محتويات المقال
أول لما بتخلص علبة اللبن الصناعي (الـFormula) أو الشوفان بنرميها وبنقول بلاش كركبة طيب إيه رأيك المرة الجاية لما علبة تخلص مترميهاش وتجربي تعملي بيها Craft أشكال حلوة وجديدة؟ لو إنتي بتحبي تعملي إعادة تدوير وتشتغلي بإيدك الموضوع ده هيعرفك على أشكال تقدري تعمليها بعلب الشوفان أو علب اللبن الفاضية، الأشكال مش بتاخد وقت أو مجهود ومش مكلفة وكمان الأدوات اللي هتحتاجيها ممكن تكون متوفرة عندك في البيت أو في المكتبات العادية.
قبل ما تبدأي اغسلي العلبة كويس أوي عشان متعملش ريحة مش لطيفة وبعدين نشفيها كويس على طول وبعدين جهزي الأدوات اللي هتحتاجيها ومكان مناسب تعرفي تشتغلي فيه، بس خلي بالك إن الأدوات والمكان يكون بعيد عن إيد الأطفال.. لو هتحتاجي ترشي العلب بسبراي للطلاء يفضل إنك تعملي كده فى مكان مفتوح زي البلكونة عشان الريحة ويفضل إنك تلبسي ماسك للوش خصوصًا لو عندك حساسية صدر أو جيوب أنفية.
حافظة أكياس صغيرة
أول حاجة هتحتاجي سبراي طلاء باللون اللي بتحبيه وترشي العلبة بعد ما تنشف ممكن تكتبي بقلم ماركر على العلبة أو تستخدمي ستيكر حروف جاهز وتلزقي الكلمة على العلبة، هتحتاجي Cutter أو سكينة عشان تعملي فتحة في الغطا على قد الأكياس.. العلبة دي هتساعدك كتير تحتفظي بالأكياس بشكل منظم وممكن تعملي كذا واحدة لو العدد كبير.
حافظة توك
طبعًا توك البنات بتبقى كتير جدًا وبتضيع الطريقة دي هتخليكي تحتفظي بيها عشان ميضيعوش، هتعملي لون العلبة بالشكل اللي تحبيه وممكن تلفي عليها شريط دانتيل شيك أو تلزقي ورد وتستخدمي مسدس الشمع أو لاصق قوي عشان تقدري تلزقيهم وكمان ممكن تحطي الطوق أو الـSerre tete زي الصور كده كديكور.
ديكور لأعياد الميلاد Center piece
لو عيد ميلاد ابنك أو بنتك قرب ممكن تستخدمي علب اللبن دي كديكور لعيد الميلاد وتستخدميه كمان بعد كده كديكور لأوضته، كل اللي هتحتاجيه سبراي طلاء، ورق لاصق، ورق كوريشة وممكن بلالاين أو كور صغيرة باللون اللي تحبيه وتبتكري الشخصية الكارتونية المفضلة ليكي.
قصاري للزرع
لو بتحبي تزرعي حاجات بسيطة مش بتحتاج مكان كبير، ممكن تزرعي فى العلب دي نعناع أو بقدونس…لوني العلب باللون اللي تحبيه وممكن تلزقي ستيكر جاهز بأسم الزرع أو تقصي ورق على شكل وتلزقيه بمسدس الشمع.
حصالة فلوس
ممكن تفرحي إبنك وتعملي لأبنك حصالة يشيل فيها فلوسه، عشان تعملي أشكال زي الصورة ممكن تجيبي ورق وتقصيه أو ورق فوم تعملي بيهم شخصيات وتعملي فتحة مكان الغطا مناسبة لحجم الفلوس.
علبة منظمة
الطريقة دي سهلة جدا ومش هتحتاجي أكتر من مسدس شمع أو لاصق قوي وخيط دوبارة و تلزقيه على العلبة، ممكن تستخدميها كمنظم لكريمات البيبي أو منظم لفرش الميك آب أو للألعاب الصغيرة…
علبة للألوان
ممكن تعملي العلب دي مخصوص للألوان بدل ما تضيع وتزينيها بفوم جليتر أو ديكورات بسيطة زي زراير ملونة.
علب للمعالق
ممكن تختاري ورق لاصق بيكون ليه أشكال كتير وتلزقيه كويس على العلبة أو تعمليه بأي طريقة تعجبك وتستخدميها عشان تحطي فيها معالق الطبخ وتزيني بيها رخامة المطبخ.
علب هدايا
بدل صناديق الهدايا المعتادة، ممكن تزيني علب اللبن وتعملي فتحتين تحطي فيهم إيد تتعلق منها وتغلفيها بدانتيل أو بأي زينة تحبيها وتحطي فيها هدايا بسيطة وممكن تستخدميهم لتوزيع الهدايا فى أعياد ميلاد ولادك.
ديكورات للمناسبات المختلفة
ممكن تعملي ديكورات للبيت لولادك في المناسبات المختلفة زي الهالوين والكريسماس بإستخدام علب اللبن، ممكن ترشي العلب بسبراي طلاء وتسيبيه ينشف وتلوني عليه أشكال مخيفة بقلم ماركر أو تلزقي عليه ستيكر بأشكال مرعبة.
إيه رأيك تجربي الأشكال دي وتورينا صورة؟
التعليق باستخدام حساب فيس بوك