زمان كانت الفكرة عن الصحة النفسية والطبيب النفسي وزيارته مشينة، وبتوصل لحد اتهام المريض بالجنون، وده كان نابع من جهل تام بطبيعة النفس البشرية وأمراضها وتقلباتها. واللي هي عاملة زي الجسد بالظبط، بتيجي عليها مؤثرات واضطرابات وأمراض، وبتخف وبتصح تاني، ومحتاجة علاج زي علاج الجسم، ومش شرط العلاج يكون بالأدوية، ممكن يكون بالكلام أو بالتوجيه الصحيح. بس المهم إننا نطلب المساعدة في الوقت الصحيح، عشان تكون رحلة الشفاء أسهل وأسرع وأنجح. علشان كده، هنقول لك على 5 علامات مبكرة بتقول لك إنك لازم تروحي لدكتور نفسي فورًا.
أهم علامات بتقولك لازم تروحي لدكتور نفسي
- الحزن الدائم.
- الأفكار السلبية.
- الخوف والقلق.
- التصرف بالشره.
- التوتر العصبي والعصبية الزايدة.
-
الحزن الدائم
كلمة اكتئاب بقت دارجة زيادة عن اللزوم، أي حد زعلان أو مخنوق يقول أنا مكتئب. لكن الحقيقة إن الاكتئاب مرض له درجات وله نوبات وأعراض، ومحدش يقدر يشخصه إلا المختص النفسي. لكن مبدئيًا لو حسيتي بحالة من الحزن الدائم، والرغبة في العياط على أتفه الأسباب، وإن تفكيرك طول الوقت مايل للكآبة، ما تسمعيش للاتهامات اللي زي: انتي نكدية، انتي بقيتي حساسة وكئيبة، وروحي في اقرب وقت لدكتور نفسي، وخصوصًا لو ده حصل بعد الولادة أو الإجهاض أو فقد حد عزيز، أو تجربة انفصال، وغيرها من المواقف الصعبة اللي بنمر بيها في حياتنا.
هنا ممكن تشوفي أعراض الاكتئاب الموسمي وطرق علاجه
-
الأفكار السلبية
ودي بتيجي في بالنا أحيانًا، وبيكون اسمها متشائمين. لكن الأفكار السلبية اللي تستدعي زيارة الطبيب النفسي، هي اللي بتسيطر على الدماغ وبتتحكم في التصرفات، وبتسبب الأرق أو الـ Over Thinking ، وبتخلي الشخص مرهق ومنهك وفاقد التركيز طول الوقت، ومش مستمتع بأي حاجة، وبيعاني من كوابيس في النوم واليقظة، والأفكار دي ممكن تكون خاصة بالنفس أو الناس اللي بنحبهم أو الشغل.
-
الخوف والقلق
الخوف والقلق مشاعر طبيعية عند كل الناس، وجزء من تركيبتنا النفسية. لكن لو زادوا عن حدهم يبقى لازم تزوري طبيب نفسي في أسرع وقت، لإن المشاعر دي لما بتزيد وبتتحكم في حياة الشخص بتتحول لاضطراب نفسي مش مجرد شعور عابر ومسبب.
-
التصرف بالشره
لو لاحظتي انك بتتصرفي على غير العادة بشراهة في الأكل أو التسوق أو الجنس، وبشكل متتابع ومتكرر، مش حالة عابرة ترفيهية مثلًا. وبترجعي تندمي بعد التصرف ده، يبقى لازم تستشيري مختص نفسي، لإنها بتكون دلالة على حاجات نفسية أعمق من تصرف الشره نفسه.
-
التوتر العصبي والعصبية الزايدة
لو لقيتي نفسك طول الوقت متعصبة وبتصوتي وتصرخي وتكسري، ومشاعر الغضب والتوتر عندك هي اللي سايده، وخصوصًا لو بدون أسباب تستدعي ده كله، تبقى زيارة الطبيب النفسي واجب عليكي، وخصوصًا لو انتي هادية وطبعك رايق والعصبية مش من عاداتك اليومية.
وما تتردديش إنك تطلبي المساعدة من الناس اللي انتي بتثقي فيهم، من غير ما تخافي من أي وصمة، وما تسمعيش النصايح بتاعت يومين وهتبقي كويسة، ومين فينا مش بيتوتر، والله أنا تعبانة أكتر منك، وكل الكلام اللي بيأخر ومش بيقدم.
مع تمنياتنا ليكي بوافر الصحة النفسية والجسدية.
التعليق باستخدام حساب فيس بوك