محتويات المقال
يؤسفنا نقول لك إن الصورة السينمائية اللي بتظهر لنا في الأفلام والمسلسلات عن الولادة مالهاش أي صلة بالواقع. الولادة ليها طبيعة مختلفة تمامًا، يعني موضوع إن الحامل تصرخ من ألم الطلق وتنتهي الصرخة بصوت صرخة البيبي في دقائق ده مش في قاموس الولادة الطبيعية. الحقيقة إن الولادة الطبيعية قد تستمر لأيام، من أول ظهور العلامات الواضحة والصريحة للولادة وصولاً لوصول المولود. وعلشان ممكن تلتبس عليكي العلامات بين إحساسك الطبيعي بالتعب في الفترة دي، وما بين إنك دخلتي في ولادة حقيقية، جبنا لك هنا أهم العلامات اللي لو ظهر حتى واحد منها معاكي، لازم تنتقلي للمستشفى فورًا، لأن النونو جاي.
علامات وأعراض الولادة:
-
سقوط/نزول البطن للأسفل
قبل الدخول في الولادة أو المخاض، هتلاقي إن ارتفاع بطنك نزل. وده له كذا سبب، الجنين نزل الحوض، حتى إنك ممكن تحسي إن الضغط اللي كان موجود على حجابك الحاجز خف، لإن وزن الجنين دلوقتي فعليًا موجود كله في عنق الرحم. لدرجة إنك ممكن تحسي بعدم الراحة وبعض الانقباضات اللي بتستمر ثواني، وبتختفي على فترات متباعدة خلال اليوم واللي هي مختلفة تمامًا عن انقباضات الولادة النهائية.
-
اتساع وتمدد عنق الرحم
من العلامات القاطعة برضه إنك دخلتي الولادة هي تمدد عنق الرحم أو بمعنى تاني انفتاح. بيقوم الطبيب المختص أو الطبيب اللي بتتابعي معاه الحالة قياس مدى الاتساع ده، واللي بيتراوح بين: صفر، يعني مفيش ولادة وصولًا لعشرة واللي يعني إنك أكيد بتولدي. بس لازم تعرفي إن عنق الرحم عندك ممكن يكون فاتح لحد 2 سم، وتكوني لسه بتتهيأي للولادة واللي ممكن تستمر لأيام. ولما تبدأي فعلًا في الولادة عنق الرحم بيتسع بسرعة وخلال ساعات.
-
زيادة الإفرازات المهبلية
من المعلومات اللي ممكن تكون مش معروفة لأمهات كتيرة، إن لما بيحصل حمل، جسمك بيكوّن زي سدادة مخاطية بتقفل تمامًا عنق الرحم، وبتحميكي وبتحمي رحمك اللي شايل الجنين من التلوث والعدوى البكتيرية. واللي بيحصل في الثلث الثالث من الحمل، ومع زيادة حجم ووزن الجنين، السدادة دي بيتم دفعها لأسفل. فهتلاقي إن في أواخر أيام الحمل، بيزيد ظهور الإفرازات اللي ممكن يكون فيها شعيرات من الدم، لكن لو لاقيتي بينزل دم تقيل زي دم الدورة الشهرية، اتصلي بطبيبك فورًا.
-
طفرة مش طبيعية في الطاقة
انتي ممكن تلاقي نفسك في يوم صاحية في منتهى النشاط على عكس طبيعة فترة حملك، وقاعدة ترتبي البيت وتغسلي الهدوم وتطبخي وتحطي في الفريزر أكل على التسخين. حتى ممكن تلاقي نفسك بتغسلي الستاير وبتعملي مجهود خرافي. صحيح ممكن فيه سيدات ده العادي بتاعهم، بس لو هو مش العادي بتاعك، فدي تقدري تعتبريها إنك هتولدي خلاص.
-
انفجار كيس الماء
الكيس الأمنيوسي كيس مليان مياه بيسبح فيه طفلك طول فترة الحمل. في أثناء الولادة أو قبلها، هتنزل منك المياه على دفعات. ولو حصل واختلط الأمر عندك بين المياه دي وما بين البول، استعيني بطبيبك وهو هيعرف الفرق.
-
الانقباضات
خلال رحلة الحمل، وخصوصًا في الثلث الأخير، هتلاقي نفسك أوقات بتحسي بانقباضات مؤلمة لكنها سرعان ما بتختفي. الانقباضات دي اسمها انقباضات براكستون هيكس. واللي هي أصلًا علامة من علامات استعداد جسمك لعملية الولادة. بس ازاي تفرّقي ما بينها وما بين انقباضات الولادة؟
1. اسألي نفسك هل الانقباضات منتظمة؟
الحقيقة إن انقباضات الولادة منتظمة من البداية حتى لو ما كانتش متقاربة في الوقت.
2. قد إيه المدة اللي بتستمر فها الانقباضات؟ أو قد إيه بيستغرق الانقباض الواحد لحد ما الرحم يعود لوضعه الطبيعي؟
3. هل الانقباضات بتوقف؟
الانقباضات الحقيقية بتستمر بغض النظر عن مستوى نشاطك. والانقباضات المزيفة بتتوقف عند المشي أو الراحة أو تغيير وضعك.
في الآخر، بنتمنى لكل أمهاتنا الرائعات يقوموا بالسلامة. بس نصيحة أخيرة: لا تترددي في الاتصال بطبيبك إذا كنت محتارة إنك بتولدى فعلًا ولا لأ مهما حصل.
التعليق باستخدام حساب فيس بوك