التوحد أو اضطراب طيف التوحد هو مجموعة من حالات ضعف السلوك الاجتماعي والتواصل والمهارات اللغوية، واهتمامات المصاب بالتوحد ما بتكونش واسعة زي الشخص العادي. منظمة الصحة العالمية بتقول إن طفل واحد من كل ١٦٠ طفل بيعاني من اضطراب طيف التوحد. بمناسبة اليوم العالمي للتوحد، هنقول لك بعض علامات التوحد، لكن بنؤكد عليكي إن درجات قوة الأعراض دي وعددها بيختلف من طفل مصاب لطفل تاني وإن لو عرض منهم ظهر مش معناه إصابة طفلك المؤكدة. لما تلاقي أكتر من عرض، نرجوكي التوجه لطبيب فورًا.
طبقًا لموقع WebMD، فلو الطفل عنده درجة من درجات طيف التوحد، بيبان عليه بعض العلامات دي من سن ٨ – ١٠ شهور.
- ما بيلتفتش لما حد يقول اسمه.
- اللعب مع أطفال تانية مش من اهتماماته ومش حاجة بتحمسه. ولو هو في سن الكلام، فهو ما بيحبش يتكلم مع أطفال تانية أو حتى أشخاص أكبر.
- بيحب يبقى لوحده.
- بيتجنب أو بيرفض التلامس حتى مع أقرب ناس له.
- ما بيعملش اتصال بالعين.
- لما بيتضايق، ما بيحبش حد يهديه.
- ما بيفهمش المشاعر، لا مشاعره هو ولا مشاعر الناس.
- اتأخر في الكلام.
- لما بيتكلم بيبقى كأنه روبوت، مش بينوع في صوته.
- مشاكل في استخدام الضمائر زي إنه يستخدم ضمير “أنت” عشان يقول “أنا”.
- ما بيستخدمش الإشارات باليد أو التلويح، ولا بيتفاعل معاها لو غيره عملها.
- ما بيفهمش الهزار أو السخرية.
- حركات متكررة زي الاهتزاز لورا وقدام بشكل متكرر.
- الحركة باستمرار بشكل “مهيبر” أحيانًا.
- عندهم روتين دقيق جدًا ولو اتكسر بيغضبوا جدًا.
- حساسية مفرطة ناحية اللمس أو الضوء أو الصوت.
- ما لهوش في أي ألعاب لها علاقة بالتمثيل أو تقليد سلوك أو شخص معين.
- الاندفاع في التصرفات (التصرف من غير تفكير).
- قصر مدة التركيز.
بنؤكد عليكي مرة تانية إن فيه أعراض من الأعراض دي متشابهة مع أعراض اضطرابات تانية، وإن حدة الأعراض ووقت ظهورها بيختلف. وعشان كده بننصحك تتوجهي لأخصائي أول ما تحسي إن طفلك ممكن يكون عنده توحد. بنتمنى لك ولطفلك حياة سعيدة.
التعليق باستخدام حساب فيس بوك