شم النسيم قرب خلاص، وشم النسيم يعني تلقائيًا كده فسيخ. وطالما فيها فسيخ يبقى لازم ناخد حذرنا، الفسيخ له شعبية ومحبين وتقريبًا ألتراس. فيه ناس لما تشوف سمكة البوري المتحولة للفسيخ غالبًا عينيهم بتنور من فرط السعادة. بس على الرغم من قصة الحب ذات الرائحة دي، إلّا إنه ده لا يمنع إننا واحنا بنجيبه ناخد بالنا من كام حاجة علشان نتجنب خطر الإصابة بالتسمم لا قدر الله.
مبدئيًا قبل ما أقول لك على علامات الفسيخ الفاسد، فيه قواعد عامة كده لازم تتبعيها في شراء الفسيخ أو حتى الرنجة اللي هي:
- لازم يكون المكان مضمون.
- هاتيها مغلفة وعليها تاريخ صلاحية.
- لازم تكون متخزنة في درجة حرارة 20 تحت الصفر.
- عمر السمكة ما يزيدش عن 6 شهور.
وبعد ما عرفتي القواعد العامة دي، تعالي أقول لك ازاي تخلي بالك من علامات الفسيخ الفاسد:
- لون لحم الفسيخ: الفسيخ السليم لون لحمه وردى أو أحمر زاهي. فلما تقطّعي السمكة بشكل طولي وتفتحيها، وتلاقي لون اللحم مايل للون البني أو الأسود أو الأحمر الغامق، يكون ده فسيخ فاسد.
- القوام: قوام السمكة لازم يكون متماسك والجلد خالي من أي علامات أو ألوان غريبة، يعني لما تمسكي السمكة، تحسي إن جسمها شبه صلب. لما تضغطي عليها بصباعك، مش بتغرز. لكن السمكة الفاسدة بيكون قوامها طري وتحسّي إن اللحم شبه مهري جوه الجلد، لما تلاحظي العلامة دي، ابتعدي تمامًا عن السمكة دي.
- تسريب المياه: الفسيخ الفاسد لما تيجي تقطعيها أول حاجة هتلاحظيها إنها مليانة سوائل غريبة اللون والرائحة. لكن سمكة الفسيخ السليمة مش بتتسرب منها أي سوائل.
- الرائحة: الفسيخ الفاسد بيكون له رائحة عفن وتنتن غير محتملة أبدًا، على عكس الفسيخ السليم ريحته وإن كانت نفاذة إلا إنها مقبولة.
- لون الخياشيم: من المهم في الفسيخ السليم يكون لون الخياشيم زاهي اللون. لو حسيتي إن لونها غامق أو عليها طبقة لزجة يبقى الفسيخ ده فاسد.
- الجلد والعين: مهم إن الجلد يكون موحد اللون، يعني ما تظهرش عليه أي علامات لونية أو يكون مهري أو قشر الجلد بيتنزع بسهولة. لأن دي كلها علامات على الفساد.
كل اللي فات ده هي أهم وأشهر علامات فساد الفسيخ. فأرجوكي لو حصل ولاحظتي أي علامة من العلامات دي على الفسيخ أو حتى شكيتي، تجنبي أكله لإنك لو ما كلتيش فسيخ في شم النسيم هيكون أفضل مليون مرة من التعرض لأي خطر صحي. وفي الآخر ما تنسوش تشربوا كميات مياه كبيرة وتاكلوا خضروات ورقية مع الأكلة العظيمة دي لتخفيف العطش ومنع حبس المياه في الأجسام بسبب الأملاح. وكل سنة وانتوا طيبين.
المصدر:
www.dostor.org
www.msn.com
www.masrawy.com
www.elbalad.news
التعليق باستخدام حساب فيس بوك