائه. وهو أحد أقوى علامات الحب عند الرجل، هتلاقي بيسألك كتير لو شافك واقفة مع حد تاني، أو بيراقب من بعيد لو شافك مع حد غيره وملامحه متغيرة وشبه غاضب.
دايمًا بيضحك وبيبتسم معاكي
علشان بيكون شايفك أكتر حد لطيف وجميل في الدنيا، وبيكون حقيقي مرتاح في وجودك، هتلاقي إنه مبسوط بوجودك حتى لو هو شخصية صارمة بطبيعته.
بيعملك لايك وكومنتات على السوشيال ميديا
الأشخاص اللي بطبيعتهم بيخبوا مشاعرهم أو مش سهل عليهم يعبروا عن مشاعرهم، بيلاقوا في السوشيال ميديا وسيلة مريحة جدًا للتعبير. فلو لاقيتيه بيعمل لايك أو كومنتات كتير على البوستات بتاعتك يبقى لازم تعرفي إنه مهتم جدًا بيكي.
نظرة عينه ليكي مختلفة
دايمًا هتلاقيه بيبص لعينيكي، ودي من العلامات الإيجابية للحب لأنه عايز يتواصل معاكي ومش عايز يعدي وقت من غير ما يكون شايفك، وهتلاقي لما يشوفك بتبصي في عينيه إنه ارتبك جدًا.
زعلك بيفرق معاه
هتلاقي فعلا مستعد إنه يشاركك كل مشاعرك حتى الحزين والكئيب منها، وكمان بيحس بنفس طريقة إحساسك، وهتلاقي إنه بيحاول بجهد حقيقي يخرجك من أي موود حزين.
بيستخدم كلمة “احنا” كتير
هتلاقي إنه بيعتبر وجودك شيء أساسي في حاضره ومستقبله، ودايمًا بيتكلم عن المستقبل بصيغة احنا، وإنك موجودة فيه، فهو عايز فعلًا مشاركتك في كل اللي جاي.
تقدري تقولي إن دي علامات أساسية هتقدري من خلالها إن الموضوع أكبر من أصدقاء، بس فيه علامات لو لاقيتيها في سياق علاقتكم يبقى لازم تعرفي إن اللي بينكم صدقاء بس، زي:
- بيتكلم عن بنات تانية في حياته معاكي.
- مش بيكلمك غير في الوقت اللي يناسبه يعني الموضوع بيخضع لمزاجه بس.
- بيهتم بيكي زي غيرك ومافيش أي حاجة خاصة ليكي.
- هو اصلا في علاقة تانية وبيحب يكلمك عنها علشان بس تضايقي وتحسي بالغيرة.
دلوقتي بعد العلامات دي يا ترى لسه ما عرفتيش جواب سؤالك؟
التعليق باستخدام حساب فيس بوك