لما الأم بيكون عندها طفل حديث الولادة، بتكون لسا مش عارفة تفاصيل كل حاجة بتحصل معاه، ومش عارفة إيه الطبيعي وإيه غير الطبيعي، وخصوصًا لو كل لما تقلق من حاجة عند البيبي، اللي حواليها يحسسوها إنها قلقانة زيادة علشان لسا أم جديدة، لكن في أعراض وعلامات لو ظهرت على الطفل المولود جديد، ماينفعش يتسكت عليها أبدًا، ولازم استشارة طبية فورية، علشان كده هنقولك في المقال ده علامات لو ظهرت على الطفل حديث الولادة لازم تروحي لدكتور في أسرع وقت ممكن:
علامات وأعراض لو ظهرت على الطفل حديث الولادة، لازم طبيب
طبعًا الطفل حديث الولادة بياخد وقت على ما بيتأقلم على الحياة الجديدة خارج رحم الأم، وبتهر عليه بعض العلامات والأعراض غير الطبيعية بالنسبة لبقية الأطفال اللي عمرهم شهور، لكن في الحقيقة الأعراض دي ممكن جدًا تكون طبيعية بالنسبة لحديثي الولادة، لكن للأسف لو زادت حدة الأعراض دي، أو ظهرت أعراض تقلق، يبقى لازم تروحي لدكتور فورًا، وأهم الأعراض دي:
- الكحة المتكررة أو الإسهال أو القيء.
- العرق الشديد أثناء الرضاعة.
- النوم أكتر من المعتاد.
- تغير في لون الذراعين والساقين.
- انخفاض درجة حرارة الجسم عن 36 درجة مئوية.
وهنقولك إيه هي خطورة كل عرض أو علامة من دول:
-
الكحة المتكررة أو الإسهال أو القيء:
مشكلة الإسهال والقيء المستمرين، إنهم ممكن يسببوا جفاف للبيبي، واللي له مخاطر كبيرة على الدماغ لو وصل لمراحة متأخرة، لكن أهمية متابعة الأعراض دي، إنها لا قدر الله ممكن تكون بتدل على مشاكل صحية أكبر، زي مشاكل في الأمعاء أو المعدة.
والكحة لو هي مش بأسباب طبيعية زي الأنفلونزا، فممكن تدل على مشاكل في الجهاز التنفسي.
-
العرق الشديد أثناء الرضاعة:
طبيعي إن الطفل يعرق أثناء الرضاعة الطبيعية أو الصناعية، لإنه بيبذل مجهود في الرضاعة، لكن في درجة تعرق بتكون غير طبيعية وبتدل على أمراض أكبر زي: عدوى المسالك البولية، أو عدوى الجروح، أو عدوى الجهاز التنفسي، أو الإصابة بمرض الربو أو دلالة على أمراض أو عيوب خِلقية في القلب.
-
النوم أكتر من المعتاد:
عدد ساعات النوم الطبيعية لحديثي الولادة من 11 لـ 17 ساعة، بيصحى البيبي خلالهم كل 4 لـ 5 ساعات، لكن لو النوم زاد عن المعدل ده، لازم تعرضيه على دكتور لإن غالبًا بتكون دي دلالة على مشكلة صحية، زي مشاكل القلب والتنفس أو الصفراء، وده طبعًا لو حصل في الأيام الاستثنائية زي أيام التطعيمات، بيكون عرض طبيعي مايتخافش منه.
-
تغير في لون الذراعين والساقين:
اصفرار لون جلد الذراعين والساقين عند الطفل، بيدلوا على الصفراء عند حديثي الولادة، وفي الحالة دي هتلاقي لون عين البيبي متغير برضه للأصفر، مع خمول ونوم كتير، لكن لو لون الذراعين والساقين متغير لونهم للأزرق، فدي بتكون دلالة على مشاكل في القلب، ولو متغير لونهم للأحمر فممكن تكون حساسية، وفي كل الأحوال والألوان لازم دكتور يشوف البيبي.
-
انخفاض درجة حرارة الجسم عن 36 درجة مئوية:
ودي من أخطر العلامات اللي بتحتاج تدخل طبي، لإن في مرض اسمه انخفاض درجة حرارة الجسم، بس على ما تروحي للدكتور، لازم تساعدي طفلك في الحفاظ على درجة حرارة جسمه باحتضانك له، وتلبسيه ملابس تدفي كويس ولو في أي هدوم مبلولة أو رطبة هو لابسها يبقى لازم تغيريها له، وتلبسيه ملابس جافة تمامًا، وتغطيه كويس بالبطانية.
وتقدري تشوفي المقالات دي فيها تفاصيل أكتر عن أعراض بتيجي للأطفال حديثي الولادة:
الارتجاع عند الأطفال .. أسبابه وأعراضه وطرق علاجه
حَوَل العين عند الأطفال الرضع حديثي الولادة
مع تمنياتنا لكل الأطفال بالصحة والسلامة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصدر:
التعليق باستخدام حساب فيس بوك