ساعات كتير بتتعرض السيدة لمشاكل صحية، أو آلام وأوجاع، بس ما بتبادرش بزيارة طبيب النسا، مرة تقول ده وجع وهيروح، ومرة تاخد مسكنات، ومرة تسأل صاحباتها لو حد مر باللي هي بتمر بيه، والحقيقة إن دي مشكلة كبيرة جدًا، لإن أمراض كتير بيفرق قوي فيها الكتشاف المبكر، ده غير إن في آلام كتير تقدري تتفاديها بحلول طبية بسيطة جدًا، علشان كده هنقولك في المقال ده عن 5 علامات لو حصلت لك واحدة منهم، يبقى لازم تزوري طبيب النسا:
-
عدم انتظام الدورة الشهرية
وعلامة عدم انتظام الدورة الشهرية، شائعة عند السيدات وحتى البنات، ومن كتر انتشارها برضه أغلب السيدات بيهملوها، مع إنها ممكن تتدل -لا قدر الله- على مشاكل صحية كتير، سواء عضوية أو هرمونية أو نفسية، وممكن تيجي معاها أعراض وأسباب تانية زي:
- فقد الوزن الزايد أو اكتساب الوزن.
- اضطرابات الأكل زي فقدان الشهية أو الشره.
- فقر الدم.
- ممارسة التمارين الرياضية.
- الرضاعة الطبيعية.
- الإجهاد العاطفي.
- السفر الكتير.
- استخدام دواء منع الحمل غير المناسب.
- المخدرات غير المشروعة.
- الربو وحمى القش.
- متلازمة تعدد تكيسات المبايض.
- الاختلالات الهرمونية.
وتقدري تعرفي أسباب تأخر الدورة الشهرية غير الحمل
-
إفرازات مهبلية غير طبيعية
في درجة طبيعية مطلوبة من الإفرازات المهبلية، وممكن مع بعض الحالات تزيد زي الحمل والولادة والنشوة الجنسية، لكن في مرات تانية بتكون كميته وريحتها ولونها مش طبيعية، وده بيدل على حاجات كتير، علشان كده لازم الطبيب هو اللي يشوفك ويحدد التشخيص، ومن الأسباب اللي بتزود الإفرازات المهبلية:
- عدوى البكتيريا أو الخميرة.
- الأمراض المنقولة جنسيًا.
- آثار جانبية لحبوب منع الحمل
- سرطان عنق الرحم.
- انقطاع الدورة الشهرية.
-
تغير ريحة المهبل
واللي بتسبب إحراج كبير للسيدة اللي بتعاني منها، صحيح إن المهبل له ريحة خاصة، لكنها مش بتكون نفاذة ولا بتكون كريهة وخصوصًا مع المحافظة على النضافة الشخصية، وللأسف في مرات كتير، بتتغير ريحة المهبل وبيصاحبها أعراض زي الحكة والاحمرار والحرقان، ودي الأسباب اللي ممكن تسبب التغير المرضي لريحة المهبل:
- و البكتيريا وعدوى الخميرة.
- التغيرات الهرمونية.
- الأمراض المنقولة جنسيًا.
- الإهمال في النضافة الشخصية.
-
الدورة الشهرية القوية والمؤلمة على غير العادة
ودي بتعرفيها لما بيحصل نزيف وقت الدورة الشهرية، طيب إمتى ده يتسمى نزيف؟ لما تحتاجي تغيري الفوط الصحية أكتر مرة كل ساعتين، ودي بعض أسباب نزيف الدورة الشهرية:
- الخلل الهرموني.
- الأورام الليفية.
- الأورام الحميدة.
- مرض التهاب الحوض
- مشاكل في بطانة الرحم
- أمراض الغدة الدرقية.
- مشاكل في الكبد
- بعض أمراض الكلى.
ودي من العلامات اللي مهم جدًا إنك تروحي للطبيب في أقرب وقت، لإن مع فقد كميات كبيرة من الدم، بيحصلك مضاعفات أكبر زي فقر الدم وعدم انتظام التنفس.
-
تكتلات في الثدي
لازم السيدة تعمل لنفسها فحص منزلي دوري للوقاية من سرطان الثدي، كل 3 شهور، ودي الحاجات اللي لو لاحظتها السيدة في ثديها، لازم تتوجه للدكتور في أسرع وقت ممكن:
- كتل، أو تجمعات على شكل حبوب البقول.
- تورم من غير شكل معين.
- احمرار.
- طفح.
- إفرازات من الحلمات.
ده غير إن لازم يكون للسيدة زيارة دورية لطبيب النسا، حتى لو مش بتحس بوجع معين.
مع تمنياتنا ليكي بتمام الصحة والعافية.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك