العلامات المبكرة لـ انقطاع الدورة الشهرية

• أسباب انقطاع الدورة الشهرية.
• العلامات المبكرة واعراض انقطاع الطمث.
  .

• أسباب انقطاع الدورة الشهرية

بيتصنف بشكل عام إنك دخلتي في وقت انقطاع الدورة الشهرية لو استمرت لمدة 12 شهر مش بتيجي أبدًا .. ومعدل حدوث الموقف ده بيكون في فترة أربعينيات وخمسينيات المرأة .. واللي بيكون لها أسبابها منها:

• انخفاض إنتاج الهرمونات: انخفاض إنتاج الهرمونات من أعراض انقطاع الطمث لأن بطبيعة الحال ومع اقترابك لفترة نهاية الثلاثينات، بيبدأ جسمك ينتج كمية هرمونات أقل من الأستروجين والبروجستيرون اللي هي الهرمونات خاصة بتنظم الدورة الشهرية، وبالتالي تنخفض خصوبتك… هتلاحظي في الأربعينيات من عمرك إن طبيعة دورتك هتختلف .. يعني هتكون أطول أو أقصر، أخف أو أشد في النزيف لحد ما توصلي للخمسينات وتتوقف المبايض عن العمل وبالتالي تتوقف دورتك الشهرية.

هنا ممكن تشوفي 5 طرق طبيعية لتأخير الدورة الشهرية

• الخضوع لجراحة إزالة المبيضين (استئصال المبايض): بمجرد الخضوع للعملية دي، بتتوقف الدورة الشهرية تمامًا لأن هما المسؤولين عن حدوثها. وهتلاقي نفسك بتختبري أوقات من الهبات الساخنة اللي هو تحسي إن درجة حرارة جسمك ارتفعت مهما اختلف المحيط الحراري اللي حواليكي، وللأسف التغيرات هتكون مفاجأة وشديدة لأن العملية جذرية، مش تدريجية.

• الخضوع لعلاجات كيميائية أو إشعاعية: قد تؤدي علاجات أمراض السرطان اللي بتتطلب علاج كيميائي أو إشعاعي إلى انقطاع الدورة الشهرية، وفي حالة توجيه العلاج الإشعاعي للمبايض هيؤدي لانقطاع الدورة الشهرية، لكن لو لأجزاء تانية من الجسم مش هتأثر عليهم.

• قصور المبيض الأساسي أو Primary ovarian insufficiency .. ودي حالة نادرة بتصيب حوالي 1% من الستات: إن دورتهم الشهرية تنقطع بشكل طبيعي قبل سن الأربعين، وبيكون ساعتها اسمه اتقطاع الطمث المبكر .. اللي بيحصل إن بيحصل فشل في المبايض إنها تنتج الهرمونات المطلوبة، وأوقات بيكون السبب وراثي أو الإصابة بإحد أمراض المناعة اللي بتهاجم أنسجة الجسم. وفي الحالة دي، بيفضل إن المريضة تاخد علاج هرموني لحد ما توصل للسن الطبيعي لانقطاع الطمث.

هي دي الأسباب الأساسية لحدوث انقطاع الدورة الشهرية. هنيجي دلوقتي للعلامات المبكرة اللي لو لاحظتي منها حاجة، يبقى تعرفي إنك قربتي تدخلى في مرحلة انقطاع الطمث.

• العلامات المبكرة لـ إنقطاع الدورة الشهرية

في الأشهر أو السنين اللي بتسبق انقطاع الطمث، هتلاحظي إنك بتمري بمجموعة أعراض منها:

1. الدورة بتيجي بشكل غير منتظم.
2. حدوث جفاف في المهبل.
3. الهبات الساخنة.
4. إحساس بالرعشة أو القشعريرة.
5. عرق ليلي.
6. اضطرابات في النوم.
7. تقلبات مزاجية حادة.
8. زيادة غير مبررة في الوزن وضعف في التمثيل الغذائي.
9. زيادة في جفاف البشرة ورقة في سمك الشعر.
10. الثدي بيبدأ يفقد إستدارته.

هي دي أعراض انقطاع الطمث العامة اللي أكيد بتختلف من واحدة للتانية. المهم واللي لازم تفضلي حريصة عليه ومن غير أي إهمال هي الزيارات المنتظمة لطبيبك الخاص وإطلاعه على كل الأعراض اللي ممكن تظهر عليكي وتحسي إنها غريبة. الإهمال في صحتك أكبر جريمة ممكن تعمليها في حق نفسك، حافظي دايمًا على نفسك.

لو أول مرة تسمعي عن التامبون يبقى لازم تشوفي المقال دي هل جربتي التامبون؟ .. اعرفي مميزاته وعيوبه وأسعاره

المصادر

www.mayoclinic.org
www.menopause.org
www.nhs.uk