سمعتي قبل كده عن مصطلح اللسان المربوط أو اللسان المعقود (Tongue tie)، الحقيقة دي حالة بتصيب عديد من الأطفال، وبتتعرف بمجرد الولادة، واللي بيحصل فيها إن لجام اللسان اللي هو بيربط اللسان بقاع الفم أقصر من المفروض، فتعالي نتكلم عن الحالة دي بشكل مفصل شوية.
هنا ممكن تشوفي بكاء الطفل: افهمي طفلك من طريقة عياطه
إيه هو اللسان المربوط؟
اللسان المربوط زي ما قلنا هو حالة صحية مش بتتعرف غير بعد الولادة، أعراضها بتختلف طبعًا من طفل للتاني، لأن أوقات فيه أطفال بتكون عندهم الحالة دي ومش بيكون فيه أي تأثير عليهم، بينما فيه مجموعة تانية من الأطفال بتعاني من صعوبات مختلفة بسبب الحالة دي. شدة الإصابة باللسان المربوط تعتمد في الأساس على قصر طول اللجام، وفيه منها:
- الحالة المعتدلة أو المتوسطة: دي لما يكون اللسان مربوط بالفم من تحت اللسان بلجام واضح بس قصير.
- الحالة الشديدة: بتحصل لما يندمج اللسان نفسه مع قاع الفم بسبب القصر الشديد للجام.
وزي ما قلت لك تشخيص بالإصابة باللسان المربوط بيتم بعد الولادة على طول، بس أوقات بيكون التشخيص ده فيه صعوبة ومش بيتم ملاحظته إلا من الأهل لما تبدأ الرضاعة الطبيعية. وعلى فكرة، الحالة دي بتصيب الأولاد أكتر من البنات.
طرق إخراج الغازات من بطن البيبي .. وأعراض وأسباب الغازات
إيه أسباب اللسان المربوط؟
اللي بيحصل إن اللسان بيندمج مع قاع الفم لما بيكون الطفل لسه جنين في بطن أمه، الطبيعي إن مع تقدم نمو الجنين بيحصل انفصال ما بين اللسان وقاع الفم بس بيكون مربوطين بنسيج كده بنسميه لجام اللسان. بعد الولادة، المفروض إن اللجام اللساني بيرجع لوضعه الطبيعي، لكن للأسف عند الأطفال اللي عندهم حالة اللسان المربوط، نسيج اللجام نفسه بيفضل سميك، ومش بينفع يرجع للحجم الطبيعي، ولحد دلوقتي مش معروف سبب واضح للحالة دي، بس غالبًا بيكون لها سبب وراثي.
10 نصائح للتغلب على نوبات بكاء الرضع
أعراض اللسان المربوط
أعراض اللسان المربوط بتختلف من طفل للتاني، وما بين حالة شديدة وحالة خفيفة. وعلى فكرة، في حالة اللسان المربوط، بيكون على شكل قلب، أو فيه شق لو الحالة شديدة. لكن لو الحالة خفيفة الأعراض مش هتؤثر على الحياة اليومية.
أعراض اللسان المربوط عند الرضع
لو ظهرت الأعراض دي عند رضيعك، فممكن جدًا يكون مصاب باللسان المربوط:
- دايمًا جعان.
- الوزن بيزيد بصعوبة.
- بيرضع طبيعي لوقت طويل جدًا.
- مش بيعرف يقفل فمه كويس وقت الرضاعة الطبيعية.
- وقت الرضاعة بتسمعي صوت زي طقطقة طالع من فمه.
وهتلاحظي إن فيه مشكلات ظهرت لك إنتي نفسك لو بترضعي طبيعي، زي مثلا:
- تشققات مؤلمة جدًا للحلمة
- هتلاقي إن اللبن مش بيزيد عندك مهما رضعتي.
- وطبعًا أوجاع شديدة وقت الرضاعة.
أعراض اللسان المربوط عند الطفل الدارج
طيب دلوقتي لو طفلك كبر شوية وعايزة تعرفي هل هو بيعاني من الحالة دي ولا لأ؟، يبقى شوفي لو الأعراض دي بتظهر عنده ولا لأ:
- ضعف أو تأخر في الكلام.
- صعوبة في البلع ومش بيعرف ياكل أكل خشن.
- ما بيعرفش يحرك لسانه يمين وشمال أو يرفعه لفوق يلمس سقف الحلق.
- ما يقدرش يلعب بلعب فيها نفخ زي الصفارة.
- مش بيعرف يطلع لسانه بره فمه.
- مش بيعرف يبوس.
- لو خرّجتي لسانه هتحسي إنه شكله شبه القلب.
- سنانه فيها مشاكل زي إنه يقفل فكه العلوي على السفلي.
المياه خلف الأذن وعلاقتها بتأخر الكلام عند الأطفال
العلاقة ما بين اللسان المربوط والرضاعة الطبيعية
اللي بيحصل إن خلال عملية الرضاعة الطبيعية الطفل مفروض يمسك الحلمة ولسانه بيغطي اللثة السفلية في فمه علشان أولًا يعرف يتملك الحلمة صح وكمان علشان يحمي الحلمة. لكن لما يكون الطفل عنده لسان مربوط، فهو بيواجه مشكلة في حالة الرضاعة الطبيعية لأنه مش بيكون قادر أصلًا إنه يمص بطريقة كويسة. حتى إن الأم أصلًا هتلاحظ وجود تشققات وجفاف في الحلمة. بس طبعًا لازم تاخدي بالك إن اللسان المربوط مش هو السبب الوحيد أو المشكلة الوحيدة اللي ممكن تواجهك إنتي وطفلك في رحالة الرضاعة الطبيعية، لأن فيه أسباب تانية عديدة.
علاج اللسان المربوط
مش كل الحالات على فكرة بتحتاج تدخل علاجي، بس لو حصل والطفل كان بيعاني من مشاكل في الرضاعة ساعتها قرار التدخل الطبي بيكون ضروري، ومش أشكال العلاجات دي.
العلاج بالجراحة
هو علاج بسيط جدًا بيتضمن تدخل إجراء جراحي سريع وبسيط علشان قطع اللجام اللساني، هي على فكرة جراحة سريعة ومش بتحتاج حتى لمخدر لأن اللجام ده فيه أقل كمية من النهايات العصبية. هتلاقي إن بعد الجراحة مباشرة إن الطفل قادر يحرك لسانه بكل سهولة وتقدري ترضعيه مباشرة بعد العملية، لكن لو الطفل أكبر من 6 شهور فالموضوع هيحتاج تخدير كلي، ومدة العلاج ممكن تستمر لمدة 10 أيام.
العلاج بالليزر
برضه من الخيارات العلاجية المفضلة جدًا، لأن معاها الموضوع مش بياخد أكنر من 2 لـ 3 دقايق ومن غير تخدير وفترة الشفاء مجرد ساعتين.
العلاج بالكهرباء
في الطريقة دي، بيتم استخدام التخدير الموضعي. والطبيب في الأول والآخر هو اللي بيقرر العلاج الأنسب للحالة.
شكل اللسان المربوط عند الطفل
شكل اللسان المربوط عند الأطفال
أتمنى المقال ده يكون فهمك أكبر قدر ممكن عن الحالة دي ، ولو إنتي عندك أي شك إن طفلك بيعاني منها ما تتأخريش في استشارة طبيبك.
التعليق باستخدام حساب فيس بوك