محتويات المقال
ليه أنا تعبانة ومرهقة كده؟ .. ليه ابني مختلف بالشكل ده وعندي إحساس إنه أصعب من باقي الأطفال؟!”
السؤال ده لو لاقيتي نفسك بتسأليه كتير، يبقى انتي محتاجة تعرفي أكتر عن الأطفال الهاي نييد. هاي نييد High need باختصار يعني طفل متطلب جدًا، طول الوقت محتاج حاجة وبيزن عشانها، احتياجاته ما بتخلصش وده بيبان من الأسابيع الأولى بعد الولادة، وحتى خلال الحمل، طفلك طول الوقت مش مستقر وهو في بطنك، بيحاول ياخد مساحة أكبر من المتاحة ليه جوه باختصار هو طفل من ذوي الاحتياجات “العالية”، غضبه وصريخه الدائم مش بسبب تقصيرك لكن بسبب شخصيته. لما بتشوفيه جنب أي طفل تاني بتحسي إن في حاجة غلط، هو مش زي باقي الأطفال، مش هادي ومش سهل، لإنه طفل “هاي نيد”. عاوزة تعرفي عنه أكتر دي سماته.
مشاعره حادة
الطفل الهاي نيد بيبان من لحظة الولادة، محتاجة رعاية خاصة، يعني لو في حضانة وسط أطفال بعد ولادته، هيبكي لحد لما ممرضة تشيله وتروح بيه في مكان خاص بيه هو، مش هيبطل عياط غير لما يحصل اللي هو عاوزه. كل حاجة بتحصل بطريقة مبالغ فيها في حياة الطفل الهاي نيد، الضحك بشدة، والعياط بشدة، وحتى الاحتجاج بشدة، الزعل بيكون انهيار، باختصار طفل هيخليكي طول الوقت في محاولة مستمرة إنك ما توصليهوش لمرحلة الغضب ودي مش حاجة سهلة لإنه طول الوقت مفيش حاجة بتحصل زي ما هو عاوز.
عنده فرط نشاط
طفلك الهاي نيد مش هيقعد على بعضه دقيقتين، هتروحي تعملي اختبار فرط حركة هيطلع طفل عادي غالبًا، لكن في نفس الوقت هو طول الوقت بيتحرك بطريقة موتّرة، مستحيل يسترخي أو يهدى، لو حاولتي تحضنيه عشان يهدى مش هيتقبل. طفلك الهاي نيد مش من الأطفال اللي هيتقبلوا اللفة “التقميط” بعد الولادة، حتى حضن الرضاعة هتلاقيه بيفرك، هو مش طايق يلزق فيكي، وفي نفس الوقت جعان ومحتاج يرضع. في اللحظة دي، الرضاعة بتتحول لماراثون مين يفرهد الأول، لما طفلك يكبر شوية، مستحيل هتقدري تاخدي له صورة وهو ثابت مثلًا، كل صوره هتكون مهزوزة غالبًا لأنه ما بيقدرش يثبت أبدًا.
هيستنزفك
دي أسوأ نقطة بخصوص الطفل الهاي نيد، عاوز أم “سكة حديد” ما بتعطلش وما بتتعبش ومفيش حاجة وراها أبدًا غيره، طفل بيشفطك لآخر قطرة، ما بيخليش عندك نقطة طاقة لحاجة غيره. لما بتعرفي المعلومة دي، بتبدأي ترفقي بنفسك كأم، انتي أم لطفل هاي نيد لازم تكوني عارفة إنك بطلة، مش شرط تعملي حاجة تاني غيره، هو طفل ومحتاجك وبيكبر وكل ده هينتهي مع الوقت، صحيح انتي كأم ما عندكيش أجازات لكن مش كل الأيام هتكون بنفس الصعوبة.
بيرضع كتير نسبيًا
الطفل العادي هيرضع لما يجوع، الطفل الهاي نيد هيرضع حتى لو مش جعان، لإن الرضاعة بتحسسه بالراحة، لو ما كانش من النوع المذكور فوق اللي بيكره التلامس والأحضان، في الحالة دي الرضاعة هتتم بعدد مرات ضخم جدًا لإنه مش بيرضع جوع، هو بيرضع احتياج للرضاعة في حد ذاتها.
متطلب
طول الوقت بيطلب حاجة، وطول الوقت سابقك، ما بتلحقيش تلبّي طلب تلاقيه طلب اللي بعده، ما عندهوش استعداد ينتظر، بيلح ويزن ويكربجك، حتى وهو طفل رضيع، باختصار بيبرمجك كأم إنك طول الوقت في سباق لا ينتهي لتلبية احتياجاته اللي مش بتنتهي أبدًا.
بيقلق كتير وسط النوم!
كأم لطفل هاي نيد هتتخيلي إن الطاقة الجبارة ليه وهو صاحي معناها إنه هينام كتير عشان يبقى فايق لكن الإجابة الحزينة إنه لأن، الطفل الهاي نيد مش زيك نفسه ينام من كتر التعب، بيصحوا كتير جدًا، وبيناموا بصعوبة رهيبة، باختصار النوم معاناة ليهم ومعاهم.
صعب يتراضى
منتهى طموح الأمهات إن أولادهم يكونوا راضيين وسعداء، لكن في المقابل، محاولة إرضاء الطفل الهاي نيد زي الحفر في المياه، ده بيخليكي تحسي طول الوقت إنك مقصرة ووحشة جدًا، لكن المفاجأة إنك زي الفل، المشكلة مش عندك، ما دام بتعملي اللي عليكي، دي شخصيته ومع الوقت هتفهميها أكتر.
ما تتوقعيهوش
ما بتصدقي توصلي لصيغة تفاهم معاه، هوب تلاقيها ما بقتش شغالة، اللي نجحتي فيه معاه امبارح مش هتعرفي تعمليه النهارده، كأنكم في مباراة كل ما تكسبي يزود عليكي وقت اللعبة والرهان، ما تقدريش تتوقعي غضبهم جامح، ولما بيغضب دون ما تتوقعيه بيخلي كل الناس تعرف قد إيه هو غضبان ومتضايق ومحبط. عشان كده، دايمًا بتكوني في حالة خوف إنه يوصل للمرحلة دي خاصة مع السمة اللي ذكرانها فوق إنه مش متوقع أبدًا.
حساس جدًا
بيقلق من أقل حاجة، بتحسي معاه إنك ماشية على قشر بيض، طول الوقت خايفة وقلقانة أحسن يتضايق، لإنك عارفة إنه أقل حاجة بتقلقه، لو حد غيرك اتعامل معاه يقلق، لو أي صوت حصل ولو بسيط يصحوا، متحفزين طول الوقت. على قد ما هي حاجة متعبة جدًا، لكن الخبر السعيد إن الطفل الهاي نيد، أو ذو الاحتياجات العالية دايمًا بيحس بالآخرين لو طفل في الفصل محدش بيلعب معاه هم هيحسوا بيه وهيروحوا يكونوا أصدقاء له، باختصار هم حساسين لكن حنينين جدًا.
ما بينزلش من على دراعك
البيبي الهاي نيد من علاماتهم الأساسية حب التلامس، طول الوقت عاوز يلمسك، صدرك إيدك رجلك، أي حاجة منهم، مش سهل تسيبيه وتعملي حاجة، عاوزك طول الوقت شايلاه.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصدر
التعليق باستخدام حساب فيس بوك