جهاز المناعة هو الجيش الأول المسؤول يحمي ويدافع عن جسم طفلك ضد أي مرض ولازم دايمًا نأخد بالنا من تقوية مناعة الأطفال والكبار، ومع دخول المدارس وكلنا قلقانين على ولادنا من أي عدوى تيجي لهم من الاختلاط محتاجين نتأكد إن جهاز المناعة لولادنا شغال بكفاءة وبصورة كاملة، طيب ييجي في بالنا سؤال مهم: “إيه هي علامات ضعف الجهاز المناعي للطفل؟” في المقال ده، هنقول لكل أم على أهم علامات محتاجين ناخد بالنا منها إنها لو ظهرت على حد من ولادنا يبقى بتدل على نقص المناعة للطفل.
أهم علامات ضعف الجهاز المناعي للطفل
-
الطفل بيجي له برد كتير
بنلاحظ على الطفل إنه بيتصاب بأدوار البرد واحتقان الزور بشكل متكرر بطريقة نلاحظها بسهولة، حتى في الأيام اللي بيكون فيها الجو مظبوط ومفيش أدوار برد كتير.
-
بيتكرر إصابته بالنزلات المعوية
حتى لو الطفل مش بياكل من برا أو محافظين على نظافة ومصدر أكله، بنلاحظ إنه بيجي له أدوار متكررة، فده ممكن يكون علامة من علامات ضعف المناعة عند الطفل.
-
ضعف الشهية وقلة الأكل
من أهم العلامات اللي بتبان على الطفل اللي عنده ضعف مناعة وسوء التغذية، هي إنه يكون شهيته ضعيفة جدًا وأكلته ضعيفة واللي بيأثر بشكل واضح على النمو الجسدي عن اللي في سنه.
-
وقوع الشعر بصورة ملحوظة
بيتأثر شعر الطفل بصورة كبيرة وملحوظة جدًا بالذات لو بنت، شعرها بيبان ضعفه وإنه بيقع، واللي ممكن يديكي إشارة لنقص مناعة الطفل وسوء التغذية.
-
إجهاد عام وإرهاق دايمًا باين علي الطفل
ممكن نلاحظ إن الطفل نشاطه أقل من الطبيعي وإنه بيحس بالإجهاد بسرعة وبيعاني من التعب من أقل مجهود، لأن الطبيعي مع أغلب الأطفال هو الحركة الكتيرة والهيبرة، فلما نلاحظ قلة النشاط وكتر النوم على الطفل فنبقى محتاجين ندور على السبب.
لو لاحظتي أي من الأعراض دي على طفلك أو غيرها من الأعراض أو العدوي أو ارتفاع درجة الحرارة من غير أسباب واضحة وبصورة متكررة، يبقى لازم تستشيري طبيب الأطفال المتخصص وتعملي التحاليل اللازمة عشان تتأكدي من كفاءة جهاز المناعة عند الطفل.
وطبعًا ما ننساش دورنا في تقوية جهاز مناعة ولادنا عن طريق التغذية السليمة والصحية وتقليل الأكل من بره. وفي نفس الوقت، عدم الإفراط في استخدام الأدوية والمضادات الحيوية عشان ندي فرصة للجهاز المناعي إنه يتطور ويشتغل ضد أي عدوي في الجسم.
التعليق باستخدام حساب فيس بوك